HABAKUKU
Hɑbɑkuku u win sɔmburu kuɑwɑ Yudɑbɑn sinɑ boko Yoyɑkimun wɑɑti sɔɔ. Wi kɑ Yeremiwɑ bɑ sɔmburu kuɑ wɑɑti tiɑ sɔɔ.
Hɑbɑkukun tireru tɑ win biti kɑ win nuku sɑnkirɑnu sɔ̃ɔsimɔ win tɔmbun sɔ̃. Sɑɑ ye sɔɔ, Bɑbilonigibu bɑ Isirelibɑ dɑm dɔremɔ. Mɛyɑ bwese ni nu kɑ bu sikerenɛn tii nu bu kuɑmmɛ. Yerɑ Isirelibɑ bɑ tii bikiɑmɔ bɑ mɔ̀, ɑmɔnɑ ben wɑ̃ɑrɑ ko n sɑ̃ɑ be kɑ Gusunɔ. Mɑ Gusunɔ u bu wisɑ sɑɑ win sɔmɔ Hɑbɑkukun nɔɔn di u nɛɛ, wi u Gusunɔ nɑɑnɛ doke, wiyɑ u koo kpĩ u n wɑ̃ɑ. Wi u mɑrɑ Gusunɔ u nùn yɑkiɑ, wiyɑ u ko n wɑ̃ɑ, wiru 2:4.
Tire ten kpunɑɑ
1. Gɑrin wiru, wiru 1:1.
2. Hɑbɑkuku u kɑ Gusunɔ gɑri mɔ̀, wiru 1:2n di sere wiru 2:20.
3. Hɑbɑkuku u Gusunɔ siɑrɑ, wiru 3.
1
1 Gɑri wee yi Yinni Gusunɔ u win sɔmɔ Hɑbɑkuku sɔ̃ɔwɑ.
Hɑbɑkuku u Yinni Gusunɔ
somiru kɑnɑmɔ
2 Yinni Gusunɔ, sere sɑɑ yerɑ̀ ko nɑ n nun somiru kɑnɑmɔ.
Sere sɑɑ yerɑ̀ kɑɑ n mɑn mɑɑri.
Sere sɑɑ yerɑ̀ kɑɑ de nɑ n nun sɔ̃ɔmɔ
mɑ tɔmbɑ dɑm dɔrenɑmɔ.
Nge sere sɑɑ yerɑ̀ kɑɑ nɑ ɑ sun wɔrɑ.
3 Mbɑn sɔ̃nɑ ɑ derɑ nɑ kɔ̃sɑ mɛɛrɑ.
Mbɑn sɔ̃nɑ kɑɑ n tɔmbu mɛɛrɑ
bɑ n gem birɑnɑmɔ.
Wee, tɔmbɑ dɑm dɔrenɑmɔ
bɑ dɑɑ kɔ̃sɑ mɔ̀ bɑɑmɑ kpuro.
Sɑnnɔsu yibɑ, mɑ tɔmbɑ siribu sokunɑmɔ bɑɑmɑ kpuro.
4 Goo sɑri wi u woodɑ mɛm nɔɔwɑmmɛ.
Bɑ ku rɑ tɔmbu ben gem wɛ̃ nge mɛ n weenɛ.
Tɔn kɔ̃sowɑ u rɑ gemgii siribu di.
Gusunɔ u Hɑbɑkuku wisɑ
u nɛɛ, Bɑbilonigibɑ wee
5 Yinni Gusunɔ u nɛɛ, i bwesenu mɛɛrio i kɑ sikerenɑ.
I de biti yu bɛɛ mwɑ.
Domi kon gɑ̃ɑnu ko bɛɛn nɔni biru
ni i ǹ nɑɑnɛ mɔ̀,
bɑɑ goo ù n bɛɛ nu tusiɑ.
6 Wee, kon Bɑbilonigibu seeyɑmɑ.
Tɔn be, bɑ nuki sum.
Bɑ tem kpuro bukiɑnɑmɔ
bu wɑ bu kɑ bwesenu gɑnun wɑ̃ɑ yenu mwɛɛri.
