Éksodus
I Kafalwà Dwata dad Bel Israél Mdà di Banwe Idyif
Kafaglabat gablà di libru Éksodus
I gumtatek talù Éksodus dunan Lamwà. Di libru ani fadlug di santulen gablà di dad to mgalék Dwata, dunan i dad to Dyu. Santulenan gablà di kalék Dwata ku Mosis, du kenen malak i dad to lamwà di kagfasakla di dad to di Idyif kel di banwe fakang Dwata dale.
Fite Dwata di dad ton too mgal tulusan, mgal fa di ulu di banwe Idyif, fagu di dad tnikeng mgimoan di muna i dad to di Idyif na ulula Faraon, na fagun di kifal i dad to Israél di Fulè Mahin.
Klo i dad to Dyu magu di banwe landè to, blé Dwata di dale dad flaloan, na gakuf di dad flaloan ani dad sfalò flalò. Fadlug fafaldam Dwata dale, fye kamdo ale na mangamfù ale alò di kenen, na mimen i dad flaloan, na fbalingan ale dad to mgafè na mdengeg.
1
I dad bel Israél maflayam di banwe Idyif
1 Ani i dad ngà Dyékob lagi, i magin kenen deme i dad malayla, salu di Idyif, dunan, 2 Rubén, Simyon, Libay, Dyuda, 3 Isakar, Sabulun, Bénhamin, 4 Dan, Néftali, Gad, na Asér. 5 I kdee i dad bel Dyékob i mili di banwe Idyif, mdà di Kanaan, masdagub fitu falò. I tingaan lagi Dyosif muna mnè di Idyif.
6 Kafnge én, tamati Dyosif, na i kdee dad flanekan, na i kdee dad dademela salngad ktua. 7 Kabay i dad bel Dyékob dnagit dad bel Israél, too mbel, na mgimò ale i bong lumbuk i dad to. Na i tanà gumilila déén di Idyif, mbaling too fnò i dad bella.
8 Kafnge én too mlo, nun to mbaling i falami harì di Idyif, bay là kenen gmadè gablà di kafye kimò Dyosif di banwe ani. 9 Na satu duh man harì ani di dad ton, “Neyeyu dad bel Israél ani, alì ale dee. 10 Taman mngabal ito kfagu, fye là fadlug matnù i kdeela, du ken kadang di bang i kasfati, fakuf ale di dad to demeito sduen, na gagin ale samfati gito, na baling ale galwà di banweito ani.”
11 Taman nalékla i dad to labè, du ale mgimò ulu gal magot i dad bel Israél, du mleges dale mimò i blat nimò. Fafdakla dale i lwe syudad dnagit ku Fitom na Rameses, du déén gumusek i dad knaan na i dad knun Faraon, i harì di banwe Idyif. 12 Kabay balù faflayam ale, knean dad bel Israél baling fadlug mbel. Taman kanlikò ale i dad to di Idyif. 13 Na baling lumban fa i kaflayamla dale di blat nimò. 14 Toola ale banlé kaflayam di knèla, fagu di kfimò dale i dad gumnè mdà di tanà sanbool i gambet lami fali, na yéél. Na fimò ale fa i dee dademe nimò di dad nligola. Na toola ale fanlayam, na landè kakdola dale.
15 Na satu duh, fngé harì i lwe libun dnagit ku Sifra na Fua, du gal ale tmabeng i dad libun Hibru, dunan dad libun bel Israél, di ksut dad ngàla. 16 na manan di dale, “Di ktabengyu i dad libun Hibru, di ksut dad ngàla, na ku lagi fnatiyu, na ku libun bayàyu fnati.” 17 Kabay i dad libun ani, gal tmabeng sut tingà, nun klikòla na kafèla Dwata, taman làla nimen dek i harì dale, du làla fnati i dad ngà lagi. 18 Na di kgadè i harì i nimòla, fatlon ale na snalekan, manan, “Kan ku làyu nimen i dekgu gamu, na fnati i dad ngà lagi?”
19 Na tmimel ale ku Faraon, manla, “I dad libun Hibru, là salngad di dad libun Idyif. Hae, du too ale gal mgal na mlal mngà, na di là gami fa kel tasut i tingàla.” 20-21 Taman du i dad libun ani, gal tmabeng sut tingà, too nun klikòla na kafèla Dwata, kamdo Dwata dale na banlén ale dad ngàla. Na i dad bel Israél baling fadlug too mbel na lumban ale too dee.
22 Kafnge én, dek Faraon i dad kdee dad ton, manan, “Batyu ditù di yéél Nilu i kdee dad ngà lagi falami sut di dad Hibru, bay nangyu fakuf i dad ngà libun.”
Én man i harì.