Luda yã takada kũ Bisã yão TITU 1

TITU

Titu zĩkɛna Kɛrɛti bùsun

1 Makũ Pↄlu, Luda zↄ̀blerii, Yesu Kirisi zĩ̀riin ma ũ. À ma zĩ mà gbɛ̃ kũ Luda ń sɛ́nↄ kara a náanikɛnan mà tó ò a donyĩzɛ yãpura dↄ̃, 2 de ń wɛ́ gↄ̃ dↄ wɛ̃̀ndi kũ àdi lákaroi kũ Luda a lɛ́ sɛ̀ zaade andunia dí kátɛro. Àdi ɛ́kɛ to sↄ̃ro. 3 Akũ yã pìi bò gupuraa a gↄrↄa waazi kũ Luda ó Surabarii dàmɛnɛ ma kɛ gũn lákũ à dìtɛ nà. 4 Makũ mɛ́ ma takada dí kɛ̃̀nnɛ Titu, ma nɛ́ yãpura Yesu zɛ́ kũ ó kú lɛɛlɛ gũn. De Luda kũ Kirisi Yesu ó Surabariio gbɛ̃kɛ kɛnnɛ, à n gba aafiaa.

5 Ma n to Kɛrɛti, de ǹ yã kũ ò gↄ̃̀ gwenↄ gↄ̃gↄ̃, ǹ gbɛ̃ zↄ̃kↄ̃nↄ ditɛ wɛ̃tɛ kũ wɛ̃tɛo lákũ ma ònnɛ nà. 6 À mana gbɛ̃ zↄ̃kↄ̃ gↄ̃ kun taari sari nↄmɛndode ũ. A nɛ́nↄ gↄ̃ ludanaanikɛrinↄ ũ, òsungↄ̃ ń dↄ̃ nɛ́ zãzãde sãgbãnadenↄ ũro. 7 Zaakũ gbɛ̃ zↄ̃kↄ̃ bi Luda zĩgwariimɛ, àsungↄ̃ de taaride ke ĩadãri ke pↄfɛ̃ri ke wɛ̃dɛri ke gbɛ̃ pãsĩ ke ↄgↄvãniwɛtɛri ũro. 8 Séde àgↄ̃ de nibↄkũri ũ, laakaride kũ à zɛ̀ kũ yãmanakɛnaao ũ, gbɛ̃ súsu kũ à kú adona akũsↄ̃ à a zĩda kũna dↄ̃ ũ, 9 gbɛ̃ kũ à zɛ̀ súsu kũ yã náanide kũ òdi dańnɛo ũ, de à le à lɛ́ da gbɛ̃ pãndenↄa kũ yãzɛdedannɛnaa pìio, à gbɛ̃ kũ à bò a yã kpɛnↄ ɛ́kɛ káńnɛ ń ↄĩ.

10 Zaakũ sãyãmarisaride kũ òdi gbɛ̃nↄ likara kũ ń yã'onaaonↄn dasi, atɛ̃nsa gbɛ̃ kũ ò zɛ̀ kũ tↄ̃̀zↄ̃yãonↄ. 11 Òdi ↄn bũnu yaka. À mana ò lɛ́sↄ dańnɛ. Òdi yã kũ à de ò dańnɛro dańnɛ ↄgↄ bɛ̃̀nɛ lena yãi. 12 Kɛrɛti bùsu annabi ke pì, Kɛrɛtinↄ bi ɛ́kɛdenↄmɛ, nↄ̀bↄ pãsĩnↄmɛ, ye'uide pↄ́ke kopirisarinↄmɛ. 13 Yã pì bi yãpuramɛ. Abire yãi ǹ kpãkɛ̃ńyĩ manamana, de ò zɛ́ sɛ́ súsu. 14 Òsun laakari dↄ Yudanↄ garaaro ke gbɛ̃ kũ ò kɛ̃̀ yãpuraa yãditɛnanↄ. 15 Pↄ́ke dìgↄ̃ gbãsĩ gbãsĩsaridenↄnɛro, akũsↄ̃ pↄ́ke dìgↄ̃ gbãsĩsari ludayãdarisari gbãsĩdenↄnɛro, kũ ń laasun kũ ń nɛ̀sɛɛo vãni yãi. 16 Òdi pi ò Luda dↄ̃, akũ ń yãkɛnaa dì ń ɛ́kɛ bo. Bɛgirinↄmɛ, òdi yã maro, òdi fↄ̃ ò yã mana ke kɛro.

TITU
<
1
>