Hen nesorat hen anchichay
eHebreo
Nesoratto way sorat hen anchi tawén way 68 no achi 67 ménat way maid nangammu no henon nangensorat. Yag netongpar hen anchichay Judio way cha omafurot an Jesu Cristu ngém gapon chacha mapap-aligatan, chacha engay-an hen afurotcha an Jesus yag magat mamfangadcha hen anchi orchin Moses. Wat emparawag hen antoy sorat an chicha way ah Jesus hen kafud-asan paat hen aminay torachén hen anchichay Judio te hiya paat hen namayang hen egad ya nangatngato agé no hen anchichay anghel ya profeta ya uray ah Moses yah Abraham way pongarcha paat way Judio.
1
Ah Jesu Cristu hen nangempaka-ammu hen alen Apudyus
Juan 1:1-18
1 Ad namenghan, kankanayén way empaka-ammun Apudyus hen alena hen anchichay profetana way maid agé achina enkaman way nangempaka-ammu an chicha ta chicha hen mangimfaga hen anchichay anap-otaaw way Judio. 2 Ngém ad uwan, ah Jesu Cristu way anà Apudyus paat hen nangempaka-ammu an chitaaw hen alen Apudyus way ah Jesu Cristuwanchi, hiya hen anchi nangempafiyangan Apudyus way nangamma hen egachay wacha, ya hiya agé hen nangimpiyarana way mangen-awa hen angamin. 3 Yag hiya agé hen mangil-antaaw hen aminay kaenammay Apudyus way maid mepaniyana te hiya hen kapachongna paat, te hen egachay wacha an Apudyus, wà-acha agéchi an Jesu Cristu. Ya hiya agé hen manetengngel hen angamin gapoh mannakafalin hen alena. Yag angkay narpas hen namayachana hen kacharosan hen fasortaaw way tatagu, namfangad chillu ad uchu way i tummùchu hen pachawanan hen anchi kangatowanay Are way Apudyus way mètoray an hiya.
Nangatngato ah Jesu Cristu no hen anghel
4 Nangatngato ah Jesu Cristu no hen anchichay a-anghel way hen kail-ana, te napatpateg chillu hen ngachanna way inidchat Apudyus an hiya. 5 Te maid imfagfagan Apudyus hen uray heno way anghelna way mangaliyén,
“Ad uwan, hea hen anào te haén hen namfalin ah amam.”
Yag faén agé anghel hen nangaryan Apudyus hen anchi ekatnéén,
“Ad uwan, mamfalinà ah amana yag hiya, mamfalin ah anào.”
6 Yag hen anchi agé tég-angay mangempaliyan Apudyus hen anchi kachachayaw way anàna hen antoy lota, imfagana hen anchichay anghel way mangaliyén,
“Amin-ayu way a-anghel-o, masapor chayawényu hiya.”
7 Waman hen mepanggép hen anchichay a-anghelna, imfagan Apudyus way mangaliyén,
“Hen anchichay a-anghel-o, chichachi hen alepan-o way fafà-arê. Yag ah mangammaancha hen epa-ammà an chichaat mafalin agé mamfalinê chicha ah kaman yawyaw ono apoy.”
8 Waman agé hen anchi anàna, ekat Apudyus an hiyéén,
“Heay Apudyus, ammag maid péppég hen mantorayam ah ing-inggana, ya ammag memènong ya malilimpiyu hen ekamanno way mantoray. 9 Yag achim paat laychén hen laweng te hen anchichay usto ya ammay yanggay hen laychém. Wat gapon hiyachi, haén way Apudyus, emparaylayad-o hea yag empangatò hea ah nangatngato no hen amin anchichay tapenay nan-angato.”
10 Yag wacha agé hen ihay enalen Apudyus hen anchi na-awagan ah anàna, ekatnéén,
“Hen anchi péspés-éyna, heay Apudyus hen anchi nangamma hen antoy lota ya umat agé hen egachay wachad uchu. 11 Yag uray ta mapéppég amin cha nadchi way enammaam ya maumahcha, an-a chillug achi, te mawawà-acha-a ah ing-inggana way maid péppégno. Waman hen anchichay enammaamat umchah hen maropa-ancha way kaman hen maropa-an hen lumfong. 12 Wat annog kaman kopenén cha nadchi ah mamargam ah faru way kaman hen mangopenam hen lumfong. Ngém hea, ammag maid kapargam, te an-ag hihiyya ah ing-inggana way uray ah katawétawénén, ammag maid péppég hen ataguwam.”
13 Ya maid agé imfagan Apudyus ah uray heno way anghelna ah kaman hen anchi imfagana hen anchi anàna way ekatnéén,
“Mìtutùchua an haén hen antoy kachachayaw way pachawanan-o ta an-og epa-afà an hea hen egachay kafusorno ah kaman annog mampapattorawan chicha.”
14 Wat maid kaman ancha nadchi ah enar-alen Apudyus hen uray heno way anghelna, te hen anchichay anghelna, ancha yanggay chan sérfi an Apudyus way kamancha alepanna way fafà-aréna way i tomorong hen anchichay tatagu way napele way mahara-an.