1 Duwi pujus Ahitófel Absalógkan chichajak:

“Amina suntajum maanitan yacha aina iman etegjam doce mil sujusta. Dutikawamin yamai kashia duwik Davitan pataetuktajai. 2 Dutikan pimpiki ayamak pujaun amainagkan, niina aentsji aidaun uwaaka ishimkun nigki juwakmatai maatjai. 3 Dutika ai ashí aents aidauk nuwa aishina niina apajin dukujijai ukuak, aishijai wegama numamtuk waketug aminí kaunattawai, wagki amek ima Davitak mantamnati tusam wakegame. David mantamnamtai ashí Israel aents aidauk agkan ijunag utugchat atsaunum batsamsagtatui”, tiuwai.

4 Tusa timatai Absalón nuna shiig pegkeg diisui, tuja Israel aents aidaun apuji aidaushkam pegkejai tiajui. 5 Tujash Absalógkak Husai untsuka utitajum niish wajintuk anentaimua nunú dekajuami tiuwai.

6 Tusa tima Husai jegamtai, Absalón chichajak:

“Ahitófel chichaak: ‘Yamaikiuch David pataetukmi’ tawa dusha ¿amesh wajintu anentaime? nunú tukagtita”, tau.

7 Tama Husai ayaak:

“Yaunchuk pegkejan tujamin akush, yamai tujama nunak pegkegchaun tujamne. 8 Amek shiig dekame amina apak niina aentsji aidaujai maanitan yacha ainawai. Iman asag chayú uchiji yajutkam kajeka ishamain wajama imaninawastai. Nuigtushkam amina apak yaunchuk nagkamas maanitnak unuimatjauwai. Nuadui niig aneaku asa tikich aents aidaujai ijunjag kanagchattawai. 9 Yamaikish auk niig waanmagkesh, nuniachkush tikich yantamnumkesh uumkas pujatai. Tuja ame jeteamin amina suntajum aidaun ujumak jinaamtaig, tikich Israel aents aidau nuna dekawag Davitap dekas niina suntaji aidaujai depetkae tusa niina eme anenjagtatui. 10 Nuniagtai amina suntajum dekas wajiu leónjai betek kajen aidaush nuna antukag maaniachmin dekapjagtatui, wagki Israel aents aidauk ashí dekainawai, amina apak niina aentsji aidaujai wajiu aina nuna. 11 Nuadui wika dekas Israel aents aidau yaakat Dagnum nagkamnas yaakat Beershebanmaya aatus suntag shiig kuashat nayantsa kamatkaji dekapamainchauwa iman batsata nunú ipaam ijumjata. Dutikam nunú ame yajuakam dekas wejita tumainaitjame. 12 Dutika amina apash tuwig pujawa nunú jeteka, yumi sajatuk kakegama numamtuk pachiachbau utsantua ashí niina aentsji aidaujai ijinami dutikam makichkish iwakuk juwakchati. 13 Tuja David tupikaki tikich yaakat utumainchau peejamunum uumkamtaish, ashí Israel aents aidauti daek yajutka yaakat peejamu anaa japiki entsanum utsaattaji, dutika ajin makichik kaya pujaukesh atsuttawai. Nunikmatai utua amina apa pujau wainka maattaji”, tiuwai.

14 Aatus Husai timatai Absalón ashí Israel aents aidaujai wakejukajui, wagki Ahitófel tibaun nagkaesau pegkeg asamtai. Ahitófel tibaun yapagtuawa nunak Tuke Pujuu tibau asamtai dutikauwai, wagki nuna dutikamtai David Absalógkan depetkati tau asa. 15 Aatus tusa ukuak Ahitófel wajintu Absalógkan ashí Israel aents aidaujai ijumag tine nuna pachis, tuja niish wajintu Absalógnash tine nuna aatus Husai sacerdote Sadokan Abiatarjai ujakui. 16 Dutika ditan chichajak:

“Wamak shiyakjum David ujaktajum, dita batsata nuigkik batsamtsuk nuna ukukiag namak Jordágka amain katiagtinme. Untsu nuna nunichagtaik, Absalón niina suntaji aidaujai amukagtatui”, tiuwai.

