ISIRELIBAN YARIBU YORUN DI
Bɑ tire te sokɑ Yɑribu yèn sɔ̃ terɑ tɑ sun sɔ̃ɔmɔ nɡe mɛ Gusunɔ u kɑ Isirelibɑ yɑrɑ Eɡibitin di mi bɑ yoru dimɔ. N deemɑ ɡɔ̃ɔrɑ tɑ kɑ Isirelibɑ dɑ Eɡibiti mi. Gɔ̃ɔ ten biru, bɑ sinɑ mi, bɑ mɑrurɑ. Adɑmɑ ɑmɛn biru Eɡibitin sunɔ u bu yoru diisiɑ, mɑ Gusunɔ u ben weeweenu nuɑ. Yerɑ u kpɑro ɡoo ɡɔsɑ be sɔɔ, u kɑ bu yɑrɑ yoo ten di. Kpɑro wiyɑ Mɔwisi. Nɔni swɑ̃ɑ dɑbirɑ Yinni Gusunɔ u Eɡibitiɡibu kpɛ̃ɛ bɑ sere wurɑ bɑ Isireli be yɔ̃su. Mɑ bɑ yɑrɑ Eɡibitin min di. Bɑ dɑ bɑ wɑ̃ɑ ɡbɑburɔ. Miyɑ u wure u ɡeruɑ u sire mɑ bɑ ko n sɑ̃ɑ win tɔmbu. Adɑmɑ bɑ nùn mɛm nɔɔ sɑriru koosi nɔn dɑbinu. Sɑnɑm mɛ Mɔwisi u yɔɔwɑ Sinɑin ɡuurɔ Yinni Gusunɔ u nùn woodɑbɑ wɛ̃ kɑ sere mɑɑ win kuu bekuruɡirun kpunɑɑ. Tire ten wii ɡoberu tɑ kɑ kuu bekuruɡii ten sɔmburu yɑ̃.
Tire ten kpunɑɑ
1. Mɔwisin mɑrubu kɑ win sokuru Gusunɔn sɔmburu sɔɔ, wiru 1n di sere wiru 4.
2. Gusunɔ u Isirelibɑ yɑrɑ yorun di, wiru 5n di sere wiru 18.
3. Gusunɔ u kɑ Isirelibɑ ɑrukɑwɑni bɔkuɑ, wiru 19n di sere wiru 31.
4. Isirelibɑ bɑ mɛm nɔɔbu sɑriru kuɑ, wiru 32n di sere wiru 33:6.
5. Gusunɔ u wɑ̃ɑ Isirelibɑn suunu sɔɔ, wiru 33:7n di sere wiru 34.
6. Swɑɑ ye Isirelibɑ bɑ koo swĩi bu kɑ ben torɑnun suuru wɑ, wiru 35n di sere wiru 40.
GUSUNƆ U ISIRELIBA YARA EGIBITIN DI
1
Isirelibɑ bɑ yoru dimɔ Eɡibitiɔ
1 Yɑkɔbu wi bɑ mɑɑ sokumɔ Isireli, win bibun yĩsɑ wee, be bɑ kɑ nùn nɑ Eɡibitiɔ, ben bɑɑwure kɑ win kurɔ kɑ bibu. 2 Beyɑ Rubɛni kɑ Simɛɔ kɑ Lefi kɑ Yudɑ 3 kɑ Isɑkɑri kɑ Sɑbuloni kɑ Bɛnyɑmɛɛ 4 kɑ Dɑnu kɑ Nɛfitɑli kɑ Gɑdi kɑ Asɛɛ. 5 Yɑkɔbun bibu kɑ win debumii ni, bɑ sɑ̃ɑwɑ tɔnu wɑtɑ kɑ wɔkuru. N deemɑ Yosɛfu, wi, u wɑ̃ɑ Eɡibitiɔ sɑnɑm mɛ. 6 Sɑnɑm dɔɔ sɑnɑm wure Yosɛfu kɑ win mɑɑbu kɑ be bɑ wɑ̃ɑ win wɑɑti sɔɔ kpuro bɑ ɡu. 7 Mɑ Isirelin bii be, bɑ mɑrurɑ bɑ dɑbiɑ bɑ tɛriɑ bɑ yibɑ tem mɛ sɔɔ bɑ kuɑ dɑmɡibu.
