I WUJ TZʼIBTAL CHIQUE I
AJ HEBRÉO WINAK
1
I u tzij i Dios, lic are u Cʼojol ire xol u bij chake
1 I Dios, are xraj cu bij u tzij chique i katit ka mam ujer, xu ya u tzij piqui jolom i je ajbil u tzij, teʼuri ique xqui bij u tzij chique i winak. Qʼuialmul xu bij jutak paj tzij chique, jalajuj tak u ʼonquil xu ʼano are xu ya wi u tzij chique. 2 Xui-ri woʼor, pa tak qʼuisbal ʼij, lic are u Cʼojol xol u bij u tzij i Dios chake. Are u Cʼojol-le xyijbaw i caj, i jyub taʼaj, i ʼij, i icʼ, i chʼumil. Xak u bim can i Dios chi coʼon panok, ʼis cu ya puʼab u Cʼojol wach tak i ʼolic. 3 Che i u Cʼojol-le cakil wi u tzunbal u chomal i Dios; che ire cakil wi i nim laj u ʼij i Dios. Pacha i Jesucrísto, xak queje i Dios. Are i Jesucrísto ca ucʼaw ruʼ u tzij ronojel wach i ʼolic, ruʼ u tzij chi lic nim u choʼab. Are xutzin che u patan, chi are i relsaxic i ka mac chikij, teʼuri xa ʼe chicaj, y xcubi pu wikabim i ka nim laj Dios chila.
I u Cʼojol i Dios, ʼatz u ʼij chiquiwach i ángel
4 Xa ʼalijinic chi u Cʼojol i Dios, ʼatz u ʼij chiquiwach i ángel, man i u Kajaw u yom u patan chi mas ʼo u ʼij chuwach i que ique. 5 I Dios xu bij che:
Yet at in Cʼojol;
woʼor in yom a cʼaslemal* Sálmo 2:17.
Queje ile xu bij che u Cʼojol, péro mi ta julaj u bim ile chique i ángel. Xak xu bij i Dios i tzij-i:
Quin ʼan che wib in u Kajaw ire; ire are ni in Cʼojol† 2 Samuel 7:14.
(Queje ile tzʼibtal canok.)
6 Xoʼon panok, i Dios, are xu tak li u Cʼojol chi ʼatz‡ I mer tzij xu bij are iri: “i nabe u Cʼojol”; i usucʼ i tzij-le are iri: “i u Cʼojol chi lic nim u patan xak nim u ʼij.” u ʼij, waral chuwach i jyub taʼaj, xak xu bij:
Conojel i ángel chiqui cojo u ʼij i wacʼal.
(Queje ile tzʼibtalic.)
7 I wuj re i Dios xak queje iri cu bij:
I Dios cu ʼan chique i ángel chi je u takon;
je pacha tew; je pacha u rep ʼaʼ§ Sálmo 104:4.
8 Xui-ri, che u Cʼojol, queje iri cu bij:
Yet at Dios, i a patan are i ʼatbal tzij chi n-tu qʼuisic.
I ʼatbal tzij chi ca ʼano, lic sucʼulic.
9 Yet lic cawaj i sucʼulic, tzel cawil i n-sucʼul taj,
rumal-i i Dios, chi a Dios yet, at u chom, xak u yom jun nim laj quicotemal chawe,
mas nim a quicotemal chiquiwach awachiʼil, man yet at ʼatol tzij.
(Queje ile tzʼibtal chupam i wuj re i Dios* 1:8,9 Sálmo 45:6,7.)
10 Xak cu bij:
Yet, Kajwal, chu xebal ʼij sak, xa yijba i jyub taʼaj;
xak ruʼ a ʼab xa yijba i caj.
11 Niʼpa ile ca qʼuisic, péro yet n-ta a qʼuisic.
Ronojel ile ca ʼelabic, pacha jumolaj cʼul.
12 Ronojel ile, ca bus na pacha ca ʼan che jun cʼul;
ronojel ile ca jaltajic pacha jun winak cu jal u ʼuʼ.
Péro yet n-cat jaltaj taj, xak i a cʼaslemal n-tu qʼuisic.
(Queje ile tzʼibtalic† Sálmo 102:25-27, Isaías 51:6.)
13 I Dios mi ta julaj u bim iri che jun ángel:
Chat cul pin wikabim, cʼa que in ya na pawakan i je aj chʼoʼoj awuʼ.
Xui che u Cʼojol xu bij i Dios ile‡ Sálmo 110:1. 14 Conojel i ángel xa je tewalil, je rajchac i Dios; que u tak chi qui toʼic i winak pachin que ʼel na chi sak.