SOFONI
Sofoni u Yudɑbɑ kɑ Yerusɑlɛmuɡibu sɔ̃ɔmɔ mɑ Gusunɔ u koo bu sɛɛyɑsiɑ. Mɑ u mɑɑ tɔn tukobu kirɔ mɔ̀ be bɑ kɑ bu sikerenɛ u nɛɛ, Yinni Gusunɔn siribun tɔ̃rɑ wee. Tɔ̃ɔ te, nɔni swɑ̃ɑruɡirɑ. Adɑmɑ ɑmɛn biru, Isirelibɑn sukum bɑ koo wurɑmɑ Gusunɔn mi kpɑ bu kpɑm Yerusɑlɛmu seeyɑ.
Tire ten kpunɑɑ
1. Gusunɔ u koo Yudɑbɑ kɑ Yerusɑlɛmuɡibu siri, wiru 1:1n di sere wiru 2:3.
2. Gusunɔ u koo bwese tukunu kpeerɑsiɑ, wiru 2:4-15.
3. Yinni Gusunɔ u koo Yerusɑlɛmu seeyɑ, wiru 3:1-20.
1
1 Gɑri yiniwɑ Yinni Gusunɔ u Sofoni, Kusin bii sɔ̃ɔwɑ Yosiɑsi, Amɔɔn bii, Yudɑbɑn sinɑ bokon bɑndun wɑɑti sɔɔ. Sofoni wi, u sɑ̃ɑwɑ Gedɑliɑn debubu, Amɑriɑn sikɑdobu, Esekiɑsin yɑ̃ɑsebu.
Yinni Gusunɔ
u koo hɑnduniɑ sɛɛyɑsiɑ
2 Yinni Gusunɔ u nɛɛ,
kon kpuro kpeerɑsiɑ hɑnduniɑ sɔɔ.
3 Kon tɔmbu kɑ yɛɛ kɑ ɡunɔsu kɑ swɛ̃ɛ kpeerɑsiɑ
kɑ sere mɑɑ tɔn kɔ̃sobu kɑ ye yɑ rɑ bu sokurɑsie.
Kon tɔmbu kpuro kpeerɑsiɑ hɑnduniɑ sɔɔ.
Nɛ, Yinni Gusunɔwɑ nɑ yeni ɡeruɑ.
Yinni Gusunɔ u koo Yudɑbɑ
kɑ Yerusɑlɛmuɡibu sɛɛyɑsiɑ
4 Yinni Gusunɔ u mɑɑ nɛɛ,
kon Yudɑbɑ kɑ Yerusɑlɛmuɡibu kpuro nɔmɑ doke.
Kon bũu wi bɑ mɔ̀ Bɑɑlin sɑ̃ɑ yee ni nu tie kpeerɑsiɑ min di.
Kon yen wiruɡibu kɑ yen yɑ̃ku kowobun yĩsɑ ɡo.
5 Be bɑ dii tɛɛri wɔllɔ kperi kɑ suru sɑ̃ɑmɔ
kɑ be bɑ bɔ̃rumɔ kɑ nɛ, Yinni Gusunɔn yĩsiru,
mɑ bɑ wure bɑ bɔ̃rumɔ kɑ ben bũun yĩsiru,
be kpurowɑ kon ɡo.
6 Be bɑ mɑn biru kisi kɑ be bɑ ku rɑ mɑn kɑsu,
kɑ sere mɑɑ be bɑ ku rɑ mɑn ben ɡɑri sɑɑwɑrɑ ko,
be kpurowɑ kon ɡo.
7 I nɔɔ mɑrio wi, Yinni Gusunɔn wuswɑɑɔ.
Domi win tɔ̃ru tɑ turuku kuɑ.
U win yɑ̃kuru sɔɔru kuɑ.
U mɑɑ ɡɔsɑ be bɑ koo tu di.
8 Wi, Yinni Gusunɔn yɑ̃ku ten tɔ̃ru sɔɔ,
u koo wiruɡibu kɑ sinɑ bokon bibu wɔri,
kɑ sere mɑɑ be bɑ tɔn tukobun komɑnu swĩi.
