TIRE GBIIKII TE PƆLU
U TƐSALONIKAGIBU KUA
Sɑnɑm mɛ Pɔlu u tire te yoruɑ, Tɛsɑlonikɑ yɑ sɑ̃ɑwɑ berɑ ye bɑ mɔ̀ Mɑsedɔnin wuu mɑro ɡe Romuɡibu bɑ mɔ. Gisɔ Tɛsɑlonikɑ ye, yɑ sɑ̃ɑwɑ Gɛrɛkibɑn wuu mɑro yiruse sɔ̃ɔ yɛ̃sɑn nɔm ɡeuɔ. Miyɑ ɡoo nimkusu su rɑ yɔ̃re. Pɔluwɑ u kɑ Lɑbɑɑri ɡeɑ dɑ mi, Gɔrobun Kookoosu 17:10-11. Amɛn biru Yuubɑ bɑ nisinu seewɑ ye bɑ wɑ tɔn tukobu bɑ nɑɑnɛ dokemɔ. Yen wɑhɑlɑ yɑ derɑ Pɔlu u doonɑ Tɛsɑlonikɑn di u dɑ Bereɔ. Yen biruwɑ u Tɛsɑlonikɑɡibun lɑbɑɑri nuɑ sɑɑ win bɔ̃ɔ Timɔten min di, yerɑ u tire te yoruɑ u kɑ bu tɑ̃sisiɑ.
Tire ten kpunɑɑ
1. Tɔbiribu, wiru 1:1.
2. Siɑrɑbu, wiru 1:2-10.
3. Pɔlun sɔmburu Tɛsɑlonikɑɔ, wiru 2:1n di sere wiru 3:13.
4. Kirɔbɑ, wiru 4:1-12.
5. Yesun wurɑmɑrun ɡɑri, wiru 4:13n di sere wiru 5:11.
6. Tɔbiribu kɑ kirɔ dɑ̃ɑki, wiru 5:12-28.
1
Tɔbiribu
1 Bɛɛ Yesun yiɡbɛruɡibu, bɛɛ be i wɑ̃ɑ Tɛsɑlonikɑɔ, bɛɛ be i sɑ̃ɑ Gusunɔ Bɑɑbɑ kɑ Yinni Yesu Kirisiɡibu, nɛ Pɔlu kɑ Silɑsi kɑ Timɔte sɑ bɛɛ tɔburɑ. Durom kɑ ɑlɑfiɑ yɑ n kɑ bɛɛ wɑ̃ɑ.
Tɛsɑlonikɑɡibun wɑ̃ɑru
kɑ ben nɑɑnɛ dokebu
2 Sɑ rɑ n Gusunɔ siɑrɑmɔ bɛɛ kpuron sɔ̃, sɑ rɑ n mɑɑ bɛɛ yɑɑye bɑɑdommɑ kɑnɑru sɔɔ. 3 Sɑ yɑɑyɑ Gusunɔ bɛsɛn Bɑɑbɑn wuswɑɑɔ nɡe mɛ i kɑ bɛɛn nɑɑnɛ dokebu hɑniɑ mɔ̀, kɑ nɡe mɛ bɛɛn kĩrɑ sɔ̃ɔsirɑmɔ bɛɛn sɔm dɑmɡinu sɔɔ, kɑ nɡe mɛ bɛɛn yĩiyɔbu bɛsɛn Yinni Yesu Kirisi sɔɔ bu yɔ̃ dim dim. 4 Bɛsɛɡibu, bɛɛ be Gusunɔ u kĩ, sɑ yɛ̃ mɑ u bɛɛ ɡɔsɑ wiɡibu. 5 Domi bɛsɛn Lɑbɑɑri ɡeɑ yɑ ǹ nɛ bɛɛn mi kɑ ɡɑri tɔnɑ, kɑ mɑɑ yen dɑmɑ yɑ kɑ nɑ kɑ Hunde Dɛɛro sɑnnu kɑ mɑɑ sikɑ sɑriru. Bɛɛn tii i yɛ̃ nɡe mɛ sɑ sĩisinɑ bɛɛn suunu sɔɔ bɛɛn ɑrufɑɑnin sɔ̃. 6 Mɑ i kuɑ be bɑ bɛsɛn dɑɑ kɑ Yinniɡiɑ sɑɑrimɔ, domi i bɛsɛn Lɑbɑɑri ɡeɑ mwɑ kɑ nuku doo bi Hunde Dɛɛro bɛɛ wɛ̃, bɑɑ mɛ yɑ kɑ bɛɛ nɔni swɑ̃ɑru nɑɑwɑ. 7 Yen biru bɛɛn tii i kuɑ bèn dɑɑ Mɑsedɔnin nɑɑnɛ dokeobu kɑ Gɛrɛkibɑ bɑ sɑɑrimɔ. 8 Domi Yinnin ɡɑri yi, yi nɔɔrɑ sɑɑ bɛɛn min di, n ǹ mɔ Mɑsedɔni kɑ Gɛrɛkibɑn tem sɔɔ tɔnɑ, ɑdɑmɑ bɛɛn nɑɑnɛ dokebu Gusunɔ sɔɔ bu sɔ̃ɔsirɑ yɑm kpuro sere n ǹ mɑɑ tilɑsi su bin ɡɑri ɡere. 9 Bɑ ɡerumɔ nɡe mɛ i sun nɛnusinɑ ye sɑ dɑ bɛɛn mi, kɑ nɡe mɛ i ɡɔ̃ru ɡɔsiɑ i bũu sɑ̃ɑru deri i wurɑ Gusunɔn mi i kɑ nùn sɑ̃, wi u sɑ̃ɑ Yinni wɑso kɑ ɡemɡii, 10 kɑ mɑɑ nɡe mɛ i win Bii wi u seeyɑ ɡɔrin di swɑɑ dɑki u nɑ wɔllun di. Wiyɑ Yesu, wi u sun yɑkiɑ sɑɑ Gusunɔn mɔru ye yɑ sisin di.