3
A Jisas Ke Nagho Vano Tagna Moses
1 Ara kulagu kiloau ke vahighamu a God eigna kotida nigna na komi tinoni bali mono duagna i popo, oti togha vanoa a Jisas. Ighita gougovu kati tuturi aua a God ke vetula maia imanea bali tititionoa na haghoregna, mi manea nida na pukuni naghoi pris. 2 God ke vahia a Jisas bali agutu vania, ma na komi agutu a God ke hea, imanea ke eira gougovu. Imanea ke ei tokea nigna na agutu vania a God vaghagna vamua a Moses ke ei tokea nigna na agutu vania a God kori vido ke reireghira nigna na komi tinoni. Imarea hiri vaghagna sina tamadathe. 3 Gi sina tinoni keda agutua na vathe, e boi jino gi katida titionoa vahaihadia na vathe vano tagna imanea ke agutua. Vaghagna iangeni, e jino ighita katida vahaihadia vanoa a Jisas tagna Moses. 4 Ighita gougovu ati adoa na komi vathe gougovu, e mono na tinoni ke agutua. Keana a God ke agutua na komi fata gougovu.
5 E tutuni a Moses ke ei toetokea nigna na agutu koragna na tamadathe nigna a God, keana imanea na tinoni agutu vamua. Ma na nigna na agutu bali titionoa na komi fata a God keda vele aua ivughei valiha. 6 Keana a Krais boi na tinoni agutu, kari a Dathegna God ke vunaghi pungusia nigna na tamadathe a God. Mi manea ke ei toetokea iangeni. Mi ighita na tamadathe nigna God, gi katida boi mataghu na sokara ngasi kori nida na vaututuni, mati vaututunia katida hatia na komi fata a Krais ke taluhaghorea vanighita.
Arahai Kena Boi Vaututuni Teo Kedana Jufu Itagna Na Vido Bali Mamatho
7 Iangeni na vunegna na Tarunga ke Tabu ke velea,
“Ikeagaieni, oti vaovarongo tagna na komi haghoregu,
8 moti saghoi pono na ulumiu vaghagna kena eia ara hutumiu i hau,
kori vido kena sokara pungusiu.
Kori vido iangeni imarea kena mono kori meleha ke gou,
mena eia na komi fata ke dika bali ado aua inau kuda fatera ba teo.
9 Toke imarea kena reghia na komi reghithehe ku eia koragna e rua tutughu na vinogha,
imarea kena pipiliu vaghagna iangeni.
10 Na vunegna kena eia iangeni, inau ku dikatagua itadia mu velea iaani,
‘Imarea kena jefe itagua hahali,
mena bosi nidia na leghuagna na komi haghoregu.’
11 Inau ku dikatagua itadia mu jijighi vaghagna iaani,
‘Imarea teo kedana jufungia na vido bali mamatho ku kaikalitia vanira.’ ”
12 Ara kulagu kiloau, oti reireghi toke ghamu tagna na komi ghaghana ke dika ma na ghaghana ruarua, eigna boi toke kotida jefe tagna a God ke havi. 13 Gi e govu na maghavu koti tangomana na vaovarongo tagna a God, oti veihatheghi leuleghu dani. Oti veihatheghi eigna keda boi pilaunighamu na koakoa me vaponotia na ulumiu moti jefe tagna a God. 14 Kori vido ighita kati kidi vaututunia a Krais, nida na vaututuni ke heta puala. Gi katida talu tatango ngasi kori nida na vaututuni mati ghieghilei jufungia na vagovugna, ighita katida mono haidu thovohaliu duagna a Krais. 15 Keana oti saghoi havaghinia na komi haghore iraani kati rongovia ghohi,
“Ikeagaieni, oti vaovarongo tagna na komi haghoregu,
moti saghoi pono na ulumiu vaghagna kena eia ara hutumiu i hau,
kori vido kena sokara pungusiu.”
16 Ehava? Arahai imarea kena rongovia na haghoregna a God kari ena sokara pungusia? Imarea hiri na komi tinonidia Israel ke batura au a Moses i Ijip. 17 Arahai imarea a God ke dikatagna itadia koragna e rua tutughu na vinogha na? Imarea hiri na komi tinonidia Israel kena koakoa mena hitaghi thehe kilili koragna na meleha ke gou. 18 Ma arahai imarea a God ke titiono vanira me taluhaghorea imarea kedana boi jufungia na vido bali mamatho ke kaikalitia vanira? Imarea hiri na komi tinonidia Israel kena huhughua a God. 19 Mi keagaieni ighita kati reghivaughithatha, na vunegna imarea kena boi vaututunia a God, imanea ke boi lubatira na jufungiagna na vido bali mamatho ke kaikalitia vanira.