9 Yen tɔ̃ɔ te, be bɑ ku rɑ sɑ̃ɑ yerun kɔnnɔ suuku tɑɑrɑm kɑ̃ nɡe bũu sɑ̃ɔbu,
kɑ sere be bɑ ben sunɔn yɛnu dukiɑ yibiɑmɔ
ye bɑ ɡurɑmɑ kɑ ɡbɛnɑ, kɑ dɑm dibu,
be kpurowɑ u koo wɔri.
10 Yen tɔ̃ɔ te, bɑ koo wuri nɔ sere kɔnnɔwɔ ɡe bɑ mɔ̀ Swɛ̃ɛ,
kɑ mɑɑ wuun wɔɔ berɑ ɡɑɑn mi.
Mɛyɑ nɔni swɑ̃ɑ bɑkɑrɑ ko n wɑ̃ɑ ɡuunu wɔllɔ.
11 Bɛɛ Mɑkitɛsiɡibu, i wuri koowo.
Domi tenkubɑ kpuro bɑ koo kɑm ko.
Be bɑ ɡobi kɔsimɔ kpuro bɑ koo kpeerɑ.
12 Yen tɔ̃ɔ te, u koo Yerusɑlɛmu bũuri kɑ fitilɑnu.
U koo tɔmbu wɔrimɑ be bɑ sɔ̃ kpɛtɛɛ nɡe tɑm kɔrɔnu.
Mɑ bɑ ɡerumɔ ben ɡɔ̃ruɔ bɑ mɔ̀,
wi, Yinni Gusunɔ u ǹ ɡeɑ mɔ̀, u ǹ mɑɑ kɔ̃sɑ mɔ̀.
13 Bɑ koo ben ɑrumɑni ɡurɑ kpɑ ben yɛnusu su ko bɑnsu.
Bɑ koo diɑ bɑni yè sɔɔ bɑ ǹ sinɑmɔ.
Bɑ koo resɛm duure, ɑdɑmɑ bɑ ǹ yen tɑm nɔrumɔ.
Yinni Gusunɔn tɔ̃ru
14 Yinni Gusunɔn tɔ̃ɔ nɑnumɡirɑ tɑ turuku kuɑ.
Te wee tɑ wee fuuku, tɑ nɔɔɡiru sue.
Tɑbu durɔ dɑmɡii u koo kuuki ko dɔmɑ te.
15 Tɔ̃ɔ te, tɑ sɑ̃ɑwɑ mɔrun tɔ̃ru.
Tɔ̃ɔ te, tɑ sɑ̃ɑwɑ nuku sɑnkirɑnun tɔ̃ru.
Tɑ sɑ̃ɑwɑ kɑm kobun tɔ̃ru.
Tɔ̃ɔ te, yɑm wɔ̃kurɑ koo tu wukiriwɑ nɡe bukɔ kɑ ɡuru winu.
16 Yen tɔ̃ɔ te, tɑbu kowobu bɑ koo kɔbi so
kpɑ bu kuuki ko bu kɑ wuu si su ɡbɑ̃rɑnu mɔ wɔri.
17 U koo tɔmbu nuku sɑnkirɑnu kpɛ̃ɛ
kpɑ bɑ n sĩimɔ nɡe wɔ̃kobu.
Domi Yinni Gusunɔwɑ bɑ torɑri.
U koo de ben yɛm mu n tɛrie nɡe tuɑ,
kpɑ ben ɡonu nu n sɑ̃ɑ nɡe kubɑnu.
18 Yen dɔmɑ te, ben sii ɡeesu ǹ kun mɛ ben wurɑ,
yen ɡɑɑ kun kpɛ̃ yu bu wɔrɑ Yinni Gusunɔn mɔru bɑkɑ yen min di.
Tem mɛ kpuro mu koo dɔ̃ɔ mwɑɑrɑ win mɔrun sɔ̃.
U koo mɛn tɔmbu kpuro ɡowɑ subɑru sɔɔ.
I tii kɑwo