“Wika David Jesé uchijiyaitjai,

Israel aents aidau apuji ati tusa Apajuí etegtuau asa,

ajaantusa diyaku chichame antugtai

emauwa nunuwaitjai,

mina apachug Jacob aajakua duka

niina emematujakui.

Wika Israel aents shiig pegkegchin

kantamin asan wakejutaiyaitjai.

2 “Tuke Pujuu Wakani minai pujau asa

chichamtijawai.

Nii tujutbauwa nuna kantamjai.

3 Apajuí Israel aents aidautin

Apajuíjiya nunú chichakmae.

Israel aents aidautin

kuitamjamna nunú chichagtak:

‘Aentsu apuji atinun

Apajuí adaikauwa nunú shiig Apajuín ishamas,

betek pegkegnum takauk,

4 kashikmas etsa jiinak etsantama imatikas

aents aidaun yaigtatui.

Tuja yumi yutug nagkanbaunum etsa jiinak

nugkan shiig sukuam chijichi tsapaama iman atatui.’

5 Apajuík wijai chichaman umikui,

duka atakesh tuke atinai.

Nuadui mina pataag aidauk

ishamtsuk shiig batsamtatui,

tuja ima Apajuíke pujut pegkejan sukagta duka.

6 Untsu aents pegkegchau aidauk

jagkijai betek achimainchau ainawai.

7 Tsuwat aidau numi juki duwi tiwija

jii kegamunum utsaam

esaka megkagama numamtin ainawai.

Dutikamunak ataktu

waketjukiajag juchau ainawai”,