1 Yenibɑn biru Nɑkɑsi, Amɔnibɑn sinɑ boko u ɡu. Mɑ win bii u bɑndu kɔsire kuɑ. 2 Mɑ Dɑfidi u nɛɛ, kon Hɑnuni, Nɑkɑsin bii wi tɔn ɡeeru kuɑ. Domi mɛyɑ win tundo u mɑn kuɑ. Yerɑ Dɑfidi u sɔmɔbu ɡɔrɑ bu nùn nukuru yɛmiɑsiɑ win tundon ɡɔɔn sɔ̃. Ye Dɑfidin sɔmɔ be, bɑ turɑ Hɑnuni win mi, Amɔnibɑn temɔ bu kɑ nùn nukuru yɛmiɑsiɑ, 3 yerɑ Amɔnibɑn wiruɡibu bɑ Hɑnuni sɔ̃ɔwɑ bɑ nɛɛ, ɑ tɑmɑɑ Dɑfidi u kɑ wunɛn tundo bɛɛrɛ wɛ̃n sɔ̃nɑ u sɔmɔbu ɡɔrimɑ bu nun nukuru yɛmiɑsiɑ? A ǹ yɛ̃ bu kɑ wuu ɡe bukiɑnɑ bu ɡen sɑriɑ ɡiɑ kpɑ bu ɡu wɔrimɑ bu kɑm koosiɑn sɔ̃nɑ sɔmɔ beni bɑ nɑ wunɛn mi?

4 Yerɑ Hɑnuni u Dɑfidin sɔmɔ be mwɑ u ben tobɑ kɔnɑ mɑ u ben yɑbenu kɑrɑnɑ sɑɑ suunun di sere tɑɑnɔ. Mɑ u bu yɔ̃su bɑ doonɑ. 5 Ye Dɑfidi u nuɑ ye n tɔn be deemɑ mɑ u wɑ bɑ wɑ̃ɑ seku bɑkɑru sɔɔ, yerɑ u ɡɑbu ɡɔrɑ bu kɑ bu yinnɑ kpɑ bu bu sɔ̃ bu ɡinɑ doo bu sinɑ Yerikoɔ sere ben tobɑ ye, yɑ̀ n kpiɑ bu sere wurɑmɑ.

6 Ye Amɔni be, bɑ wɑ mɑ bɑ Dɑfidin mɔru seeyɑwɑ, yerɑ Hɑnuni kɑ Amɔni be, bɑ sii ɡeesun ɡobi nɔrɔbu (1.000) mɔrisiɑ Siriɡibun mi be bɑ wɑ̃ɑ Mɛsopotɑmiɔ kɑ Mɑɑkɑɔ kɑ sere Sobɑɔ bu kɑ bu tɑbu kɛkɛbɑ kɑ mɑɑsɔbu wɛ̃ɛmɑ. 7 Mɑ bɑ bu tɑbu kɛkɛ nɔrɔbun subɑ tɛnɑ kɑ yiru (32.000) wɛ̃ɛmɑ, kɑ mɑɑ Mɑɑkɑn sunɔ kɑ win tɑbu kowobu. Mɑ bɑ nɑ bɑ ben sɑnsɑni ɡirɑ Mɛdebɑɔ. Mɑ Amɔnibɑ bɑ mɑɑ yɑrimɑ ben wusun di bɑ mɛnnɑ kɑ tɑbun sɔɔru.

8 Ye Dɑfidi u nuɑ mɛ, yerɑ u bu Yoɑbu kɑ win tɑbu kowo dɑmɡibu sure. 9 Mɑ Amɔnibɑ bɑ yɑrimɑ bɑ wɑ̃ɑ wuun duu yerɔ. Sinɑm be bɑ mɑɑ bu somiru nɑ, mɑ bɑ dɑ bɑ yɔ̃rɑ nɛnnɛnkɑ. 10 Mɑ Yoɑbu u deemɑ u koo tɑbu kowɑ biruɔ kɑ wuswɑɑɔ. Mɑ u Isirelibɑn tɑbu kowo dɑmɡibu sɔɔ tɑbu kowo wuuru suɑ u Siriɡibu kpɑre. 11 Mɑ u mɑɑ win wɔnɔ Abisɑi tɑbu kowo be bɑ tie wɛ̃ bu kɑ Amɔnibɑ wɔri. 12 Mɑ u nɛɛ, Siriɡibu bɑ̀ n mɑn kɑmiɑmɔ, ɑ mɑn somiru nɑ. Amɔnibɑ bɑ̀ n mɑɑ nun kɑmiɑmɔ, kon nun somiru nɑ. 13 A de ɑ n wɔruɡɔru mɔ, kpɑ su tɑɑ bi ko kɑ wɔruɡɔru bɛsɛn tɔmbun sɔ̃ kɑ mɑɑ Gusunɔ bɛsɛn Yinnin wusun sɔ̃. Kpɑ Yinni Gusunɔ u ko ye n ko n nùn wɛ̃re.

14 Mɑ Yoɑbu kɑ win tɔmbu bɑ Siriɡibu tɑbu wɔri. Mɑ Siriɡii be, bɑ duki suɑ Yoɑbun wuswɑɑn di. 15 Ye Amɔnibɑ bɑ wɑ mɑ Siriɡibu bɑ duki suɑ, yerɑ ben tii bɑ mɑɑ duki yɑrinɑ Abisɑi, Yoɑbun wɔnɔn wuswɑɑn di bɑ duɑ wuuɔ. Mɑ Yoɑbu u ɡɔsirɑmɑ Yerusɑlɛmuɔ.

16 Ye Siriɡibu bɑ wɑ mɑ Isirelibɑ bɑ bu kɑmiɑwɑ, yerɑ bɑ sɔmɔbu ɡɔrɑ bu Siriɡii be bɑ wɑ̃ɑ dɑɑrun ɡuru ɡiɔ sokumɑ. Sofɑki, Hɑdɑdesɛɛn tɑbu kowobun wiruɡii u bu ɡbiiye. 17 Mɑ bɑ ye Dɑfidi nɔɔsiɑ. Yerɑ u Isirelibɑn tɑbu kowobu kpuro mɛnnɑ, u kɑ bu Yuudɛni tɔburɑ, mɑ bɑ sĩɑ bɑ dɑ Siriɡii ben berɑ ɡiɑ bɑ bu tɑbu wɔri bɑ kɑmiɑ. Mɑ Siriɡii be, bɑ duki suɑ Isirelibɑn wuswɑɑn di. 18 Dɑfidi u ben tɑbu kɛkɛ be dumi ɡɑwe nɔrɔbun subɑ nɔɔbɑ yiru (7.000) kɔsukɑ kɑ be bɑ wɑ̃ɑ be sɔɔ, kɑ nɑɑnɑɑkobu nɔrɔbun subɑ weeru (40.000), kɑ sere mɑɑ ben tɑbu sunɔ Sofɑki.

19 Ye Hɑdɑdesɛɛn sɔm kowobu bɑ wɑ mɑ Isirelibɑ bɑ bu kɑmiɑwɑ, yerɑ bɑ kɑ Dɑfidi nɔɔ tiɑ kuɑ bɑ nùn tii wɛ̃. Sɑɑ dɔmɑ ten di, Siriɡibu bɑ ku rɑ mɑɑ kɑ̃ bu Amɔnibɑ somiru dɑ.