Kálag e
Hibru
Ndibned ń kálag
Mod awě atelé enɛ́n kálag antel chɔ́ âwéd bad bé Krǐsto nlém a abum áyə̄l e metake ḿme bɔ́ doŋge á bad békúdéʼáá adúbe áde béndūbɛ̄ɛ̄ Yesuɛ. Alúmté áte nɛ́n aá melɛ̌ ḿme Yesuɛ ápɛ́ɛ́né métómé melɛ̌ ḿme ménsēbē abɛ́. Alúmté-ʼɛ áte ámpē nɛ́n aá béēhūntē nlém nɛ́n bán Dyǒb déelónédté akag áde ábágé. Á melɛ̌ méʼsō ḿme Dyǒb démwɛ̄ɛ̄ ne ábē bad mbwiined ne Mosɛɛ, beprisɛ bɔ́ɔ bébágéʼáá Dyǒb mendɛ á nló ḿ bad. Boŋ bɔɔb, Yesuɛ mɔ́ adé mod a tîntê a bad ne Dyǒb abɛ́-ʼɛ prisɛ ambáámbáa awe atómé bekal béʼdəə́dəŋ béʼ bɔɔ́d, atóm ángɛl, atóm-mɛ kə́ə́ŋne Mosɛɛ, áyə̄le eche yə̌l chěn chɔ́ɔ âmbɛɛ́ nɛ́ɛ mendɛ, ngen pɔ́g ne ngen ésyə̄ə̄l. Hǒm áde ádíí Átómtɛ́né Asáŋ tómaa hǒm áde beprisɛ béʼ bɔɔ́d bébágéʼáá mendɛ á nló ḿ bad, mendɛ ḿme ábágé-ʼɛ mékwógnédé.
Nkabtéd ń kálag
Krǐstəə mɔ́ alúmté bad ngáne Dyǒb ákóó abɛ́ 1.1-3
Krǐstəə atómé ángɛl 1.4-2.18
Krǐstəə atómé Mosɛɛ bɔ́ Josua 3.1-4.13
Krǐstəə adé prisɛ awě atómé beprisɛ bésyə̄ə̄l á mbyaa ḿme Levi 4.14-7.28
Melɛ̌ ḿme Krǐstəə ńtómé melɛ̌ méʼsō 8.1-9.28
Mendɛ ḿme Krǐstəə ábágé ńtómé mendɛ ḿme beprisɛ bébágéʼáá bɔɔ́d 10.1-39
Adúbe átómé chǒm ésyə̄ə̄l 11.1-12.29
Abɛ́ áde áwógte Dyǒb menyiŋge 13.1-19
Mekáne mé asóg 13.20-21
Melɛntɛn mé asóg 13.22-25
1
Dyǒb áhɔ́bé wɛ́ɛ bad mbwiined ne Mwǎn
1 Seʼ bɔɔ́d, Dyǒb dénhɔ̄b wɛ́ɛ ábɛ̄d betaa, anláá bekal béʼdəə́dəŋ mam âláa bɔ́. Anhɔ́b áwāb ngen ne ngen, ábɛnléd-tɛ menzii híin âhɔ́b áwāb. 2 Boŋ á eʼpun bé asóg hɛ́n, ahɔ́be wɛ́ɛ syánē, álāŋgē awe Mwǎn mam âláa syánē. Wɛ́ɛ ane Mwǎn dɔ́ɔ Dyǒb ápóó boŋ áhəgéʼ nkoŋ ḿ mín ne ń sé. Mɔ́-ʼaá Dyǒb átíídé aá mɔ́ awóó nhəgtéd ńsyə̄ə̄l. 3 Ane mwǎn mɔ́ɔ adé eʼkin-áte bé ehúmé é Dyǒb, mɔ́-ʼaá alûmte syánē ngáne Dyǒb ákóó abɛ́. Adíi melemlem nɛ́ɛ Dyǒb-pɛ ádíí. Ngíne e eyale é nsəl échē ane Mwǎn ebɛlé mekan mésyə̄ə̄l mékag áʼsō ngáne métə́ŋgɛ́né abɛ́. Ahúd áde áhúdé syánē á mbéb-te, abɛlé syánē moosyəə́l desáá. Ámbīd e nɛ̂, andyɛɛ́ Dyǒb á Ngum é ekáá é mbáá ádyōb.
