1 Isarailinↄ fɛ̀ɛ Ɛlimu ń píngi, ben aↄ̃ kà Sini gbáa kɛ̀ kú Ɛlimu kↄ̃n Sinaio dagura aↄ̃ bↄna Igipiti mↄ plaadee guu gurↄ gɛ̃rodee zĩ. 2 Ben aↄ̃ zↄka kà Musa kↄ̃n Arunaozi gbáan gwe ń píngi 3 aↄ̃ bèńnɛ: Bↄ́yãnzi Dii e wa dɛdɛ Igipitirozi? Gwe weè vɛ̃ɛ wà pↄ́ ble kↄ̃n nↄ̀bↄo ai wà kã, ben a mↄwao gbáan kɛ̀ à wa dɛdɛ kↄ̃n nↄaao.

4 Dii bè Musanɛ: Bↄna musu mɛ́ pↄ́blee fãkɛare. Gbɛ̃nↄ é bↄɛ wà gurↄ doo pↄ́ sɛ́ɛ lán gu e dↄↄ nà ń blena lɛ́n, lɛ mà ń yↄ̃ mà gwa tó aↄ̃ↄ ma doka kũna. 5 Gurↄ swɛɛdodee zĩ gurↄ plaaa pↄ́n aↄ̃é sɛ́ɛ aↄ̃ à pↄ́blee kɛ. 6 Ben Musa kↄ̃n Arunao bèńnɛ ń píngi: Uusiɛa é dↄ̃ kɛ̀ Dii bé à a bↄɛ Igipiti, 7 zia kↄngↄ é Dii gakui e. À zↄka kɛ̀ á kàazii mà. Bↄ́n wa ũ kɛ̀ é gbasa a zↄka kàwazii? 8 Musa ɛ̀ara à bè: Dii é a gba nↄ̀bↄ à só uusiɛa, zia kↄngↄ eé pↄ́blee kpáawa a blena lɛ́n, kɛ̀ à zↄka kɛ̀ á kàazii mà yãnzi. Pↄ́ken wa ũro. Èe kɛ wámbe a zↄka kàwaziro, Diimɛ.

9 Ben Musa bè Arunanɛ: Ǹ o Isarailinↄnɛ ń píngi aↄ̃ sↄ̃ Diizi, zaakɛ à ń zↄkakana mà. 10 Kɛ̀ Aruna e yã oońnɛ, aↄ̃ aɛ dↄ̀ gbáa kpa, ben aↄ̃ↄ è Dii gakui bↄ̀ à mↄ̀ńzi tɛ́luguu guu. 11 Ben Dii yã ò Musanɛ à bè: 12 Ma Isarailinↄ zↄkakana mà. Ǹ ońnɛ uusiɛa aↄ̃é nↄ̀bↄ só, zia kↄngↄ aↄ̃é pↄ́ ble wà kã, aↄ̃é dↄ̃ kɛ̀ mámbe Dii ń Luda ũ.

13 Uusiɛ bùrunↄ mↄ̀ wà dà ń bùrala. Kɛ̀ guu dↄ̀ kpíi kpà à lìgańzi. 14 Kɛ̀ kpíi kɛ̃̀, ben pↄ́ gↄ̃̀ kaɛna tↄↄtɛa púu ketekete lán pↄ́ kokũ bà. 15 Kɛ̀ Isarailinↄↄ è, aↄ̃ bèkↄ̃nɛ: Bↄ́n gwee? Zaakɛ aↄ̃ↄe dↄ̃ tó bↄ́nlo. Musa bèńnɛ: Pↄ́ kɛ̀ Dii kpàawa à bleen gwe. 16 Yã kɛ̀ Dii dìɛareen yɛ̀: A baade sɛ́ɛ a blena lɛ́n. À sɛ́ɛ a baade mìa zaka lɛ́ doodo a uadeenↄ pari lɛ́n. 17 Isarailinↄↄ kɛ̀ lɛ. Aↄ̃ↄ sɛ̀ɛ, gbɛ̃kenↄ pↄ́ bíta, gbɛ̃kenↄ pↄ́ nɛ́ngo. 18 Kɛ̀ wà zaka dàn, gbɛ̃ kɛ̀ sɛ̀ɛ bíta pↄ́ e diziro, gbɛ̃ kɛ̀ sɛ̀ɛ féte pↄ́ e kɛ̃sãaro. 19 Musa bèńnɛ: Gbɛ̃ke tón à kpaa tó ai guu dↄaro. 20 Gbɛ̃kenↄ e Musa yã maro, aↄ̃ à kpaaa tò ai guu dↄ̀, ben à kↄ̀kↄ kà à vã̀, ben Musa pↄ fɛ̃̀ gbɛ̃ pìnↄzi.