17 Tuja Davitan ujakagtinuk Jonatán Ahimaasjai yaaktanum wayajin waipakainum tusag, yaaktanum jegattak yumi pukuni jiinin Roguel tutainum nuwi uumak dakamainak batsatu. Nuninai makichik nuwa inak weji ujakui. Dutikam nuna Davitan ujakagtatus jiinag shimuidau. 18 Núnidaun makichik uchi wainak, Absalógkan ujaktatus wejiuwai. Nunitai Jonatán Ahimaasjai waugtusag makichik aents dita waintai yaakat Bahurim tutainum pujujakua nuna jeen jegawajui. Nunikag nuna agájin yumigmat taimunum nuwi egkemawag uumkajui.

19 Nunikagmatai nuna nuwe yumigmat dukutain juki dukuka nuwi trigo akagbaun ukaja, yumigmat taimunak wainmainchau emauwai. Dutikamu asamtai makichkish yumigmatnak wainkachaju ainawai.

20 Nunik chimpijai Absalógka inake aidau nuwi jegawag nunú nuwan iniinak:

“¿Ahimaasash Jonatágjaish tuwi batsatua?” tuidau. Tusa iniam nii ayaak:

Tusa timatai shimutkag egai egainakua wainkachag Jerusalén waketjajui. 21 Nunik waketjamtai Ahimaas Jonatágjai jiinkiag tupikaki shiyakajui Davitan ujakagtatus. Nunik jegawag ujainak:

“Wamak umintsajum Jordágka amain katiagtajum, wagki Ahitófel atumi mantamatatus chichaman Absalógjai umikaje”, tuidau. 22 Tusa ujakajam David niina aentsji aidaujai ashí jiinjag waugtusag Jordágka amain katiajajui. Nunak nunú kashia duwik ashí katiajajui.

23 Tuja Ahitófelak nii tibau umigkacham kajeka niina burrojin entsamak niina jeen yaakat nii akiinamujin weuwai. Nunik jegaa niina patayi aidaujai ashí chichas uminak, suween daekai jigkama jakauwai. Nunik jakamtai niina apaji ukusbaunum ukusajui.

24 Davitak Mahanaim jegau ai, Absalógkak niina suntaji aidaujai pataetuk Jordágkan yama katituidau. 25 Tuja Joab suntaja apuji aajakua nuna yapajia Amasá Joapa ikaa yachi aajakua nuna Absalón adaikauwai. Amasá aajakui Ismael aents Itrá aajakua nuna uchiji, niig Nahasa nawanji Abigail Davitan ikaa umayi aajakua nuwi akiamu aajakui. Abigail aajakui Seruiá umayi Joapan dukuji.

26 Tuja Absalógkak tikich Israel aents aidaujai Galaad nugkanum jegawajui. 27 Nuninai David Mahanaim jegamtai, Nahasa uchiji Sobí Amón nugkanum yaakat Rabánmaya, tuja Amiela uchiji Maquir yaakat Lodebarnumia, nuigtu Barzilai nugka Galaadnum yaakat Roguelimnumia aatus Davita igkug kumpamatatus jintukiajui. 28 Nunik shimuinak David niina aentsji aidaujai susatnun: Jáanch asepatai aidaun, shikika umutai aidaun, ichinak aidaun aatus yajuakajui. Tuja nuigtushkam trigon, cebadan, harinan, trigo duwikbaun, haba aidaun, lenteja aidaun, 29 dapa yumijin, mantequillan, uwijan, nuigtu baka muntsujijai queso najanamun aatus yajuakag David niina aentsji aidaujai yuwati tusa ejetiajui. Nunak dita anentaimas: Uwegshunum mininak pimpiki yapagkiag kitajag mininawai tusag dutikawajui.