Ho nín-yání vũahṹ na ó o Poole túara nɔn ho
Tesaloniiki
kèrètĩ́ɛwa kuure yi
Vũahṹ túaró ɲúhṹ
Ho vũahṹ mu lé o Poole túara ho á nɔn ho Tesaloniiki kèrètĩ́ɛwa kuure yi. Ho Tesaloniiki mu lé ho Maseduana kɔ̃hṹ ló-beenì. Ɓa kèrètĩ́ɛwa kuure na ho lóhó mu yi lé orɛ́n Poole fárá le. Ɛ̀ɛ ká a màhã́ yí dàńna yí kará bĩ́n yí míana. Lé bìo á ho kàránló na ó o wee na á ɓa *zúifùwa ɓúi yí tà bìo, á ɓa ɲɔn wo (Bè-wénia vũahṹ 17.1-17). Bìo nɔn ó o túararáa ho vũahṹ mu lé ho tonló na ó o sá hũ̀inía yi bĩ́n ó o wi ò o bĩní sĩ̀ ɲii.
Bìo le kuure mu yí fárá yí míana, ká bìo le kèrètĩ́ɛwa wee wé ká mu se ɓúenɓúen ó o ɲá, ó o wee zã̀maka mu bìo yi, á wee hení ɓa sĩa le ɓa bánbá à ɓa kèrètĩ́ɛmu wé va lè ho yahó. O bía ɓa nì-hía vèeró bìo làa ba, làa bìo ó o *Krista à bĩní ì ɓuen á ɓueé fé bìa dó mí sĩa wo yi. O mún bía le ɓa wé sá à yí dí parí.
Ɓa bè-zũńlowà tò mu wán le ho vũahṹ mu lé hìa lé o Poole nín-yání vũahṹ na ó o túara. O túara ho hã lúlúio ɓúará-ɲun làa pírú (50), lè ho ɓúará-ɲun làa pírú làa dà-kéní (51) pã̀ahṹ o Yeesu teró mɔ́n.
1
Mu lé warɛ́n, o Poole, là a Silivɛ̃n là a Timɔtee á wee túa ho vũahṹ na kà á à na minɛ́n Tesaloniiki kèrètĩ́ɛwa kuure yi, minɛ́n na bìo sã̀ a Maá Dónbeenì là a Ɲúhṹso Yeesu *Krista yi. Le le Dónbeenì wé mí sãamu làa mia à na ho hɛ́ɛrà mia.
Bìo ho Tesaloniiki kèrètĩ́ɛwa ɓuan lè míten
Wa wee dé le Dónbeenì bárákà fɛ́ɛɛ mi ɓúenɓúen bìo yi. Wa yí máa khí le Dónbeenì fìoró yi mi bìo yi. Wa wee leéka mi bìo fúuu wàn Maá Dónbeenì yahó. Lé bìo á mi yí dú parí mi sĩadéró le Dónbeenì yi. Le waminì na wi mia lé dén nɔn á mi wee wéráa mu bè-tentewà. Á mi sĩadéró wa Ɲúhṹso Yeesu *Krista yi á mún fárá dĩ̀n. Wàn zàwa lè wàn hĩ́nni, wa zũ mu le le Dónbeenì wa mia á hueekaa à mi bìo sĩ̀ le yi. Wa yí buera le bín-tente yí nɔn mia lè wa ɲiní mí dòn, wa mún wó mu lè le Dónbeenì Hácírí pànká, á mún láa mu yi kɛ̃́nkɛ̃́n le le bín-tente mu bìo lé ho tũ̀iá. Bìo wa ɓuan lè waten mi tĩ́ahṹ à mi bìo wé seráa á mi zũ. Bìo warɛ́n wó á mi bò yi, á mún bò bìo ó o Ɲúhṹso wó yi. Hàrí bìo mi lò wee be làa sòobɛ́ɛ mí cúee, à mi pá tà bò le Dónbeenì bíonì yi lè le sĩ-wɛɛ, dìo le Dónbeenì Hácírí wee na.
Bìo mi wó kà lé bṹn á bìa tà a Krista bìo ho Maseduana lè ho Akayii kãna yi ɓúenɓúen lá ko ɓa wé loń yi à wé. Lé lè minɛ́n cɔ̃́n ó o Ɲúhṹso bíonì dĩ̀n yi á sã ɲánáa ho Maseduana lè ho Akayii yi. Mu yínɔń bṹn mí dòn. Mi Dónbeenì bìo tàró á bɛ̀nbɛ́ra hã lùa ɓúenɓúen, á mu ɓàn bíoró yàá wã́a ɲúhṹ mía wa cɔ̃́n. Ɓa nùpua ɓúenɓúen wee bío bìo mi ɓuan làa wɛn bìo, pã̀ahṹ na wa van mi cɔ̃́n yi. Ɓa mún wee bío bìo mi pã́ hã wɔ̃̀nna à mi tà le Dónbeenì binbirì na wi fɛ́ɛɛ bìo, á nɔn miten le yi 10 á pannáa le Za Yeesu na à lé ho wáayi ì ɓuen, wón na le vèenía. Orɛ́n Yeesu mu lé yìa á à kã̀ní wɛn le Dónbeenì sĩ-cĩ̀ílè cítíi pã̀ahṹ.