15
Guyau, Saulo ya ꞌWaiyoꞌoꞌen Tabu i Kin
1 Samuwela 15:1-4, 7-23, 27-29, 34-35
1 Muli yai Samuwela ya libalau Saulo lisina, iyebom,
Guyau ya duigu be haꞌa E famaꞌim, be haꞌa wa famala kin, yo Isalaela dodogadi wa foyafoyahidi. Na aho te, Guyau ena liba u atahi! 2 Guyau Tau Gigibwali iyen, “Fuyanna Isalaela dodogadi Idipi yai sa laolaoma mate Amaleki dodogadi afa wahawahadi sa nahaidi be sa eli bulubuluhidi. Logena aho te, Amaleki haba E faꞌankamkamnadi. (Auꞌaulaha 17:8)
3 Au lau Amaleki dodogadi au duhu mahanoꞌidi be edi ginauli mahudoꞌidi au faheyayaidi. Tabu au nuwatohatohaedi. Tatau, wawahin, wawaya nomnomdi yo lalaꞌi, edi bulumakau, sipi, kamela, yo donki mahudoꞌidi au wunuidi.
4 Yo fede Saulo liba ya fatamali be ena tau hiyala sa laoma. Isalaela suludi hahaisa ganahewadi yai 200,000 sa lau fote sa laoma yo hinaga Diuda suluna ganahewana yai 10,000 sa laoma. Sa faꞌoigogo esega Telaim taonna yai.
7 Habahim Saulo ena tau hiyala ya foyahidi sa lau Amaleki dodogadi sa weꞌa dudu lidi. Hawila yai sa fatubu ee–, Sula taonna yai, Idipi nuꞌuna tefa saisaina yai. 8 Amaleki edi kin, Agagi ya tohai, na ena dodoga mahudoꞌidi ya wunu ofinidi. 9 In moho Saulo maꞌena tau hiyala dodogadi, hige Agagi ti wunui. Ena sipi yo bulumakau lalaꞌi loholohodi yo gubugubu fwaudi, hinaga hige ti wunuidi yo ginauli loloho mahudoꞌidi hinaga hige ti faheyayaidi. In moho yosiyosi yo ginauli mahudoꞌidi megomegodi yo hige ti fanufanuhadi mate sa faheyaya faꞌofinidi.
10 Guyau ya libalau Samuwela lisina iyebom,
11 Nuwagu ya heyaya, paꞌana Saulo E fasinabo kin. In moho, ya miya mulimuliyegu yo egu laugagayo hige i lau watanidi.
Fuyanna Guyau ena liba Samuwela ya atahiyen, mate Saulo ya manabalaꞌen, be iꞌipa lofalofa Guyau ya anꞌanꞌetai.
12 Bobonna ma hwalahwalalana Samuwela ya aulaha ya lau Saulo ya yoꞌoi. In moho, ena sa liba mate, haꞌa ya lau Kameli nuꞌuna yai. Amainiya Saulo ena fafaꞌilala umeꞌehuna ya bono be haba dodoga sa faꞌatitiyen. Habahim Saulo ya aulaha boda, be ya lidi Giligala.
13 Fuyanna Samuwela yo Saulo sa failobahi mate Saulo ya libalau lisina iyebom,
Samuwela, Guyau ena faloholoho haba ai lisim. Yau ena laugagayo E lau watan.
14 Samuwela alinana ya bui iyebom,
Ibe yena doha, paꞌana somo be sipi nenelidi yo bulumakau hwadududi E atahi?
15 Saulo, alinana ya bui iyebom,
Yosiyosi te, tau hiyala, Amaleki dodogadi lebedi yai sa abidima. Sipi yo bulumakau mahudoꞌidi haꞌa sa wunuidi. Na loholohodi moho sa tole hudoꞌiyedi be haba Guyau, um em Yaubada sa felen ya famala edi antalasam.
16 Samuwela ya libalau Saulo lisina iyebom,
U fatautau! Iꞌipa yai Guyau somo ya falibagu hola ya falibam.
Saulo iyebom,
U falibagu.
17 Samuwela ena liba ya bui iyen,
Beyabeyana em nuwanuwatuhu mate bena um hige doga fafahesana, na aho te, um Isalaela tau foyahidi. Guyau ya fasinabom be um Isalaela edi kin. 18 Guyau ya fatamalim iyen, “Em tau hiyala maꞌem au lau Amaleki dodogadi heyaya sa laulau ginauli, au faheyayadi. Au hiyalaidi ee–, mahudoꞌidi au wunu faꞌofidi.”
19 Ya falibam tabu gogo laꞌi u abi. In moho edi gogo wa faiꞌabiꞌabinidi, be heyaya wa ginauli Guyau matana yai, paꞌana hige ena laugagayo u lau watan.
20 Saulo iyen,
Na Guyau doha ena liba E lau watan. Ya falibagu E lau Amaleki dodogadi mahudoꞌidi E wunu faꞌofidi, na Kin Agagi E fafuyoyama. 21 In moho tau hiyala sipi yo bulumakau hahaisa loholohodi somo - somo sa abidi mate hige ti wunuidi na sa ledima Giligala, be antalasam haba sa ginauli Guyau em Yaubada lisina yai.
22 Habahim Samuwela iyen,
Yena Guyau ena liba te lau watan,
haba nuwana ya amna wananaha, habahim,
yosiyosi ami gabudi be antalasam ami felen.
Antalasam mate abiꞌabi loholohona, in moho,
Guyau ena liba laulau watanina ya hasai wananaha.
Sipi tamoꞌana fisihona tefadi Guyau felenina
mate abiꞌabi loholohona,
in moho, ena liba atahi watanina ya hasai wananaha.
23 Yena dodoga sa timuli bui be Guyau sa fawaiyunu,
itaꞌitana doha dodoga nesu itaꞌita sa fapaisowadi. (Diutelonomi 18:10)
Yena sa nuwa saesae, itaꞌitana doha oitau ti fadebasae.
Paꞌana Guyau ena laugagayo wa ꞌwaiyoꞌoꞌen.
Logena, Um kin, ya ꞌwaiyoꞌoꞌem hinaga.
27 Samuwela ya timuli bui bena ya aulaha ya lau na Saulo ya abilau ana luhuluhu duduna yai be ya solu gigi.
28 Samuwela ya faliba iyen,
Aho te, Guyau, Isalaela em foyafoya ya kamfahi um lisim yai, na falem tau miya hesa haba ya felen, sai in ya loholoho wananaha, habahim um. 29 Yaubada, Isalaela ena namanamali hige i bwalabwala e ena nuwanuwatuhu i bui, paꞌana in hige tau wananaha be haba ena nuwanuwatuhu i bui.
34 Habahim, Samuwela ya fuyo Lama, na Saulo ya fuyo ena luma Gibeya yai. 35 Na Samuwela hige i lau Saulo i ita fuyoi ee–, ya peꞌi. In moho, halana ya tan eloꞌelolosi. Guyau hinaga nuwana ya heyaya fuyana Saulo ya fasinabo Isalaela edi kin.