1 Kɛ̀ Azo kí Yabĩ à baaru mà, à gbɛ̃nↄ zĩ̀ Madↄ̃ kí Yobabua kↄ̃n Simirↄnu kínao kↄ̃n Akasafa kínao 2 kↄ̃n kína kɛ̀ aↄ̃ↄ kú gu'igbãroo kpaanↄ ń píngi, kína kɛ̀ aↄ̃ↄ kú gukpiideenↄ kↄ̃n sɛ̃̀tɛpↄↄtu kɛ̀ kú Galili sↄↄmɛtɛ kpaao kↄ̃n gusararaao kↄ̃n Dↄru gusĩsĩdee kɛ̀ kú ↄfãntɛ̃gɛ̃kpɛn kpaao. 3 Ben à ɛ̀ara à gbɛ̃nↄ zĩ̀ dↄ Kanaa kɛ̀ aↄ̃ↄ kú ↄfãntɛ̃bↄɛ kpaanↄa kↄ̃n ↄfãntɛ̃gɛ̃kpɛn kpaanↄ ń píngi, Amↄrinↄ kↄ̃n Itinↄ kↄ̃n Pɛrizinↄ kↄ̃n Yebusi kɛ̀ aↄ̃ↄ kú gukpiideennↄ kↄ̃n Ivi kɛ̀ aↄ̃ↄ kú Mizipa bùsun Ɛmↄni gbɛ̀ saɛnↄo. 4 Aↄ̃ bↄ̀ɛ kↄ̃n ń zĩ̀kpɛɛnↄ ń píngi paripari lán ísialɛ bùsu'ãatɛ̃ bà. Aↄ̃ sↄ̃nↄ kↄ̃n ń sↄ̃goronↄↄ pari. 5 Ben kína pìnↄ kↄ̃ kàkↄ̃a aↄ̃ mↄ̀ wà bùra kàɛ lɛdo Mɛromu ínↄ saɛ, lɛ wà zĩ̀ ká kↄ̃n Isarailinↄ.

6 Ben Dii bè Yↄsuanɛ: Ǹton vĩa kɛńnɛro. Zia mↄndaa'i mɛ́ ń na Isarailinↄnɛ ń ↄzĩ aↄ̃ ń dɛdɛ. Ǹ ń sↄ̃nↄ gbátĩkyanↄ zↄ̃zↄ̃ ǹ ń sↄ̃goronↄ kpata. 7 Ben Yↄsua kↄ̃n a zĩ̀kpɛɛnↄ gàańzi zĩ̀o kãndo ń píngi aↄ̃ dàńla Mɛromu ínↄ saɛ gwe. 8 Dii ń náńnɛ ń ↄzĩ, ben aↄ̃ ń dɛ́dɛ aↄ̃ pɛ̀ ń gbɛ̃kenↄa ai Sidↄ̃ mɛɛwin kↄ̃n Misirefo Maimuo kↄ̃n Mizipa guzurɛ kɛ̀ kú ↄfãntɛ̃bↄɛ kpaao. Aↄ̃ ń dɛ́dɛ, aↄ̃ gbɛ̃kee e bↄro. 9 Yↄsua kɛ̀ńnɛ lán Dii ònɛ nà, à ń sↄ̃nↄ gbátĩkyanↄ zↄ̃̀zↄ̃ à ń sↄ̃goronↄ kpàta.

10 Zĩ pìa Yↄsua lìara à gàa à Azo sì, ben à à kína dɛ̀ kↄ̃n fɛ̃ɛdaao. Azo pìn kína pìnↄ wɛ́tɛ mìdee ũ gurↄ beeea. 11 Isarailinↄ gbɛ̃ kɛ̀ aↄ̃ↄ kúnnↄ dɛ̀dɛ kↄ̃n fɛ̃ɛdaao aↄ̃ ń káatɛ, aↄ̃ gbɛ̃kee e gↄ̃ro, ben aↄ̃ tɛ́ sↄ̃̀a. 12 Yↄsua wɛ́tɛ pìnↄ sì píngi kↄ̃n ń kínanↄ, à ń dɛ́dɛ kↄ̃n fɛ̃ɛdaao à ń káatɛ lán Dii zↄ̀bleri Musa ò nà. 13 Mↄde Isarailinↄↄ e tɛ́ sↄ̃ wɛ́tɛ kɛ̀ wà ɛ̀ara wà kàɛ ń bɛzĩ gbɛ̀nnↄaro, séde Azo kɛ̀ Yↄsua tɛ́ sↄ̃̀a pì baasiro. 14 Isarailinↄ wɛ́tɛ pìnↄ pↄ́nↄ nàkↄ̃a ń pↄ́ ũ kↄ̃n ń pↄ́kãdeenↄ aↄ̃ tào. Aↄ̃ ń gbɛ̃nↄ dɛ̀dɛ kↄ̃n fɛ̃ɛdaao ń píngi ai aↄ̃ ń káatɛ, aↄ̃ↄe gbɛ̃ke tó bɛ̃ɛro. 15 Yã kɛ̀ Dii ò a zↄ̀bleri Musanɛ, Musa yã pì ò Yↄsuanɛ, ben Yↄsua kɛ̀ lɛ píngi, èe yã kɛ̀ Dii ò Musanɛ ke tóro.

16 Lɛn Yↄsua bùsu pì sì lɛ píngi, à gukpiide kↄ̃n Nɛgɛvio píngi kↄ̃n Gosɛ̃ bùsuo píngi kↄ̃n gusararaao kↄ̃n sɛ̃̀tɛpↄↄtuo píngi. À Isaraili gukpiide kↄ̃n gusararaao sì 17 sɛna zaa Alaki gbɛ̀ kɛ̀ kú Sei bùsun ai à gàa pɛ́ Baali Gada kɛ̀ kú Lɛbanↄ bùsu guzurɛn Ɛmↄni gbɛ̀ saɛ. À ń kínanↄ kũ̀kũ ń píngi à ń dɛ́dɛ. 18 À zĩ̀kana gì kɛ̀ kↄ̃n kína pìnↄ ń píngi. 19 Ivi kɛ̀ aↄ̃ↄ kú Gibiↄ̃nↄ baasiro wɛ́tɛ kee e kↄ̃ yã mà kↄ̃n Isarailinↄro, aↄ̃ ń blé zĩ̀o píngi. 20 Dii bé à tò aↄ̃ swã gbã̀gbã, ben aↄ̃ zĩ̀ kà kↄ̃n Isarailinↄ, lɛ Isarailinↄ e wà ń kaatɛ ń wɛ̃ndagwana sai, à yãańyo mámmam lán à ò Musanɛ nà.

21 Gurↄↄ pìan Yↄsua gàa à Anakinↄ dɛ̀dɛ gukpiideen kↄ̃n Ɛblↄnuo kↄ̃n Dɛbio kↄ̃n Anabuo. À ń káatɛ à ń wɛ́tɛnↄ kɛ̀ dúgudugu Yuda gukpiideen kↄ̃n Isaraili gukpiideeo píngi. 22 Anaki bori kee e gↄ̃ Isarailinↄ bùsun dↄro, séde Gaza kↄ̃n Gatao kↄ̃n Asadↄdio. 23 Yↄsua bùsu pì sì píngi lán Dii ò Musanɛ nàmɛ, ben à kpà Isarailinↄa à kpàatɛtɛńnɛ danɛdanɛ túbi ũ. Ben bùsu pì gↄ̃̀ kaɛna aafia zĩ̀ sai.