Luda yã takada kↄ̃n Bokobaru yão NAANA 23

Sara gana

1 Sara kɛ̀ wɛ̃̀ baswɛɛdo awɛɛswɛɛplaa, 2 gbasa à gà zaa Kiriataba kɛ̀ wè be tia Ɛblↄnu, Kanaa bùsun. Ben Ibraĩ à sósobi kɛ̀ à ↄ́ↄ dↄ̀ à gana yã musu. 3 Kɛ̀ à gù a naↄ̃ gɛ̀ kiia, à gàa à bè Iti boriinↄnɛ: 4 Nibↄ kↄ̃n gbɛ̃ zĩ̀tↄon ma ũ a tɛ́. À tↄↄtɛ yáma gɛ̀vĩikii ũ mà gɛ̀ vĩin. 5 Ben Iti boriinↄ bènɛ: 6 Maree, ǹ wa yã ma. Luda gbɛ̃ aubarikadeen n ũ wa tɛ́. Ǹ n gɛ̀ vĩi gbɛ̀wɛɛ kɛ̀ kɛ̀nnɛ maaa guu. Wa gbɛ̃ke é n tɛ̃ gbɛ̀wɛɛ kɛ̀ nɛ́ n gɛ̀ vĩi à guuro. 7 Ben Ibraĩ fɛ̀ɛ à kùɛ bùsu pì deenↄnɛ 8 à bèńnɛ: À ma yã ma, tó a we mà a gɛ̀ vĩi kɛ̀. À wɛ́ɛ kɛmɛ Zoa nɛ́ Ɛflↄnua 9 à Makpɛla gbɛ̀wɛɛ kɛ̀ kú à bú lɛ́zi yá ma à ↄↄa, eé gↄ̃ ma gɛ̀vĩikii ũ a bùsun.

10 Ɛflↄnu vɛ̃ɛna ń tɛ́ a wɛ́tɛ bĩilɛn gwe, ben à ò Ibraĩnɛ Itinↄ wáa ń píngi à bè: 11 Auo mare, ǹ ma yã ma. Ma n gba buraa pì kↄ̃n gbɛ̀wɛɛ kɛ̀ kú gweeo. Ma n gba ma gbɛ̃nↄ wáa. Ma n gbamɛ, lɛ ǹ n gɛ̀ vĩin. 12 Ibraĩ kùɛ bùsu pì deenↄnɛ, 13 ben à bè Ɛflↄnunɛ ń píngi wáa: Ǹ swã kpá ǹ ma yã ma. Mɛ́ buraa pì fĩa bonnɛ. Ǹ ma ↄↄ sí, mɛ́ ma gɛ̀ vĩin. 14 Ben Ɛflↄnu bènɛ: 15 Maree, ǹ ma yã ma. Tↄↄtɛ kɛ̀ à ↄↄ kà kondogi wàa plaamɛ, bↄ́n beee ũ wa dagura? Ǹ n gɛ̀ vĩin. 16 Ibraĩ à yã mà, ben à kondogi kɛ̀ à ò yↄ̃̀nɛ gbɛ̃nↄ wáa laatarinↄ zakaa. 17 Lɛmɛ Ɛflↄnu bú kɛ̀ kú Makpɛla, Mamare saɛ, gↄ̃̀ Ibraĩ pↄ́ ũ lɛ kↄ̃n gbɛ̀wɛɛ kɛ̀ kú gweeo kↄ̃n lí kɛ̀ kú gweenↄ zaa bú pì lɛ́zi píngi. 18 À gↄ̃̀ Ibraĩ pↄ́ ũ Iti kɛ̀ aↄ̃ mↄ̀ wɛ́tɛ bĩilɛanↄ píngi wáa.

19 Beee gbɛra Ibraĩ a naↄ̃ vĩ̀i Makpɛla bura gbɛ̀wɛɛ pì guu Mamare kɛ̀ wè be tia Ɛblↄnu saɛ, Kanaa bùsun. 20 Lɛn bú kↄ̃n gbɛ̀wɛɛ kɛ̀ dɛ Itinↄ pↄ́ ũ yãao gↄ̃̀ Ibraĩnɛ gɛ̀vĩikii ũ lɛ.

NAANA
<
23
>