Kareta Paarʉ Nennoko'pʉ
Piri'pai Pon Kon
Ena'
Ekamanin
Kareta Paarʉ Nennoko'pʉ Piri'pai Pon Kon Ena' e'menuka'pʉ wapiyaro' Paarʉ nʉ'mʉ'sa'ka'pʉ Yuro' pon kon nono po, Roman amʉ' nono pʉ'kʉ Ma'sitoniya pon. Iye'menuka'pʉ itekare ekamase'na enno'sa' esi koro'tau pariki'si tau, mɨrɨ awonsi'kɨ ewa'noma pɨ' te'san tʉron kon Kʉri'san pe e'nɨ tʉrawasooi ku'nin nan uya imanenpa a'tai mɨrɨ awonsi'kɨ ennakanin pe enupan nɨto', so'si Piri'pai yawon tau uya isakoropa'pʉ. E'tane si serɨ enno'sa' kareta uya pori' pe e'nɨto' mɨrɨ awonsi'kɨ enu wannɨ yau e'nɨto' enna'pi'nʉnka, Paarʉ rɨ ken uya Sises Kʉrai apurɨto' ipan pe uya enpoika.
Inke pʉra iye'to' wenai serɨ tenno'sen kareta e'menuka'pʉ Piri'pai awon kon Kʉri'san amʉ' pɨ' tepori'mato' ekamanin pe i'se te'to' tʉrepato' ike rʉ'pʉ pɨ' tʉpika'tɨnin pe, pɨ'. Mɨrɨ koro'tau si pori' pe tenu kon yau to' e'to' pe to' usewankama namai' tanporo imanenpanin pe te'sen yau mɨrɨ awonsi'kɨ tʉmɨrɨ'nokon nɨ nɨrɨ usewankamato' yau. To' ekama'po iya ipan pe Sises eseru mɨ pe te'ku'sen pen kasa to' e'to' pe, amʉre' pe mɨrɨ awonsi'kɨ mɨ pe te'ku'sen pe e'nɨto' esi namai' to' esa' pe. To' emiya'pontɨ'pʉ iya to' uko'manto' Kʉrai pokon pe esi Papa uya wakʉ nonkasa' winon pe, to' neporo'pʉ to' uya apurɨto' winɨ, main, Mosi' winon Esuwerʉ amʉ' iwano' awɨrɨ e'nɨ nʉkupʉnʉ winon pen. Pori' pe e'nɨto' mɨrɨ awonsi'kɨ tʉusewankamai' pʉra e'nɨto' Papa nʉtʉrʉ'pʉ kamoro Kʉrai pokon pe tʉuko'mansa' pɨ' imenuka iya.
Serɨ kareta e'ma'kʉi'tɨsa' mɨrɨ pori' pe e'nɨto', enu wannɨ yau e'nɨto', a'samʉtʉ pe tikin nɨ tenai e'nɨto', mɨrɨ awonsi'kɨ sa'man annawɨrɨ rɨ Kʉri'san pe e'nɨ uya apurɨto' mɨrɨ awonsi'kɨ uko'man nɨto' pɨ' iyetʉ'ka. Enpoika iya rɨ nɨrɨ ipan pe Paarʉ uya so'si Piri'pai yawon i'nʉnkato'.
Iyawon Ekamanin
Ekamanin (1:1-11)
Ipoirɨ rɨ Paarʉ pɨ' te'ku'sen (1:12-26)
Kʉrai yau uko'man nɨto' (1:27—2:18)
Temu'ti mɨrɨ awonsi'kɨ E'pa'pʉrotai'tas iwano' ekonekan nɨto' (2:19-30)
Panaman nɨto' eyaton non mɨrɨ awonsi'kɨ ɨsɨ ton namai' (3:1—4:9)
Paarʉ mɨrɨ awonsi'kɨ itonpa ton Piri'pai pon kon (4:10-20)
Iu'matʉ (4:21-23)
1
1 Paarʉ mɨrɨ awonsi'kɨ Temu'ti, Sises Kʉrai poitorʉ ton winɨpaino, Inkupʉ'pʉ 16:12
Tanporo wakʉ ton a'samʉtʉ pe so'si epuru ton mɨrɨ awonsi'kɨ to' pika'tɨnin nan pokon pe te'san Sises Kʉrai yau Piri'pai yau te'san enakan:
2 Wakʉ nonkasa' mɨrɨ awonsi'kɨ tʉusewankamai' pʉra e'nɨto' nesii ɨyenakan kon pe, Papa, ukʉipʉnʉ kon mɨrɨ awonsi'kɨ Itepuru Sises Kʉrai winɨpaino.
