Nijinanaj aja ojibiama8agani8i
Timote
Enadjimomagag oo mazinaigan
Mi nijinanaj Pon e ojibiama8adjin Timoten (Timothée), e 8idama8adjin adi ke todamindjin acitc e sogideecka8adjin omikimo8inikag ka Tibendjigendjin odji. Odinan ega kidji ana8endjigendjin, tiegodj kiabadj kidji paba mikomandjin Jesosan. Odinan ega kidji poni teb8etamindjin kakina adi eji kikendamindjin Kije Manidon Omazinaigani acitc omin8adjimo8ini. Inendagozi kidji kikinoamagedj acitc kidji kagik8edj 8e8enda, misa8adj e odji kodagitodj ii e ijitadj, acitc misa8adj kodagian ega e iji nda8enimigodjin.
Okitci sogi 8idama8an ega kidji acidjinondjin ka kitci aianodj ikidonani8anig. Ceck8at mega ii kidji todag a8iag, acitc mi ke odji pakebinagani8indjin ka teb8etamindjin.
Pon ogi inan Timoten kidji kagikina8abamigodjin, adi 8in enadizidj, adi eji apacenimodj Kije Manidokag, adi eji nokideedj, adi eji sagii8edj, acitc adi eji cacibendag meg8adj e kodagitodj.
1
1 Nin Pon ka ojibiaman. Kije Manido nigi onabamig Jesos Christ Odanodaganan kidji inagimigo8an. Nigi anonigo kidji paba mikodaman pimadizi8in, Kije Manido kagi ikidodj kidji minadjin ini8e Jesos Christikag ka iji tibendagozindjin.
2 Kin Timote (Timothée) kidojibiamon, mi maia nig8izis ka kitci sagiag eneniminan.
Nipagosenimag Kije Manido Kidadaminan acitc Jesos Christ ka Tibeniminak kidji ca8enimik8a, kidji kidimagenimik8a, acitc kidji minik8a opekadendamo8ini8a.
Pon osogideecka8an Timoten
3 Mig8etc nidina Kije Manido, ka anokita8ag tabickotc 8eckadj nikitci anicinabembanig kagi iji anokita8a8agobanen, e kikendaman mino kegon eta e todaman. Apanigotc taso kajik acitc taso tibik mig8etc nidina, e mik8eniminan nidaiamie8inikag. 4 Kimika8enimin e ma8iaban ka naganidiakoban, acitc nikitci nda8endan mina8adj kidji 8abaminan, kidji gi odji kitci modjigendaman nin. 5 Nimika8inan maia e teb8eta8adj Jesos. Nitam kikitci mamam Lois ogi teb8eta8an, mina8adj dac kidjodjom Ionis (Eunice). Kekin dac aja Timote, niketcinamendan e sogi teb8etaman.
6 Mi 8edji 8idamonan apanigotc kidji abadjito8an ii ca8endjige8ini Kije Manido ka minik apitc ka samictig8aneninan e aiamietamaonan. 7 Ka8in mega Kije Manido kidodji minigosinan Mino Manidon kidji cag8enimo8ak, tiegodj kidji macka8iziak, acitc kidji sagii8eiak, acitc kidji nagadjiidizo8ak enakamigiziak.
8 Ka8in dac agadjiken kidji mikomadj ka Tibeniminak kek8an nin kidji mikomijian, misa8adj kibaodimigi8amikag e teian nin egi anokita8ag. Tiegodj, eco8in kidji kodagito8an kekin min8adjimo8in odji, e apacenimo8agean Kije Manido omacka8izi8in kagi minigo8an. 9 Kije Manido kigi ag8acimigonan acitc kigi nd8e8emigonan 8inikag kidji iji tibendagoziak. Ka8in sa egi mino inakamigiziak 8edji ki ag8aciminak, tiegodj sa mi ka iji onendag, acitc mi ka iji ca8eniminak, 8in ka kitci kije8adizidj. Ab8amaci kijendjigadenig akini, aja kijadj kigi minigonan Kije Manido oca8endjige8in, kina8it Jesos Christikag ka iji tibendagoziak. 10 Midac aja kigi 8abadaigonan oca8endjige8in, egi tag8icig ka Ag8aciminak Jesos Christ. Jesos mega ogi cagodjiton nibo8ini acitc kigi 8abadaigonan kidji kagige pimadiziak kicpin teb8etam8aiak min8adjimo8ini.
11 Kije Manido nigi onabamig Jesos Odanodaganan kidji inagimigo8an, kidji tibadjimo8an oo8e min8adjimo8in acitc kidji kikinoamageian. 12 Mi 8edji kodagito8an ooma kibaodimigi8amikag. Misa8adj dac, ka8in nidagadjisi. Jesos mega nikikenima, acitc 8inikag nidiji apacenimonan. Niketcinamendan dac 8e8enda kidji kana8endag ii min8adjimo8ini kagi anonijidj kidji tibadjimo8ag pinici kidji koki tag8icig.
13 Kikinoamagen ii pejig8an tibadjimo8in ka teb8emagag kagi iji kikinoamaonan, acitc teb8etan kiabadj, acitc sagii8en, tabickotc Jesos Christ ka iji minadjin kidji todamindjin ini8e 8inikag ka iji tibendagozindjin. 14 Kana8endan ii min8adjimo8in Kije Manido kagi anonik kidji paba tibadjimo8adj, e 8idjiik Mino Manido ka kigicka8aiak.
15 Kikikendanadok kakina Kije Manido odanicinabeman Eja (Asie) aki ka iji tajikendjin egi naganijindjin, 8a8adj Pijen (Phygèle) acitc Enimojen (Hermogène) ke8ina8a nigi naganigog.
16 Onesiponas (Onésiphore) dac 8in, mojag nigi sogideeckag. Ka8in nigi agadenimigosi egi kibaogo8ag. Nipagosenima dac ka Tibendjigedj kidji kidimagenimadjin kakina ka tajikendjin Onesiponasan omigi8aminikag. 17 Tiegodj, apitc ka tag8icig ooma Rom odenag, nigi kitci nanada 8abamig pinici kidji mikaojidj. 18 Aja kekin kikikendanadok egi kitci 8idokaojidj meg8adj ka teiaban Epes (Ephèse) odenag. Nipagosenima dac ka Tibendjigedj kidji kidimagenimadjin apitc odjitcisenig kidji koki tag8icig.