João Nymerohpyry ropa sero
Sero pape tymerose João a. Jezu nymenekahpyryme kynexine ynororo typoetory tõ amorepaneme. Tynymerohpyry sero taropose eya tope a, Kaju a.
Tynymerohpyryae ynara ãko mana, “Kure mase imehnõ Jezu poetory takorehmase oya exiryke imehnõ amorepary poko Jezu enetuputyry poko,” ãko mana. Imepỹ poko turuse roropa ynororo, zae pyra exikety poko. “Mokyro Jezu poetory amorepaneme ehxĩpo toeramase ropa tyyrypyry poko ropa toehtohme. Popyra toehse ropa,” ãko mana.
1
1 Ynymerohpyry moro oneneryme, konohno Kaju. Opyno ase ipunaka. Ywy ase João tamuxime exikety.
2 Konohno, opyno jexiryke opoko oturũko ase Ritonõpo a kure rokẽ oehtohme akuakuruhtara oehtohme. Orẽpyra oexiry waro ase, Ritonõpo omipona oexiry, sekese oexiry, enara. 3 Moino Jezu poetory tõ tooehse xiaro. Tokãtose omoro kure. Naeroro tãkye toehse ywy, “Omi kurã omipona Kaju mã rahkene, pake aehtopõpyry saaro,” tykase toto. 4 Toipe ywy, ypoenõ Ritonõpo omipona exiry ekary etaryhtao, tãkye ase. Ypoenõme sã toehse matose ynamorepatyãme oexirykõke.
Kure Kaju ekarotopõpyry
5 Konohno, opyno ase yronymyryme. Orẽpyra erohnõko mase, Jezu poetory tõ akorehmary poko. Katonõme toto ahtao kure toto rĩko ro mase. “Kure Kaju yna riasene,” tykase mokaro, Jezu poetory tomo, amaroino aehtyã xiaro. 6 Morara tykase toto, Jezu poetory oximõmãkõ netaryme taro. Amaroino aytorykõ ropahtao imepỹ pona tymõkomoke pyra toto anaropopyra exiko. Otytyko ekaroko eya xine, nae oehtohtonõ ekaroko eya xine. Morara awahtao kure mase Ritonõpo a, aomipona toto erokuruke, 7 Kyrixtu omiry poko imehnõ amorepase toto ytoryke. Ynara exiryke, Jezu poetory tõ kara tỹkyryry onekaropyra eya xine. 8 Morara exiryke sakorehmatone toto Jezu poetoryme kuexirykõke. Mokaro akorehmaryhtao kyya xine, imaro xine sã imehnõ amorepãko sytatose Kyrixtu poko. Kyrixtu omiry ajohpe pyra mana.
Tioterepe, Temetyrio
9 Pape meroase inunõkara Jezu poetory tõ neneryme. Mahxo Tioterepe toto esẽme toexiry se mana. Ynymerohpyry se hkopyra mana. 10 Jytoryhtao oya xine ourutorỹko ase ipoko. Eya tykerekeremase yna itamurume, ixihpyryme ipunaka. Ajoajohpe rokẽ mana. Emero ro mana Jezu poetory tõ onynyhmapopyra mana tytapyĩ tao. Imehnomo a toto nyhmaporyhtao, inyhmapohpõkõ zehno exĩko mana. Toto aropory se roropa mana oximõmãkõ htae, Jezu poetory tohtae.
11 Konohno, opyno ase. Naeroro iirypyrymãkõ osypoenohno, kurãkõ rokẽ ipoenohko. Kure imehnõ rinanõ Ritonõpo poetoryme mã toto. Yrome tyyrypyry poko exiketõ Ritonõpo onenetupuhpitopyra mã toto.
12 Imehnõ Temetyrio ekãtõko kure, zae aexiryke. Yna a roropa mã kure, yna omiry ajohpe pyra roropa. Zuaro matose.
Aosekazumatopõpyry
13 Itamurume oururukõ se ase repe, yrome pape merory se hkopyra ase roropa. 14 Okynã pyra jytory se ase oya xine. Moero sytase oturũko, toytose jahtao.
15 “Torẽtyke pyra Kaju tõ tyriko,” ãko ase Ritonõpo a opoko xine. “Sekese rokẽ tyriko toto,” ãko ase opoko xine.
“Kure pãna mano?” kary se oepe tõ mana oya. “Kure pãna matou?” kary se roropa ynanase amarõkomo a, yna epe tomo a emero. Enara rokene.