Nijinanaj aja ojibiama8agani8i8ag ka teb8etamo8adj
Tesalonika odenakag
Enadjimomagag oo mazinaigan
Apitc Pon nitam ka ojibiama8apanin ka teb8etamindjin 8edi Tesalonika (Thessalonique) odenag, ogi kitci min8endamiagoban apitc kagi odisigondjin ii ojibiigani. Nanage dac ii, mina8adj ogi koki ki8ebiama8an. Ki nodageban mega eckam eckam e ani sogi teb8etaminipanin, anic dac eckam e ani nanekadjiagani8inipanin e teb8etamindjin.
O8i ojibiama8abanin acitc kidji pekadjiadjin ini8e anodj ka initaminipanin okikinoamage8in, apitc ka mikodag ii kijigoni apitc ke koki tag8icinindjin ka Tibendjigendjin. Onada8eniman kidji nisidotamindjin teb8e kitci kaiezigotc kidji koki tag8icinindjin ka Tibendjigendjin, ka8in sa dac 8in mamakadj maia nogom. Panima nandam kegonan kada iji8ebanon ab8amaci kidji tag8icig.
Nandam dac ka teb8etamo8adj anodj ki initamo8agoban ii kikinoamage8ini, midac anodj ka iji ani ijitcige8adj adi eji pimadizi8apan. Nandam ikidobanig aja egi koki tag8icinindjin ka Tibendjigendjin. Kodagiag dac 8in ka8in 8i mikimosibanig osa mega inendamobanig maia nogom kidji ponaki8anigobanen, panima dac ka mikimondjin a8iagon opimadjiigo8agoban.
Pon dac ogi kadjinija8an ooma odojibiiganikag kidji sogigaba8indjin oteb8etamo8ini8akag, acitc kiabadj kidji mino ijitcigendjin, misa8adj e kitci madjisendjin acitc e kitci kodagitondjin. Ogi inan panima kidji mikimondjin, tabickotc Pon acitc o8idji8aganan ka 8idji mikimomigodjin kagi todamo8agobanen 8edi Tesalonika odenag e paba tibadjimo8adj min8adjimo8ini. Ki ikido dac: “Kicpin a8iag ega 8i mikimodj, ka8in kek8an kada 8isinisi” (3.10).
1
Nina8it Pon, Silas acitc Timote (Timothée) ka ojibiamago8eg. Kidanamikagom, kina8a ka teb8etameg, ka ma8adjiidieg kidji aiamieieg 8edi Tesalonika (Thessalonique) odenag, ka tibenimigo8eg Kije Manido Kidadaminan acitc ka Tibeniminak Jesos Christ.
Nipagosenimananag Kije Manido Kidadaminan acitc Jesos Christ ka Tibeniminak kidji ca8enimigo8eg acitc kidji minigo8eg pekadendamo8ini.
Ka Tibeniminak kada pi nda tibakonige
Nidjiki8enanag! Apanigotc nidinendagozimin mig8etc kidji inagidj Kije Manido kina8a odji. Kitci k8aiak ii, osa mega kiteb8etamo8ini8a eckam ani mica, acitc eckam kidani kitci sagiidim pepejig e tacieg. Mi 8edji nta mikomigo8eg apitc ndaodeomagid8a kodagiag ka teb8etamo8adj ka ma8adjiidi8adj kidji icpenima8adjin Kije Manidon, e 8idama8agid8a adi epitci kitci inenimigo8eg. Kikitci sogigaba8im mega kiteb8etamo8ini8akag, acitc ka8in kidana8endjigesim kidji teb8eta8eg Jesos, misa8adj e kitci nanekadjiigo8eg a8iagog acitc e kitci kodagiigo8eg.
Midac iima 8edji kikendag8anig 8e8enda kidji tibakonadjin Kije Manido a8iagon, adi maia enendagozindjin kidji iji tibakonagani8indjin. Eji kodagito8eg mega iidi, kiga odji onakonigom enendagozieg kidji pidigeieg Odogima8i8inikag, mi 8edji taji kodagito8eg nogom. Teb8e Kije Manido k8aiak kada ijitcige. Oga kodagian ini8e ka taji kodagiigo8eg. Kina8a dac nogom ka kodagito8eg, kiga minigom an8ecimo8in, acitc kenina8it niga minigomin. Mi ke ijiseg apitc ka Tibendjigedj Jesos pi nagozidj, 8ak8ig e pi odji najisedj, kigi ka macka8izindjin odajeniman. Nena8idj ka kitci kagan8abigakonenig ickodeni kada pi iji najika. Oga pajacte8an dac ini8e ega ka kikenimandjin Kije Manidon acitc ega ka nosoneamindjin min8adjimo8ini ka odji kikenimagani8idj ka Tibeniminak Jesos. Mi oodi ke iji pajacte8agani8i8adj. Kagige kada nici8anadjiagani8i8ag, ega 8ikad kidji gi 8abama8adjin ka Tibendjigendjin, acitc ega 8ikad kidji 8abadamo8adj omacka8izi8ini ka kitci icpendag8anig. 10 Mi ii ke iji8ebag apitc odjitcisenig kidji koki tag8icig ka Tibendjigedj. Ii dac apitc, oga icpenimigon kakina odanicinabeman, acitc oga manadjiigon kakina ini8e ka teb8etagodjin. Kekina8a kiga acidagimigom iima, egi odapinameg ii min8adjimo8in kagi pi tibadjimotago8eg.
11 Midac 8edji apanigotc aiamietamago8eg. Nipagosenimanan dac Kikije Manidominan kidji 8idjiigo8eg kidji mino inadizieg adi kagi iji nd8e8emigo8eg kidji iji pimadizieg. Nipagosenimanan kidji abadjitodj omacka8izi8in kidji 8idjiigo8eg kidji todamegon kakina ini mino kegonan ka 8i ijitcigeieg, acitc kidji kijito8eg ii mikimo8in e teb8eta8eg Kije Manido ka odji ijitaieg. 12 Midac iidi ke odji icpendjigadenig Jesos ka Tibeniminak o8izon, osa e taji inakamigizieg iidi, acitc ke8in Jesos kiga minigo8a kidji icpenimigo8eg a8iagog. Mi ke iji8ebag, egi minigo8eg oca8endjige8ini8a Kikije Manidominan acitc Jesos Christ ka Tibeniminak.