WOMU SI BA GUSUNƆ KUA
Tire teni, ten ɡɑri sɑ̃ɑwɑ womu si bɑ Gusunɔ kuɑ yellun di. Womu sin ɡɑsu su sɑ̃ɑwɑ siɑrɑbu, ɡɑsu kɑnɑru, ɡɑsu bu kɑ torɑrun suuru kɑnɑ, ɡɑsu bu kɑ fɑɑbɑ kɑnɑ Gusunɔn mi, kɔ̃sɑ ɡɑɑ yɑ̀ n bu deemɑ, ɡɑsu mɑɑ nuku sɑnkirɑnun sɔ̃.
Yesun tii u womu sin ɡɑri ɡɛɛ siɑ win sɔ̃ɔsiru sɔɔ. Gisɔ womu si, su kuɑ ɡɑ̃ɑ ɡirinu nɑɑnɛ dokeobun sɑ̃ɑru sɔɔ.
Bɑ womu si bɔnu kuɑwɑ subɑ nɔɔbu. Bɔnu bɑɑyere yɑ domɑrun ɡɑri mɔ yen wii ɡoberɔ.
Tire ten kpunɑɑ
1. Womusun bɔnu ɡbiikɑɑ, womu 1n di sere womu 41.
2. Womusun bɔnu yiruse, womu 42n di sere womu 72.
3. Womusun bɔnu itɑse, womu 73n di sere womu 89.
4. Womusun bɔnu nnɛse, womu 90n di sere womu 106.
5. Womusun bɔnu nɔɔbuse, womu 107n di sere womu 150.
WOMUSUN BƆNU GBIIKAA
1
1 Wi u sɑ̃ɑ doo nɔɔruɡii,
wiyɑ u ku rɑ tɔn kɔ̃sobun ɡɑri nɔ.
Wiyɑ u ku rɑ durumɡibu swĩi.
Wiyɑ u ku rɑ n wɑ̃ɑ kɑ be bɑ Gusunɔ ɑtɑfiiru mɔ̀.
2 Wiyɑ u rɑ n nuku dobu mɔ̀ Gusunɔn ɡɑri sɔɔ sɔ̃ɔ sɔɔ.
Wiyɑ u rɑ n Gusunɔn ɡɑri bwisikumɔ wɔ̃kuru.
Wiyɑ u rɑ n Gusunɔn ɡɑri kĩ sɑɑ kpuro.
3 U sɑ̃ɑ nɡe dɑ̃ɑ te tɑ yɔ̃ dɑɑrɔ.
Ten wurusu rɑ n bekusu sɑ̃ɑwɑ sɑɑ kpuro.
Tɑ rɑ mɑwɑ ten mɑrubun sɑɑ sɔɔ.
Tɔnu wi u sɑ̃ɑ nɡe mɛ,
ye u seewɑ u wɔri kpuro, yɑ rɑ koorewɑ.
4 Adɑmɑ tɔn kɔ̃so kun doo nɔɔru wɑsi.
U ǹ sɑ̃ɑ nɡe dɑ̃ɑ te.
Yɑkɑ ɡbebusɑ u kɑ weenɛ si woo ɡɑ rɑ yɑrinɑsie.
5 U ǹ ɡem wɑsi Gusunɔ ù n nùn siri.
U ǹ mɑɑ kpɛ̃ u n wɑ̃ɑ ɡemɡibun wuurɔ.
6 Domi win swɑɑ dɔɔwɑ kɑm koo yerɔ.
Adɑmɑ Yinni Gusunɔwɑ u ɡemɡibu swɑɑ ɡbiiye.