Tenki Tato' Mɨrɨ Awonsi'kɨ Ɨpʉreman Nɨto'
3 Tenki tapɨtʉ uya Papa pɨ' ɨyenuminkapɨtʉ uya 'nokon kaisarɨ rɨ. 4 Tanporo ɨpona'nokon ɨpʉrema yau, tɨwɨrɨ rɨ ɨpʉrema pori' pe esii'ma, 5 apʉne pʉra utonpa pe ɨwesi kon wakʉ itekare yau, iye'sara'tɨ'pʉ si'kɨrɨ serɨ pʉ'kʉ pona rɨ, 6 serɨ i'tu uya pɨ' kuru rɨ, kʉrɨ wakʉ tʉrawaso piya'tɨnin nʉ'pʉ ayau'nokon uya ikupʉ iu'matʉ pʉ'kʉ pona, Sises Kʉrai uyepʉ weyu pʉ'kʉ pona.
7 Iye'to' pe rɨ serɨ kasa e'ku'ai' tanporo ɨpɨ'nokon, apʉne pʉra uyewan yau ɨkupʉ uya 'nokon pɨ', ɨ'rɨ pe rɨ esi yau a'sisa' pe mɨrɨ pe pʉra e'wa'kʉtʉ yau mɨrɨ awonsi'kɨ wakʉ itekare meruntɨtanʉkʉ uya yau, tanporo ɨmɨrɨ'nokon uya Papa uya wakʉ nonkasa' eporo upokon pe. 8 Papa uya tanporo ɨmɨrɨ'nokon i'se e'to' ekama mɨrɨ Kʉrai Sises usi'nʉnkato' ike ke.
9 Serɨ serɨ ɨpʉremato': ɨusi'nʉnkato' kon enato' pe miyarɨ rɨ eke pe i'tunin pe mɨrɨ awonsi'kɨ ipan pe ennin pe, 10 mɨrɨ si wakʉ pe te'sen i'tunin pe ɨwesi kon pa, ɨri tato' ipɨ' pe pʉra mɨrɨ awonsi'kɨ esuken Kʉrai weyu pʉ'kʉ pona, 11 ipokena' pe e'nɨto' nepetanʉkʉnʉ ke itarʉ'tɨsa' pe tʉuye'sen Sises Kʉrai poro—eke pe Papa ku'to' mɨrɨ awonsi'kɨ apurɨpɨ'to' pe.
Paarʉ I'sen Uya Miyarɨ Rɨ Wakʉ Itekare Usekama Kupʉ
12 I'tu auya'nokon i'se e'ai', utonpa ton, iye'ku'sa' rʉ'pʉ upɨ' uya miyarɨ rɨ wakʉ itekare usekama ku'sa' man. 13 Mɨrɨ moron nʉ'pʉ pe tensen pe tanporo kopʉna pata'se' erasu ton koro'tawɨrɨ iyenasa' mɨrɨ awonsi'kɨ tanporon kon pona rɨ Kʉrai iwano' pe i'sen yau esi. Inkupʉ'pʉ 28:30 14 Uya'sisa' wenai tu'ke rɨ tonpa ton pe te'san Itepuru yau, epori'mapɨ'sa' tʉusauro'san pe Papa Maimu pɨ' epiyɨ'kena' pe pʉra mɨrɨ awonsi'kɨ enari'mʉra.
15 I'nairɨ rɨ iyesi tʉron kon uya Kʉrai ekareei ekama tɨkɨnta kon pe mɨrɨ awonsi'kɨ tʉusakorota kon pe, e'tane tʉron kon uya ekama wakʉ pe kuru nin iteseru esii'ma. 16 Serɨ pe iwa na'ne' nan uya ikupʉ usi'nʉnkan nɨto' yau, i'tui'ma serɨ ya' e'tʉsa' esi wakʉ itekare wapu pe. 17 Wapiyaro' kon uya itekare ekama'pʉ Kʉrai pɨ' tiwano' kon pe ɨnku'pai te'to' kon i'napai rɨ pʉra rɨ, ekamʉn ne'nin pe upona a'sisa' pe esi koro'tau.* Tʉron nɨ ton serɨ iwa pe imenukasa' yau v. 17 esi v. 16 rawɨrɨ. 18 E'tane, ɨ'rɨ pe ken iyesi? Eke esi mɨrɨ tanporon yau, kasi ye' rɨ eseru wannɨ mɨrɨ pe pʉra i'nairo' yau, Kʉrai ekareei usekamasa'; serɨ wenai nin si pori' pe esi.
