Pauru Nymerohpyry ropa sero Tesaronikapõkõ Neneryme
Sero pape tymerose Pauru a. Ritonõpo nymenekahpyryme kynexine ynororo imehnõ amorepaneme. Tynymerohpyry sero taropose eya Jezu poetory tõ neneryme, Tesaronikapõkõ neneryme. Pitiko rokẽ pyra etuarimãko toh kynexine tosẽkõme Jezu enetuputyryke tyya xine.
Tynymerohpyryae Ritonõpo omipona exiketõ akorehmary se kynexine tãkye toto ehtohme Jezu maro toytorykõ poko. “Oesẽkõme Jezu enetuputyry poko oya xine onurumekara ehtoko,” ãko eya xine mana. Jezu oepyry ropa poko kapu ae sero nonopõkõ apiakatohme, amorepãko roropa mana.
1
Ynanymerohpyry moro onenerykõme. Ywy ase Pauru. Xira te, Timoteu roropa, enara ymaro mana taro.
Amarokõ Jezu poetoryme Tesaronika po. Ritonõpo poetoryme matose, Kumykõ poetoryme Kuesẽkõ Jezu Kyrixtu enetupuhnanõme oexirykõke.
“Papa, kure rokẽ Tesaronikapõkõ tyripoko. Torẽtyke pyra roropa tyripoko toto,” ãko ynanase Ritonõpo a, Kumykomo a, Kuesẽkõ Jezu Kyrixtu a roropa.
Sero nonopõkõ apiakary poko Kuesẽkõ oepyry ropahtao
Wekyry tomo, ynara kakehpyra ynanase Ritonõpo a opoko xine, “Kure mase Ritonõpo,” kakehpyra ynanase. Tãkye yna exiryke opoko xine. Morara ãko ynanase, Jezu enetuputyry emamyryke okurohtao xine. Imehnõ pyno exĩko matose ipunaka. Morara exiryke opoko xine kure oturũko ynanase Jezu poetory oximõmãkõ netaryme, toanahtose itamurume oya xine exiryke ohtomarykohtao. Yrome onenetupuhkehpyra matose. Oryhmatorỹko pohnõ mã repe. Yrome eanahtõko rokẽ matose.
Omenekatorỹko Ritonõpo mana tuisame oehtohkõme imaro. Aomipona oexirykõke ohtomatorỹko imehnõ mana. Yrome eanahtõko matose. Õseanahtotopõpyrykõ waro imehnõ ahtao, zae Ritonõpo exiry enetupuhnõko mã toto, kuapiakarykõ poko eya. Zae Ritonõpo exiryke ohtomahpõkõ htomãko roropa mana, ohtomatamitukõme. Ohtomakehpotorỹko ropa mana toanahtose oya xine exiryke. Yna roropa htomakehpõko mana. Morara tyrĩko mana Kuesẽkõ Jezu oepyry ropahtao kapu ae tynamoto kapuaõkõ jamihmãkõ maro. Apoto konõto tororokane maro oehnõko mana Ritonõpo waro pyra exiketõ wãnohpotohme. Aomipona pyra exiketõ roropa wãnohpõko mana, ynanekarohpyry Kuesẽkõ Jezu poko totase eya xine exiryke. Yrome onenetupuhpyra toto exiryke toto wãnohpõko Ritonõpo mana. Toto rypyry emetakãme toto pahnõko mana apoto konõto htaka. Etuarimakehpyra mã toto jũme. Kuesẽkõ esaka ytopyra toto jũme. Yrome, “Kure Jezu mana,” kakehpyra ipoetory tõ mana eya. Yrome mokaro onenesaromepyra exĩko mã toto jũme. 10 Jezu tooehse ropa ahtao tosẽkõ eahmãko ipoetory tõ mana. “Imehxo mase,” ãko toto, Jezu enetupuhnanomo, Kuesẽkõ kurã eneryke tyya xine, ynanekarohpyry tonetupuhse eya xine exiryke.
11 Morara exiryke oturukehpyra ynanase opoko xine Ritonõpo netaryme, “Papa, Tesaronikapõkõ kure toexirykõ se mana. Akorehmako toto omũkuru nymyry sã toto ehtohme, oya toahmase toto exiryke opoenõme toto ehtohme. Jezu enetupuhnõko toto. Ijamihtanohko toto ỹme toto ehtohme õmipona. Akorehmako toto imehnõ akorehmatohme roropa Jezu enetuputyry poko,” ãko ynanase. 12 Morara awahtao xine imehnõ ynara ãko, “Kure imehxo Jezu nase,” ãko toto oenerykõke. Jezu roropa ynara ãko kyya xine, “Kure matose,” ãko. Toipe Jezu kure rokẽ typoetory tõ rĩko mana. Isaaro roropa Ritonõpo mana.