92
“Kure mase,” katohme Ritonõpo a
Eremiatopo.
1 Ritonõpo yna Esemy, “Kure mase,” kary oya
kure nase! Kure roropa nase yna eremiary onetaryme Imehxo Exikety,
2 yna pyno oehtoh ekarory pakeimo,
anamonohpyra oehtoh roropa ekarotohme kokonie pukuro,
3 haapa maro eremiãko ynanase oya, 10me toare exiketymã pokona.
4 Ritonõpo, onyrityã ajamitunuru ke
jãkyemãko mana!
Eremiãko ase, atãkyemãko onyrityã poko.
5 Ritonõpo, inunõ konõto onyrityã mana!
Õsenetupuhtoh tonõ tupime enetuputyry ya.
6 Tuaro pyra exikety zuaro pyra mana,
putuhtome exikety sero onenetupuhpyra roropa mana:
7 popyra exiketõ emãnõko ãtarykahmã samo,
azahkuru exiketõ tymõkomoke exĩko roropa, repe,
yrome tonahkasẽme exĩko mã toto.
8 Omoro Ritonõpo tuisa imehxo mase,
emero esẽme mase, jumanatome.
9 Zuaro ynanase, oepetõkara emero orihnõko mã toto, popyra exiketõ emero typoremãkasẽme exĩko mana.
10 Tyjamihtanohse ywy oya pui orutua itu htaõ samo; kure kyriase tãkye jehtoh ke.
11 Jepetõkara poremãkatopõpyry tonese ya,
popyra exiketõ kui kary totase roropa ya.
12 Zae ehtoh poko exiketõ kure exĩko, airiki tõ samo; orẽpyra exĩko mã toto zae ehtoh poko, apupari ahtary samo ypy Ripano po.
13 Wewe sã exĩko mã toto,
arykatyã sã Ritonõpo tapyĩ tao,
ahtãko kure Ritonõpo maro oturutoh zarã po.
14 Tamuhpõme toehse ahtao kure ro exĩko mã toto zae ehtoh poko, eperytaketõ samo, ahtãko ro, jamihme ro.
15 Moro imehnõ enetupuhpõko mana zae Ritonõpo ehtoh poko, Jewomane zae rokẽ mana, azahkuru pyra mã ipunaka.