I Sulat Di Dad To
Hibru
1
Talù Dwata fagu di Ngàan Dyisas
1 Di munan, dee dulê Dwata talù di dad gutambulto fagu di dad tugadan, na sahal kfagun mimò dun. 2 Bay di fulé du ani, ta talù Dwata di gito fagu di Ngàan. Nimòan i klamang banwe fagu di Ngàan, na nalékan kenen mfun i kdeen. 3 I kdatah Dwata, teen di Ngàan, na too salngad kagkahan di kagkah Dwata, na kenen magot i klamang banwe fagu di too maltulus talùan. Di kafngen malob dad salà i dad to, ta sudeng kenen gsen di kwanan i Dwata ditù di langit.
I Ngà mdatah fa di dad kasaligan
4 Mgimò Dyisas mdatah fa di dad kasaligan i Dwata. Na i dagit blé Dwata di kenen mdatah fa di dagit i dad kasaligan. 5 Du là lmen Dwata man di balù satu kasaligan,
“Ge i Ngàgu, na di mdu ani, ta mgimò agu i Màam.”
Du ise dad kasaligan gugtadè di kmanan ani,
“Do i Màan, na kenen i Ngàgu.”
6 Bay di ta fan kdek Dwata i lo sen Ngàan dini di tah tanà, lêan man,
“Là fakay ku là mangamfù di kenen i kdee dad kasaligan Dwata.”
7 Ani man Dwata gablà di dad kasaliganan,
“Fanbalinggu nus ku demen lifoh i dad kasaligan-gu.”
8 Bay gablà di Ngàan, ani manan,
“E Dwata, landè gusen i Kagotam, na tluh i kebem.
9 Kanbongam nawa i tluh, bay nuteh nawam i sasè.
Taman, i Dwatam malék ge, na banlén ge klehew na afè mdatah fa di dademem.”
10 Na lêan man,
“Ge mimò i klamang banwe di kagatbùan, na lê tnalòam mifil i langit.
11 Mlanas i kdee ayé, bay ge, là mgilih. Salngad ale klaweh salu di gulabin.
12 Lanfìam ale salngad saul, na tanlas ale salngad klaweh.
Bay là mgilih ge kel di landè sen, na landè sen i lawilam.”
13 Là lmen Dwata man di balù satu kasaliganan,
“Sudeng ge dini gsen di kwanan-gu,
dunan i gufdatahta ge, kel di kafkahgu i dad to muteh ge nawa di dungan i falel blìam.”
14 Bay dét kè i dad kasaligan? Dale i dad tulus talbahò di Dwata, du dekan ale tmabeng di dad to fan gamdawat i sikof kagalwà.