WOMU GE GA DOBU BO
Kɑ Heberum bɑ tire te sokɑwɑ Womu ge gɑ dobu bo. Kurɔ kɑ durɔn kĩrun gɑriyɑ tɑ mɔ̀.
Yuubɑ bɑ tire ten gɑri weesinɑwɑ kɑ kĩi te Gusunɔ u win tɔmbu Isirelibɑ kĩɑ. Mɑ nɑɑnɛ dokeobu bɑ mɑɑ tu weesinɑ kɑ kĩi te Yesu Kirisi u win yigbɛru kĩɑ.
Tire ten kpunɑɑ
1. Womu 1, wiru 1.1n di sere wiru 2.7.
2. Womu 2, wiru 2.8-17.
3. Womu 3, wiru 3.1n di sere wiru 5.1.
4. Womu 4, wiru 5.2n di sere wiru 6.3.
5. Womu 5, wiru 6.4n di sere wiru 7.11.
6. Womu 6, wiru 7.12n di sere wiru 8.5ɑ.
7. Womu 7, wiru 8.5b-14.
1
Womu ge gɑ dobu bo wee. Sɑlomɔɔwɑ gɑ kɑ yɑ̃.
Kurɔ kɑ durɔn fɑɑgi
Kurɔ u nɛɛ,
ɑ mɑn sɔ̃suo kɑ wunɛn tiin nɔɔ.
Domi wunɛn kĩrun kookoosu su tɑm dobu kere.
Wunɛn wɑni yi nuburu do.
A sɑ̃ɑwɑ nge turɑre ye yɑ pusɑ.
Yen sɔ̃nɑ wɔndiɑbɑ bɑ nun kĩ.
A mɑn tii gɑwemɑ kpɑ su nun nɑɑ swĩi kɑ dukɑ.
A sɑ̃ɑwɑ nɛn sunɔ, ɑ kɑ mɑn doo wunɛn wɑ̃ɑ yerɔ.
Wunɛn sɑɑbuwɑ sɑ nuku dobu mɔ.
Wunɛn kĩru tɑ tɑm dobu kere.
Bɑ gem mɔ be bɑ nun kĩ.
Yerusɑlɛmun wɔndiɑbɑ, i swɑɑ dɑkio i nɔ.
Nɑ tĩri, ɑdɑmɑ nɑ sɑ̃ɑ kurɔ burɔ.
Nɑ tĩri nge Kedɑɑn kuu bekuruginu,
ɑdɑmɑ nɑ wɑ̃wɑ nge beku kɑrenu ni nu wɑ̃ɑ Sɑlomɔɔn sinɑ kpɑɑrɔ.
I ku mɑn gɛm yèn sɔ̃ nɑ tĩri.
Sɔ̃ɔwɑ u mɑn kuɑ mɛ.
Nɛn sesubu bɑ kɑ mɑn mɔru kuɑ.
Bɑ mɑn kuɑ ben reseɛm dɑ̃ɑ gbɑɑrun kɔ̃so.
Adɑmɑ nɑ ǹ nɛn tiigiru kɔ̃su.
A mɑn sɔ̃ɔwɔ nɛn kĩnɑsi mi ɑ rɑ wunɛn sɑbenu kpɑre,
kɑ mi ɑ rɑ de nu sɔ̃ɔ sure.
Kpɑ nɑ kun mɑɑ sirenɛ wunɛn berusebun sɑbenun suunu sɔɔ.
Yɑ̃ɑ kpɑrobɑ nɛɛ,
wunɛ wi ɑ tɔn kurɔbu kpuro burɑm kere,
ɑ̀ kun yɑm mi yɛ̃, ɑ doo ɑ yɑ̃ɑ gɔ̃ɔn yirɑ swĩi.
Kpɑ ɑ wunɛn bonu kpɑrɑ kpɑrobun wɑ̃ɑ yerun bɔkuɔ.
Durɔ u nɛɛ,
nɛn kĩnɑsi, ɑ kɑ dum niɑ weenɛ
ye yɑ Egibitin sunɔn tɑbu kɛkɛ gɑwɑmɔ.
10 Wunɛn burɑ yɑ̃nu nu rɑ de wunɛn bɑɑnu nu mɑn wɛ̃re.
Wunɛn wĩirɑ kɑ goonu wɑ̃.
Yɑ̃ɑ kpɑrobɑ nɛɛ,
11 sɑ ko nun sɑbɑ kuɑ ye yɑ wurɑ kɑ sii geesu mɛnnɛ.
Kurɔ u nɛɛ,
12 sɑnɑm mɛ sinɑ boko u sɔ̃ kɑ wigibu,
nɛn turɑren nuburɑ pusɑ.
13 Nɛn kĩnɑsi u nuburu dowɑ nge turɑre ye bɑ mɔ̀ miru,
ye yɑ sure nɛn tororɔ.
14 Nɛn kĩnɑsi u sɑ̃ɑwɑ nge dɑ̃ɑ wɛ̃ɛ burɑsu.
Su rɑ kpiwɑ resɛm dɑ̃ɑ gbɑɑrɔ Engɛdiɔ.
Durɔ u nɛɛ,
15 nɛn kĩnɑsi, ɑ sɑ̃ɑwɑ kurɔ burɔ.
Wunɛn nɔni yi bɑllimɔ nge wɑɑ bɑkɑgii.
Kurɔ u nɛɛ,
16 nɛn kĩnɑsi, ɑ sɑ̃ɑwɑ durɔ burɔ,
wunɑ ɑ mɑn wɛ̃re.
Bɛsɛn kpin yeru tɑ ko n nɔɔ nɛ nge yɑkɑ bekusu.
17 Dɑ̃ɑ ye bɑ mɔ̀ sɛduru, yerɑ bɑ kɑ bɛsɛn dirun dɑ̃ɑ mwɑɑnɑtiɑ kuɑ.
Mɑ bɑ ten yɑri kuɑ kɑ dɑ̃ɑ ye bɑ mɔ sipɛrɛ.