Luda yã takada kↄ̃n Bokobaru yão BƆNA 33

1 Dii bè Musanɛ: Ǹ fɛɛ ǹ gu kɛ̀, mpi kↄ̃n gbɛ̃ kɛ̀ n bↄńyo Igipitinↄ, ǹ gáńyo bùsu kɛ̀ má la dà Ibraĩnɛ kↄ̃n Isaakuo kↄ̃n Yakubuo ma bè mɛ́ kpá ń boriinↄan. 2 Mɛ́ Malaika gbarɛ à dↄare aɛ mɛ́ pɛ́are Kanaanↄa kↄ̃n Amↄrinↄ kↄ̃n Itinↄ kↄ̃n Pɛrizinↄ kↄ̃n Ivinↄ kↄ̃n Yebusinↄo. 3 À gá bùsu kɛ̀ zwi kↄ̃n zↄ́'io din pì guu. Mↄde mɛ́ gáaoro, lɛ màton a kaatɛ zɛ́nlo yãnzi, zaakɛ swãgbãadeenↄn a ũ. 4 Kɛ̀ gbɛ̃nↄ yã pãsĩ pì mà, aↄ̃ ↄ́ↄ dↄ̀, ben gbɛ̃kee e a zãblebↄnↄ da dↄro. 5 Zaakɛ Dii gĩakɛ à yã ò Musanɛ à o Isarailinↄnɛ à be: Swãgbãadeenↄn ń ũ, baa tó ma táa òńyo kɛ̀sɛ do, mɛ́ ń kaatɛ. Aↄ̃ baade ń zãblebↄnↄ bↄbↄ, mɛ́gↄ̃ dↄ̃ dian mɛ́ kɛńyo nà. 6 Ben Isarailinↄ ń zãblebↄnↄ bↄ̀bↄ, aↄ̃ↄe da dↄro zaa Orɛbu kpii kiia.

7 Musa è bisakuta sɛ́ à gá à dↄ bùra kpɛɛ bↄruna kↄ̃n bùra pìo féte. À tↄ́ kpà kutaa pìnɛ dakↄ̃rɛki kutaa. Gbɛ̃ kɛ̀ ye Dii yãzi adee è bↄ à gá dakↄ̃rɛki kutaa pì kiia bùra kpɛɛ gwe. 8 Tó Musa bↄ̀ èe gaa kpɛ́ pì kiia, baade è bↄ à zɛ a kpɛɛlɛa àgↄ̃ à gwaa ai à gá à gɛ̃n. 9 Tó Musa gɛ̃̀ kpɛ́ pìn, tɛ́luguu è pita àgↄ̃ dↄ kpɛɛlɛa, ben Dii è yã oo. 10 Tó gbɛ̃nↄↄ è tɛ́luguu pì dↄ kpɛɛlɛ pìa, baade è dↄnzi kɛ a kpɛɛlɛ. 11 Dii è yã o kↄ̃n Musao tɛ̃tɛ̃ntɛ̃, lán gbɛ̃ è yã o kↄ̃n a gbɛ̃nnao nà. Musa è ɛara à su bùran, mↄde Nuni nɛ́ Yↄsua à kpàasi è bↄ kpɛ́ pìnlo.

Dii bↄ à mↄna Musazi

12 Musa bè Diinɛ: N bèmɛ mà gá kↄ̃n gbɛ̃ pìnↄ, mↄde nɛ́ɛ gbɛ̃ kɛ̀ nɛ́ɛ daamɛɛ omɛro. Àɛ kɛ̀ sↄ̃ n bè, ń ma dↄ̃ n gbɛ̃nna ũ bensↄ̃ ma n pↄnnaa è. 13 Zaakɛ ma n pↄnnaa è, ǹ tó mà n laasuunↄ dↄ̃ sa, lɛ mà e màgↄ̃ n dↄ̃ màgↄ̃ nnanyo yãpura. Ǹgↄ̃ dↄ̃ kɛ̀ borii kɛ̀kii nɛ́ n gbɛ̃nↄmɛ. 14 Ben Dii wèàla à bè: Ma wɛ́ɛ égↄ̃ tɛ́azi mà a gba kámmabona. 15 Musa bè: Tó nɛ́ wɛ́ɛ tɛ́waziro, ǹton wa fɛɛ kɛ̀ro. 16 Tó nɛ́ɛ gáwaoro, dian weé e wà dↄ̃ kɛ̀ mapi kↄ̃n n gbɛ̃ pìnↄ wá nnanyo? Weé wa dↄ̃kↄ̃zi kↄ̃n bori pãndenↄ anduna guu diamɛ? 17 Dii bènɛ: Yã kɛ̀ ń gbèkamaa pì mɛ́ kɛ, zaakɛ n ma pↄnnaa è, má n dↄ̃ ma gbɛ̃nna ũ.

18 Musa bè: Ǹ n gakui ↄdↄamɛ. 19 Ben Dii wèàla à bè: Mɛ́ tó ma maakɛ píngi bↄ n aɛ, mɛ́ ma tↄ́ Dii sísi n aɛ, zaakɛ gbɛ̃ kɛ̀ má yezi mà sùu kɛon mɛ́ kɛo, bensↄ̃ gbɛ̃ kɛ̀ má yezi mà wɛ̃nda dↄ̃nɛn mɛ́ dↄ̃nɛ. 20 Ben à bè: Nɛ́ fↄ̃ ǹ ma uu gwaro, zaakɛ gbɛ̃ntee é fↄ̃ à wɛ́ɛ simalɛ àgↄ̃ kuuro. 21 Dii bè: Ǹ guu gwa da ma saɛ kɛ̀. Ǹ zɛ gbɛ̀ musu gwe. 22 Tó ma gakui pì e gɛ̃ɛ, mɛ́ n sↄtↄ gbɛ̀kotoon mà a ↄↄ kúnla ai mà gɛ̃tɛ. 23 Tó ma a ↄↄ gònla, nɛ́ ma kpɛɛ kpaa e sa, mↄde weé fↄ̃ wà ma uu ero.

BƆNA
<
33
>