TIRERU YIRUSE TE PƆLU
U TƐSALONIKAGIBU KUA
Pɔlu u Tɛsɑlonikɑɡibu tireru yiruse teni yoruɑ domi u nuɑ mɑ ɡɑbɑ burisinɛ ben suunu sɔɔ Yesun wurɑmɑrun sɔ̃. Gɑbɑ tɑmɑɑ Yesun wurɑmɑ te, tɑ turuku kuɑ. Yerɑ bɑ ben sɔmburu deri. Bɑ ǹ mɑɑ ɡɑru mɔ̀ mɑ mɛro bisibu ɡɑbu bɑ sere bu nɔɔrimɔ. Gɑbɑ mɑɑ burisinɛ yèn sɔ̃ bɑ tɑmɑɑ Yesu u wurɑmɑ kɔ, mɑ u bu deri, mɑ n sɑ̃ɑre nɔni swɑ̃ɑ te bɑ wɑ Yesun sɔ̃ tɑ kuɑ kɑm. Yen sɔ̃nɑ Pɔlu u bu sɔ̃ɔsiru wɛ̃ te tɑ ɡerumɔ mɛ Yesun wurɑmɑru tɑ ko n sɑ̃ɑ. Mɑ u ɡɑru koo sɑri be ɡerusi bu kɑ sɔmburu ko. Mɛyɑ u mɑɑ be bɑ nɔni sɔ̃ɔmɔ dɑm kɑ̃ bu kɑ tɛmɑnɑ. Domi Yesu u koo bɑɑwure siriɑwɑ dee dee u sere nùn win ɑre wɛ̃.
Tire ten kpunɑɑ
1. Tɔbiribu kɑ nuku yɛmiɑsiɑbu, wiru 1.
2. Kɔ̃sɑn kowon kurɑmɑru kɑ Yesun wurɑmɑru, wiru 2:1-12.
3. Kirɔbɑ, wiru 2:13n di sere wiru 3:15.
4. Tɔbiri dɑ̃ɑkibu, wiru 3:16-18.
1
Tɔbiribu
1 Bɛɛ Yesun yiɡbɛruɡibu, bɛɛ be i wɑ̃ɑ Tɛsɑlonikɑɔ bɛɛ be i sɑ̃ɑ Gusunɔ bɛsɛn Bɑɑbɑ kɑ Yinni Yesu Kirisiɡibu bɛsɛ Pɔlu kɑ Silɑsi kɑ Timɔte, sɑ bɛɛ tɔburɑ. 2 Gusunɔ Bɑɑbɑ kɑ Yinni Yesu Kirisi bu bɛɛ durom kuɑ kpɑ bu bɛɛ ɑlɑfiɑ kɛ̃.
Siribu ko n wɑ̃ɑ
Kirisin nɑɑrun tɔ̃ru sɔɔ
3 Bɛsɛɡibu, n weenɛ sɑ n Gusunɔ siɑrɑmɔ sɑɑ bɑɑyere bɛɛn sɔ̃. N wɑ̃ sɑ n mɔ̀ mɛ yèn sɔ̃ bɛɛn nɑɑnɛ dokebu bu sosimɔ ɡem ɡem, mɑ kĩi te i mɔ bɛɛn tii tiinɛ sɔɔ tɑ mɑɑ kpɛ̃ɑmɔ tɑ sosimɔ. 4 Yen sɔ̃nɑ bɛsɛn tii sɑ Yesun yiɡbɛnu woo kɑnɛ bɛɛn sɔ̃, domi i tɛmɑnɑ i yɔ̃ nɑɑnɛ dokebu sɔɔ nɔni swɑ̃ɑru kɑ tɔ̃yɑn sɑɑ.
5 Yeniwɑ yɑ sɔ̃ɔsimɔ kɑm kɑm mɑ Gusunɔ u rɑ siri dee dee, kpɑ bu kɑ bɛɛ ɡɑrisi be bɑ turɑ bɑ n kɑ wɑ̃ɑ mi Gusunɔ u bɑndu swĩi tèn sɔ̃ i wɑhɑlɑ wɑɑmɔ. 6 Domi Gusunɔ u koo ko ye n sɑ̃ɑ dee dee, u koo bu nɔni sɔ̃ be bɑ bɛɛ nɔni sɔ̃ɔmɔ. 7 Mɑ bɛɛ be i nɔni swɑ̃ɑru wɑɑmɔ, u koo bɛɛ wɛ̃rɑbu wɛ̃ kɑ mɑɑ bɛsɛn tii, sɑnɑm mɛ Yinni Yesu koo kurɑmɑ wɔllun di kɑ dɔ̃ɔ yɑri kɑ win ɡɔrɑdo dɑmɡibu. 8 Yesu wiyɑ u koo bu sɛɛyɑsiɑ be bɑ kun Gusunɔ yɛ̃, kɑ be bɑ kun wi, Yinni Yesun Lɑbɑɑri ɡeɑ wure. 9 Ben dii kɔsiɑru tɑ ko n sɑ̃ɑwɑ kɑm koo bi bu kun nɔru mɔ sere kɑ bɑɑdommɑ. Bɑ ko n kɑrɑnɛwɑ kɑ Yinni kɑ mɑɑ win yiiko dɑmɡiɑ, 10 sɑnɑm mɛ u koo nɑ kpɑ win bɛɛrɛ yu sɔ̃ɔsirɑ wiɡibu sɔɔ, kpɑ nɑɑnɛ dokeobu kpuro bɑ n nùn kɑ̃sɑ tɔ̃ɔ te sɔɔ. Bɛɛn tii i ko n mɑɑ wɑ̃ɑ mi, domi i bɛsɛn seedɑ nɑɑnɛ doke ye sɑ di.
11 Yen sɔ̃nɑ sɑ kɑnɑru mɔ̀ bɑɑdommɑ bɛɛn sɔ̃, Gusunɔ bɛsɛn Yinni u kɑ kpĩ u bɛɛn kookoosu siɑrɑ wɑ̃ɑ te u bɛɛ sokuɑ sɔɔ kpɑ win dɑm mu de i ɡeɑ ko ye i ɡɔ̃ru doke kpɑ mu mɑɑ de bɛɛn nɑɑnɛ dokebun kookoosu su n yibɑ. 12 Nɡe mɛyɑ bɛsɛn Yinni Yesun yĩsirɑ koo kɑ bɛɛrɛ wɑ bɛɛn min di, kpɑ bɛɛ i mɑɑ bɛɛrɛ wɑ win min di Gusunɔ kɑ Yinni Yesu Kirisin durom sɑɑbu.