21 Lán guu e dↄↄ nà baade è sɛ́ɛ a blena lɛ́n. Tó ↄfãntɛ̃ gbã̀, à kɛ̀ gↄ̃̀ tↄↄtɛa è yↄ́mɛ. 22 Gurↄ swɛɛdodee zĩ aↄ̃ pↄ́blee sɛ̀ɛ lɛo plaa, baade mìa zaka lɛ́ plaplaa. Ben aↄ̃ gbɛ̃nsinↄ gàa wà ò Musanɛ ń píngi. 23 À bèńnɛ: Lɛn Dii dìɛ lɛ. Zia nɛ́ kámmabogurↄↄ zĩmɛ, Dii gurↄↄmɛ. À pↄ́ kɛ̀ á yezi à kpá tɛ́a kpá tɛ́a. À pↄ́ kɛ̀ á yezi à disa disa, à à kpaaa kɛ̀ gↄ̃̀ diɛ ai guu dↄ̀. 24 Aↄ̃ↄ dìɛ ai guu dↄ̀ lán Musa ò nà. Beekii e vãro èe kↄ̀kↄ káro. 25 Ben Musa bèńnɛ: À ble gbã̀a, zaakɛ kámmabogurↄↄ zĩmɛ, é e gukea gbã̀aro. 26 Àgae sɛ́ɛ ai gurↄ swɛɛdo. À gurↄ swɛɛplaadee nɛ́ kámmabogurↄↄ zĩmɛ, eégↄ̃ kuu zĩ pìaro.

27 Gurↄ swɛɛplaadee zĩ gbɛ̃kenↄ bↄ̀ wà gàa sɛ́ɛ, ben aↄ̃ↄe ero. 28 Ben Dii bè Musanɛ: Égↄ̃ kú kↄ̃n doka kɛ̀ má dìɛ masaio ai bↄrɛmɛ? 29 Àgↄ̃ dↄ̃ kɛ̀ mamↄma Dii mámbe ma kámmabogurↄↄ dìɛare. Beee yãnzi gurↄ swɛɛdodee zĩ mɛɛ̀ gurↄ plaaa pↄ́blee kpáawa. Baade gↄ̃ kú a gbɛ̀n, gbɛ̃ke tón gu a gbɛ̀n gurↄ swɛɛplaadee pì zĩro. 30 Ben aↄ̃ kámma bò gurↄ swɛɛplaadee zĩ. 31 Isarailinↄ tↄ́ kpà pↄ́blee pìnɛ mana. À dɛ lán pↄ́wɛɛ pura keteketenↄ bàmɛ. À í nna lán kàra zↄ́dee bà.

32 Musa bè: Yã kɛ̀ Dii dìɛn yɛ̀: Wà mana zaka lɛ́ doo diɛ wa boriinↄnɛ, lɛ aↄ̃ pↄ́blee kɛ̀ à kpàwa wá blè gbáan wa bↄna Igipiti gbɛraa e se. 33 Ben Musa bè Arunanɛ: Ǹ loo sɛ́ ǹ mana zaka lɛ́ doo kán ǹ diɛ Dii aɛ, lɛ àgↄ̃ diɛna wa boriinↄnɛ. 34 Ben Aruna dìɛ gbɛ̀ walaanↄ saɛ lɛ àgↄ̃ diɛna lán Dii ò Musanɛ nà. 35 Isarailinↄ mana blè wɛ̃̀ baplaa ai aↄ̃ gàa wà kào bùsu kɛ̀ gbɛ̃nↄↄ kún. Aↄ̃ mana pì blè ai aↄ̃ gàa wà kào Kanaa bùsu lɛ́a. 36 Zaka lɛ́ doo nɛ́ lita plaaamɛ.