1 Tyekye kynexine Noemi, esety Poaze. Tymõkomoke kynexine ynororo, tupito tõ esẽme roropa. Oxiekyryme kynexine Erimereke ekepyry maro, Noemi nio.

2 Mame ynara tykase Ruti tymerenotỹpyry a:

— Ytoxi tupito tõ pona otytyko anỹse, nono pona aohpahtyamo. Otarame erohkety enẽko ase omomỹke pyra exikety. Mokyro mykapo ytõko ase sewata puhturu anỹse nono poe.

— Ỹ, ytoko, tykase Noemi, imerenotỹpyry eya.

3 Naeroro toytose Ruti tupito tõ pona. Erohketõ mykapo toytose ynororo, sewata puhturu anỹse nono pona aepukahpyry. Tuaro pyra repe tomõse ynororo Poaze tupi pona, Erimereke ekyrỹpyry tupi pona.

4 Mame okynahtao Poaze tooehse Perẽ poe tutupi enese. Ynara tykase ynororo typoetory tomo a:

— Amaro xine Ritonõpo exiry se ase, tykase.

— Ỹ, amaro Ritonõpo exiry se ynanase roropa, tykase, tozuhse toto eya.

5 Mame ynara tykase Poaze erohketõ erase a:

— Onokyh koh moky nohpo? tykase.

6 — Mokyro Moape pono. Moape poe aepyhpyry Noemi maro, tykase eya. 7 Tokaropose ynororo ya: “Ytoxi erohketõ mykapo otytyko anỹse, ajohpãme sã aohpahtyã rokene,” nykã ya. Pakeimo nerohpitono, erohnõko ro mana, pitiko rokẽ tõseremase tapyi pitiko zopino.

8 Mame ynara tykase Poaze Ruti a:

— Etako ke, orymo. Imehnõ tupi pona ytopyra exiko. Taro rokẽ otytyko ipohko utupi poko erohketõ pũto. 9 Tuaro exiko toto maro oytotohme imepỹ pona toto ytoryhtao otytyko sahkase. Turuse toto ya oerekohmara toto ehtohme. Tuna se awahtao ẽko, ypoetory tõ nanymyhpyry, tykase tuna poko ynororo eya.

10 Tosekumuru po typorohse Ruti tõmyty nono pokoxi, ynara tykase ynororo:

— Oty katohme ypyno mahno, kure rokẽ mase ya katonõme rokẽ jahtao? tykase.

11 Ynara tykase Poaze:

— Turuse ywy onyrihpyry poko omerenotỹpyry a, moino ro onio orihtopõpyry poe. Zuaro ase oekyry tõ tynomose oya, omy tomo, asa maro, ononorykõ roropa xiaro oehtohme osesarise yna maro, yna waro pyra awahtao ro. 12 Kure rokẽ oripory se ase Ritonõpo a onyrihpyry emetakame. Osewomary se mexiase Ritonõpo, Izyraeu tõ Esẽ, maro. Eya oripory se ase kure rokene.

13 Ynara tykase Ruti Poaze a:

— Kure mase ya. Jãkyemãko mase ymaro õtururuhtao opore pyra, opoetoryme sã pyra jahtao.

14 Mame tãxiahtao ynara tykase Poaze Ruti a:

— Osehko xiaro, wyi apoiko eukuru maro, tykase.

Typorohse ynororo erohketõ maro. Sewata puhturu ipuruhpyry tokarose Poaze a eya. Tõtuhse ynororo, epo toehse, akoĩpyry nae ro toehse. 15 Towõse Ruti ahtao toytotohme otytyko anỹse ropa, ynara tykase Poaze typoetory tomo a:

— Ah mose otyro apoino, imykyhpyry tõ rãnao ro, ise tahtao, onerekohmara ehtoko. 16 Toitoine touko otyro imykyhpyry toh tae aohpahtohme nono pokoxi apoitohme eya. Oty kara ehtoko roropa.

17 Tykohmãse Ruti otyro anymyry poko. Typikase ahtao eya 25 kirume exisasaka nae kynexine. 18 Moro sewata tapoise eya, toytose ropa pata pona, tynapoihpyry tonepose tymerenotỹpyry a. Tynapyry akoĩpyry tokarose roropa eya. 19 Mame Noemi tõturupose:

— Aza mytono otyro anỹse seroae? Otoko merohno sero anymyry poko. Mokyro tupito esẽ kure tyripory se ase Ritonõpo a! tykase.

Naeroro toerohtopõpyry poko tõturuse Ruti tymerenotỹpyry a, Poaze poko tõturuse roropa ynororo eya emero.

20 — Kure rokẽ Poaze tyriko, Ritonõpo, tykase Noemi. — Moino ro kure nexiase yna a, aorihtyamo a roropa, enara.

— Mokyro kuekyryme nymyry mana, tykase roropa Noemi. Kypyno exiketyme roropa mana.

21 Mame ynara tykase Ruti:

— Morohne motye turuse ywy eya, jerohzomotoh se mã ynororo typoetory tõ maro, otyro anỹtoh otyhkatoh ponãmero.

22 — Kure ya mã oytory ipoetory tõ maro, tykase Noemi. — Ynara exiryke, toytose awahtao imepỹ tupi pona otyro anymyry poko otarame oerekohmãko imehnõ mana, otarame opoko penetãko toh mana.

23 Morara exiryke toerohse Ruti Poaze poetory tõ maro, otyro anymyry poko, aerohtohkõ etyhpyry pona, sewata te, tiriiku, enara. Tymerenotỹpyry maro ro kynexine ynororo.