Ewai', miyarɨ rɨ epori'man pɨ' esi, 19 i'tu uya wenai ɨwɨpʉremato' kon winɨ mɨrɨ awonsi'kɨ epika'tɨto' esi Sises Kʉrai a'kwarʉ winɨ, serɨ iye'ku'sa' rʉ'pʉ upɨ' esi mɨrɨ upa'kanin pe.† upa'kanin pe; mɨrɨ pe pʉra, upika'tɨnin pe. 20 Enurikʉ serɨ mɨrɨ awonsi'kɨ e'ku'to' esi epiyɨ'to' pe pʉra, e'tane enari'ke' pʉra e'to' serɨ pe siya rɨ Kʉrai namato' pe upun yau, uko'manto' yau mɨrɨ pe pʉra eri'to' yau. 21 Apʉne pʉra urɨ pona, uko'man nɨ pe Kʉrai esi, mɨrɨ awonsi'kɨ eri'nɨ esi eporo pe. 22 Apʉne pʉra uko'mamʉ pe iyesi yau upun yau rɨ, serɨ esi mɨrɨ miyarɨ rɨ epekena' pe e'tʉrawasoma ta e'kwa pe. Mɨrɨ rɨ e'tane, ɨ'rɨ kuru ken si anʉmʉ uya? I'tu uya pʉra rɨ iyesi! 23 Ekaraka serɨ asa'ron a'sanau: emo'kapai rɨ esi mɨrɨ awonsi'kɨ Kʉrai a'kɨrɨ e'to' pe, wakʉ pe kuru rɨ nin; 24 e'tane miyarɨ rɨ ɨiwano' kon pe kuru upun yau e'to' pe iyesi, 25 Si'tuyai' rɨ serɨ, si'tuyai' serɨ yau rɨ e'to' esi tukai' mɨrɨ awonsi'kɨ tanporo aya'kɨrɨ'nokon nɨ esi mɨrɨ ikupʉ kon pa mɨrɨ awonsi'kɨ pori' pe ɨwesi kon pa apurɨto' auya'nokon yau, 26 mɨrɨ kasa si urɨ esi ɨpiyau'nokon kanan uya pori' pe ɨkupʉ kon, Kʉrai Sises yau ɨwe'to' kon anʉ'kato' pe urɨ pɨkɨrɨ.
27 Ɨ'rɨ rɨ e'ku'tane, ɨiwano' kon pe rɨ iye'to' awɨrɨ Kʉrai ekareei yau e'tɨ'. Mɨrɨ a'tai, uyepʉ ɨyense'na'nokon, mɨrɨ pe pʉra eta uya rɨken ɨpɨ'nokon, urɨ pʉra rɨ iye'tane i'tu uya rɨ mɨrɨ, ɨye'soto'kasa' kon pana' pe tikin nɨ iya'kwarʉ tikin nan ka'pon pe itekare apurɨto' pɨ', 28 tenari'nʉnse pʉra ɨ'rɨ pɨ' rɨ ɨyewa'nomanin kon nʉkupʉnʉ pɨ'. Serɨ esi mɨrɨ to' uya ento' ipɨ', to' uma'ta ekamanin, ɨmɨrɨ'nokon nin si epika'tɨ tane, Papa winɨ. 29 Ɨyena'nokon iye'tʉsa' pɨ', Kʉrai iwano' pe apurɨ kon pa rɨken pen, e'tane ɨyekota'mato' kon pe rɨ iyesi itiwano' pe, 30 mɨrɨ awɨrɨ rɨ sa'ne ɨutɨ kon esi mɨrɨ e'suranman pɨ' uyenta'tʉine' awɨrɨ rɨ, mɨrɨ awonsi'kɨ serɨ pe eta auya'nokon urɨ rɨ esi e'suranman pɨ'. Inkupʉ'pʉ 16:19-40