1 Orutua kynexine esety Mika, ypy tõ nonory pono, Eparaĩ nonory po. 2 Ynara tykase ynororo tyse a:

— Otinerũ 1.100 parata tomatonanohse ahtao, popyra omato tyripose oya aorihtohme. Õmihpyry etase. Etako pahne, moro parata ymaro mana. Ya tapoise omatome.

Ynara tykase jeny eya:

— Kure oripõko ase Ritonõpo a, aimo!

3 Naeroro moro 1.100 parata tokarose ropa eya tyse a. Mame ynara tykase nohpo tumũkuru a:

— Aimo, popyra oripotopõpyry ya korokapotohme, moro parata apiakãko ase ekarotohme ynekaroryme Ritonõpo a. Ritõ panõ ripõko ase wewe risemy, tapuhse parata ke. Morara exiryke moro parata ekarõko ropa ase oya.

4 Mame moro parata tokarose ropa ahtao eya tyse a, 200me parata tapoise nohpo a ekarotohme metau poko erohkety a. Ritõ panõ tyrise eya wewe risemy tyõtose parata ke. Mame moro ineponãmary tyrise Mika tapyĩ taka.

5 Osa nae Mika nexiase Ritonõpo poko ehtohme. Imehnõ ritõ panõ tyrise roropa eya, upo roropa tyrise eya Ritonõpo maro oturukety zupõme. Tumũkuru toiro tymenekase eya Ritonõpo maro oturuketyme ehtohme. 6 Morara ahtao tuisa konõto, Izyraeu tõ esẽ pyra kynexine. Ise toehtohkõ tyrise ahno a emero porehme.

7 Nuasemã kynexine pata Perẽ po, Juta nonory po. Rewi parỹpyryme kynexine. 8 Perẽ poe toytose ynororo imepỹ osa zupiryme, tosaryme ehtohme. Mame aytoryhtao ypy tõ nonory poro Eparaĩ po, toeporehkase ynororo Mika tapyĩ taka.

9 — Oty poe moehno? tykase Mika eya, tõturupose.

— Ywy ase rewita, Perẽ pono, Juta nonory põ pono. Osa zupĩko ase jesaryme ehtohme, tykase ynororo.

10 — Ymaro exiko, tykase Mika. — Jamorepaneme exiko, oturuketyme Ritonõpo maro. Oepehmãko ase 10me parata ekarõko ase oya jeimamyry punero, upo maro te, tonahsẽ maro, enara, tykase eya ynororo.

11 Mame ỹme mokyro nuasemã kynexine, rewitame roropa ynororo. Mika maro toehse ynororo imũkurume sã eya. 12 Tymenekase ynororo Mika a Ritonõpo maro oturuketyme ehtohme. Moroto kynexine ynororo itapyĩ tao. 13 Ynara tykase Mika:

— Zuaro ase. Seromaroro Ritonõpo poe emero kure exĩko ya, rewita nae jexiryke, oturuketyme Ritonõpo a.