OSEE
Oseen tire teni, Isirelibɑn bwese kɛri wɔkurɑ tɑ ɡerusimɔ yèn sɔ̃ bɑ kuɑ nɑɑnɛ sɑribɑ Yinni Gusunɔn mi. Osee u tu yoruɑwɑ u kɑ wiɡibu kirɔ ko bu kɑ wɑ bu ɡɔ̃ru ɡɔsiɑ kpɑ bu wurɑ Gusunɔn mi. U sɔ̃ɔsimɔ mɑ Yinni Gusunɔn kĩru tɑ kpɑ̃, tɑ ǹ mɑɑ nɔru mɔ. Tire te, tɑ kĩi te tɑ wɑ̃ɑ Gusunɔ kɑ Isirelibɑn bɑɑ sɔɔ weesinɑmɔwɑ nɡe kĩi te tɑ wɑ̃ɑ durɔ kɑ win kurɔ kɑ ben bibun bɑɑ sɔɔ.
Tire ten kpunɑɑ
1 Oseen kurɔ suɑbu, wiru 1n di sere wiru 3.
2. Osee u Isirelibɑ ɡerusimɔ, wiru 4n di sere wiru 13.
3. U bu kirɔ mɔ̀ bu ɡɔ̃ru ɡɔsiɑ, wiru 14.
1
1 Sɑnɑm mɛ sinɑm beni Osiɑsi kɑ Yotɑmu kɑ Akɑsi kɑ Esekiɑsi bɑ bɑndu di di Yudɑn temɔ, kɑ sɑɑ ye Yeroboɑmu Yoɑsin bii u bɑndu dii Isirelin temɔ, sɑnɑm mɛyɑ Yinni Gusunɔ u kɑ Osee Berin bii ɡɑri kuɑ.
Oseen kurɔ kɑ win bibu
2 Gɑri yi Yinni Gusunɔ u ɡbiɑ u Osee sɔ̃ɔwɑ yi wee. U nɛɛ,
Osee, ɑ doo ɑ kurɔ suɑ wi u rɑ sɑkɑrɑru ko.
Bɛɛn bibu bɑ koo mɑɑ win yirɑ swĩi.
Domi Isirelibɑ bɑ bũnu ɡɑsirimɔ bɑ sɑ̃ɑmɔ
nɡe kurɔ sɑkɑrɑ wi u durɔbu ɡɑsirimɔ.
Mɑ bɑ nɛ, Yinni Gusunɔ deri.
3 Mɑ Osee u seewɑ u Gomɛɛ Dibilɑimun bii suɑ kurɔ. Yerɑ u kɑ nùn mɛnnɑ. Mɑ kurɔ wi, u ɡurɑ suɑ u nùn bii tɔn durɔ mɑruɑ. 4 Mɑ Yinni Gusunɔ u nɛɛ,
i bii wi yĩsiru kɛ̃ɛyɔ Yisirɛɛli.
Domi sɑɑ fiiko sɔɔ kon Yehun yɛnuɡibu wɔri
yèn sɔ̃ bɑ tɔmbun yɛm yɑri Yisirɛɛliɔ,
kpɑ n Isirelibɑn bɑndu kpeerɑsiɑ.
5 Tɔ̃ɔ te sɔɔ, kon Isirelibɑn tɑbu durɔbun tɛnnu bɔɔku Yisirɛɛlin wɔwɑɔ.
6 Yenibɑn biru, Gomɛɛ u mɑɑ ɡurɑ suɑ mɑ u bii tɔn kurɔ mɑrɑ. Mɑ Yinni Gusunɔ u Osee sɔ̃ɔwɑ u nɛɛ,
ɑ nùn yĩsiru kɛ̃ɛyɔ Lo Ruhɑmɑ.
Yen tubusiɑnɑ bii wi bɑ yinɑ.
Domi nɑ ǹ mɑɑ Isirelibɑ wɔnwɔndu kuɑmmɛ.
Nɑ ǹ bu suuru kuɑmmɛ.
7 Adɑmɑ kon Yudɑbɑ wɔnwɔndu kuɑ, kpɑ nɛn tii n bu fɑɑbɑ ko nɛ wi nɑ sɑ̃ɑ Gusunɔ ben Yinni. Adɑmɑ n ǹ mɔ kon kɑ ben yibɛrɛbɑ tɑbu ko. Nɑ ǹ tɛndu dendimɔ ǹ kun mɛ tɑkobi ǹ kun mɛ dumi kɑ yin mɑɑsɔbu.
8 Yenibɑn biru, Gomɛɛ u bii wi bom kɑrɑ. Mɑ u wure u ɡurɑ suɑ u bii tɔn durɔ mɑrɑ. 9 Mɑ Yinni Gusunɔ u nɛɛ,
ɑ nùn yĩsiru kɛ̃ɛyɔ Lo Ami.
Yen tubusiɑnɑ n ǹ nɛn tɔmbu.
Domi i ǹ mɑɑ sɑ̃ɑ nɛn tɔmbu,
nɑ ǹ mɑɑ sɑ̃ɑ bɛɛn Yinni.
Isirelibɑ
bɑ koo wurɑmɑ nɡe yellu