8 Yen biru sunɔ kpɑo u bɑndu di wi u kun Yosɛfun wɑ̃ɑrun ɡɑri ɡɛɛ yɛ̃. 9 Yerɑ u win tɔmbu sɔ̃ɔwɑ u nɛɛ, Isirelibɑ wee, bɑ sun dɑbiru kere bɑ mɑɑ sun dɑm kere. Ǹ n mɛn nɑ, kɑri bɑkɑ sɑ tii derie. 10 Tɑbu bù n dɑ seewɑ bɑ koo bɛsɛn wɛrɔbu somi bu kɑ sun tɑbu ko. Bɑ̀ n kpɑ bu sere sun kisirɑri bu doonɑ. Yen sɔ̃, i de su bu bwisi ɡɛɛ kɑsuɑ su kɑ ben mɑrubu yɔ̃rɑsiɑ kpɑ bu ku mɑɑ dɑbiru sosi.
11 Mɑ bɑ bu sɔmɑn wiruɡibu ɡɔsiɑ be bɑ koo bu yoo sɔm sɛ̃sɔɡinu koosiɑ. Nɡe mɛyɑ bɑ kuɑ bɑ kɑ wuu mɑrosu bɑnɑ si bɑ sokumɔ Pitomu kɑ Rɑmusɛsi, si su kuɑ Eɡibiti sunɔn dukiɑ beru yenu. 12 Adɑmɑ nɡe mɛ bɑ bu nɔni sɔ̃ɔmɔ, nɡe mɛyɑ bɑ mɑɑ dɑbiɑmɔ bɑ sosimɔ. Mɑ Eɡibitiɡibu bɑ bu tusɑ n bɑndɑ. 13 Mɑ bɑ bu yoo sɔmburu doke. 14 Bɑ birikibɑ murɑmɔ kɑ sɔndu, bɑ mɑɑ ɡbee sɔmɑ bɑɑyere mɔ̀. Mɑ ben wɑ̃ɑrɑ sɛ̃siɑ domi kɑ nuku kɔ̃surɑ bɑ kɑ bu sɔmɑ ye kpuro koosiɑmɔ.
Eɡibiti sunɔ u Isirelibɑ nɔni sɔ̃ɔmɔ
15 Mɑ Eɡibiti sunɔ u Heberubɑn mɑrusio beni, Sifirɑ kɑ Puɑ sɔ̃ɔwɑ u nɛɛ, 16 ì n Heberubɑn kurɔbu mɑrusiɑmɔ, ì n wɑ bii tɔn durɔwɑ bɑ mɑrɑ, i nùn ɡoowo. Ǹ n tɔn kurɔn nɑ, i nùn derio u n wɑ̃ɑ.
17 Adɑmɑ mɑrusio be, bɑ Gusunɔ nɑsie. Yen sɔ̃nɑ bɑ ǹ kue nɡe mɛ sunɔ wi, u bu yiire. Bɑ bii be kpuro deriwɑ. 18 Mɑ u bu sokɑ u nɛɛ, mbɑn sɔ̃nɑ i kɑ kuɑ mɛ, i derɑ bii be, bɑ wɑ̃ɑ.
19 Mɑrusio be, bɑ nùn wisɑ bɑ nɛɛ, Heberubɑn kurɔbu bɑ ǹ sɑ̃ɑ nɡe Eɡibitiɡibu. Ben wɑsi yi sɑ̃u. Bɑ rɑ mɑwɑ su sere tunumɑ.
20-21 Mɑ Gusunɔ u mɑrusio be durom kuɑ u ben tii bibu kɑ̃ yèn sɔ̃ bɑ nùn nɑsie. Mɛyɑ mɑɑ Heberu be, bɑ dɑbiɑmɔ bɑ dɑm sosimɔ. 22 Mɑ Eɡibiti sunɔ u win tɔmbu kpuro woodɑ wɛ̃ u nɛɛ, i Heberubɑn bii wɛ̃ɛ tɔn durɔbu kpuro kpɛ̃ɛyɔ dɑɑ bɑkɑ te bɑ mɔ̀ Nilu sɔɔ, kpɑ i bii wɛ̃ɛ tɔn kurɔbu deri.
Mɔwisin mɑrubu