5
Yaubada Ena Luma Abi Nonohana
1 Kin 5:1-6
(2 Koleniko 2:1-18)
1 Fuyana Taya nuꞌuna edi Baꞌisa Hailam mate ya atahiyen mate Solomon sa fasinabo Isalaela edi baꞌisa, tamana Deiwidi falau damahina. Yo fede ena dodoga lalaꞌi ya duidi sa lau Solomon lisina, be ena lautoꞌi sa felen, paꞌana ena faꞌilu loholohona. 2 Solomon wasa te ya fatamali fuyoi Hailam lisina iyen,
3 Sidohana tamagu Deiwidi nuꞌu sadasadai dodogadi mahudoꞌidi, maidadi sa hiyala haꞌa wa sibai. Logena be Guyau ena Yaubada hesana aba faꞌatitiyenna Lumana hige i ginauli ya lau ee–, tau hiyalaina Guyau ya lei hafihafitidi. 4 Aho te, Guyau egu Yaubada, in egu tau hiyala. Mahudoꞌidi ya liba fataludi be hige waiyunu e heyaheyaya hesa. 5 Egu nuwatuhu te, E fanuha ibe Guyau egu Yaubada hesana aba faꞌatitiyenna lumana E ginauli. Doha Guyau, tamagu Deiwidi haꞌa ya faliba iyen, “Natum taumoho E faꞌobiyo baꞌisa, tau falau damahim haba hesagu aba faꞌatitiyenna lumana ya ginauli.”
6 Em tau paisowa u falibadi ti lau Lebanon nuꞌuna be oyagi sida egu ti oidi.*Sida mate oyagi panepanena yo ya adidili. Oyagina olina, doha mwadawa. Mwadale ni sa ota fuya lofalofa. Doha ulabo, hige somo hesa gonowana i faheyaya. Egu tau paisowa haba maꞌedi em tau paisowa sa paisowa. Saidon tataudi oyagi oina sa siba na yau egu tau paisowa sa fakau. Maisa somo wa libaen haba dudulai yai E famaisa watan.
Yo fede, Hailam oyagi ya uneꞌune afuledi Solomon lisina yai. Muli yai Solomon ena tau paisowa, Isalaela dodogadi ouꞌoulidi 30,000 ya abidi be sa faisagusagu, be oyagi sa feli lawedi luma aba ginaulina yai. 150,000 tatau Solomon hinaga ya toledi, Yaubada ena Luma Tabuna duhudi paꞌadi umeꞌehudi sa pididi.
*5:6 Sida mate oyagi panepanena yo ya adidili. Oyagina olina, doha mwadawa. Mwadale ni sa ota fuya lofalofa. Doha ulabo, hige somo hesa gonowana i faheyaya.