Mwǎn a Dyǒb atómé ángɛl
4 Né-ɔɔ́, Mwǎn a Dyǒb atómé ángɛl. Melemlem nɛ̂ dɔ́ɔ dǐn áde Dyǒb áchə́gé mɔ́ aá, “Mwǎn” átómé dǐn ádāb á “ángɛl.” 5 Dyǒb déēhɔ̄bɛ̄ɛ̄ wɛ́ɛ ángɛl ké pɔ́g mbêd aá,
“Edíi awem Mwǎn,
chii, ndíi sóó.”
Dyǒb déēhɔ̄bēʼaá wɛ́ɛ ángɛl ké pɔ́g aá,
“Mɛ̌bɛ̄ Sáá,
mɔ́-ʼɛ abɛ́ awem Mwǎn.”
6 Boŋ Dyǒb ádɛ̂hɔ́b aá mɔ́lōmeʼ awe Mwǎn aʼsó á nkǒŋsé-te, anhɔ́b ámpē aá,
“Ángɛl échêm ésyə̄ə̄l étə́ŋgɛ́né mɔ́ edúbé abɛ.”
7 Anhɔ́b tə̂ŋgɛne ángɛl pɛn aá,
“Abɛlé éche ángɛl édé nɛ́ɛ epub.
Échê Ángɛl éche édé ábē bembəledɛ,
abɛlé édíi nɛ́ɛ muú ḿme ńchodneʼ.”
8 Boŋ Dyǒb dénhɔ̄b tə̂ŋgɛne Mwǎn aá,
“A-Dyǒb,
wɛɛ́kamlɛ́n á ngíndé ne á ngíndé.
Wɛɛ́kamlɛ́n ábōŋ bad nyaa echě etə́ŋgɛ́né.
9 Edəə́ mam ḿme métə́ŋgɛ́né, ékɔ̄ɔ̄-ʼɛ mam ḿme méeboo.
Né-ʼaá ákə́ə́ boŋ Dyǒb, ádoŋ Dyǒb,
ápwɛ̄d wɛ âbɛ́ etógnɛ́n tómaa baásyə̄ə̄l ábe nyáābɔ̄ɔ nyêdé,
ápwɛ̄d-tɛ wɛ âbɛ́ menyiŋge tómaa baásyə̄ə̄l ábe nyáābɔ̄ɔ nyêdé.”
10 Dyǒb áhɔ́bé ámpē aá,
“A-Sáŋ wɛ-ɛɛ́ ehəgé nkǒŋsé se á mbooted,
nkoŋ ḿ mín-nɛ ndíi abwɔ́g áde éhə́gné échoŋ ekáá.
11 Ábê bwěm éʼsyə̄ə̄l bɛ́pɛ̌ á asóg, boŋ wɛ pɛn wɛɛ́bɛ̄ abɛ́ ne abɛ́.
Ábê bwěm éʼsyə̄ə̄l bɛ́maá ásē nɛ́ɛ mbɔ́té.
12 Wɛɛ́nyəg bɔ́ áte ngáne bényəgɛɛ́ mbɔ́té,
wɛɛ́həŋlɛ́n-nɛ bɔ́ áte ngáne béhəŋlanné mbɔ́té.
Boŋ wɛ pɛn wɛ̌bɛ̄ ebɛ́ melemlem, ádōŋ aloŋgé-ʼɛ déewóŋgé asóg.”
13 Dyǒb déēlāŋgɛ̄ɛ̄ ángɛl ké pɔ́g mbêd aá,
“Dyɛɛ́ mɛ é ekáá émbáá hén
kə́ə́ŋ ne á póndé eche mɛ́bɛnlé
boŋ ékɔgtéd ábōŋ bad bé ekɔyí ámīn ne mekuu.”
14 Cheé-ɔ̄ ángɛl édíí? Édíi eʼdəə́dəŋ ábě éʼbɛnle Dyǒb. Dyǒb álóme-ʼɛ bɔ́ âwóŋgɛn bad ábe bɛ́kǔd eʼsoósoŋ.