7 Bɑ nɑnum mɔ ben dɑm sɑɑbu.
Berɑ bɑ rɑ gɔsi ye bɑ kĩ.
8 Ben dumi yi sɑnnɛkunu ǹ kun mɛ gbeeku bɔ̃nu dukɑ kere.
Sɑɑ tontonden diyɑ yi rɑ yɔ̃,
kpɑ yi yibɛrɛ wɔri nge kɑsɑ ye yɑ goo buu wɑ.
9 Be kpurowɑ bɑ wee bu kɑ tɔmbun yɑ̃nu gurɑ.
Bɑ nɔni girɑriwɑ mi bɑ dɔɔ.
Mɑ bɑ yobu mwɛɛrimɔ bɑ mɛnnɑmɔ nge yɑni sɛɛri.
10 Bɑ sinɑmbu gɛmɑ.
Bɑ tem yɛ̃robu yɛ̃ɛmɔ.
Bɑ ǹ wusun gbɑ̃rɑnu gɑrɑ.
Domi bɑ rɑ tem turenu kowɑ bu kɑ gbɑ̃rɑ ni yɔ
kpɑ bu wuu si mwɑ.
11 Yen biru kpɑ bu yɑri min di nge woo gunɑ,
kpɑ bu mɑɑ dɑ bu gɑm wɔri bu kɔ̃sɑ ko.
Ben dɑmɑ bɑ nɑɑnɛ sɑ̃ɑ, mu sɑ̃ɑ nge ben bũu.
Hɑbɑkuku u mɑɑ Gusunɔ soku
12 Sɑɑ yellun di, wunɑ ɑ sɑ̃ɑ Gusunɔ.
Wunɑ ɑ sɑ̃ɑ nɛn Yinni.
A dɛɛre. Yen sɔ̃, sɑ ǹ gbimɔ.
Yinni, wunɑ ɑ sɑ̃ɑ nɛn kpee bɑɑ mi nɑ rɑ kuke.
Wunɑ ɑ Bɑbilonigibu gɔsɑ,
mɑ ɑ bu dɑm kɑ̃ kpɑ bu kɑ sun sɛɛyɑsiɑ.
13 Adɑmɑ ɑ ǹ kpɛ̃ ɑ yɔ̃rɑ ɑ n kɔ̃sɑ mɛɛrɑ,
domi ɑ dɛɛre too.
Ǹ n mɛn nɑ, mbɑn sɔ̃nɑ ɑ mɛɛrɑ ye tɔn kɔ̃sobɑ mɔ̀,
mɑ ɑ ǹ gɑ̃ɑnu gerumɔ.
Mbɑn sɔ̃nɑ ɑ mɑɑri tɔn kɔ̃sobu bɑ gemgibu goomɔ.
14 Mbɑn sɔ̃nɑ ɑ tɔmbu kuɑmmɛ nge swɛ̃ɛ,
ǹ kun mɛ nge kɔkɔ ni nu ǹ kpɑro mɔ.
15 Bɑbilonigibu bɑ tɔmbu mwɛɛrimɔ
nge swɛ̃ɛ yi bɑ mwɑ kɑ kɔkɔnu
ǹ kun mɛ kɑ yɑ̃ɑkoronu,
kpɑ bu bu gurɑ bu kɑ doonɑ kɑ nuku dobu.
16 Yen sɔ̃nɑ bɑ rɑ ben yɑ̃ɑkoronu yɑ̃kunu kue,
kpɑ bu nu turɑre dɔ̃ɔ dokeɑ.
Domi nin sɑɑbuwɑ
bɑ koo kɑ kpĩ bu dĩɑ geenu wɑ
ni nu do bu di.
17 Dommɑ bɑ koo den ben tɑkobibɑ wesiɑ ben kɑrɑnɔ.
Bɑ ko n bwesenu sɑkirimɔwɑ wɔnwɔndu sɑriru sɔɔ sere kɑ bɑɑdommɑɔ?