21
Liba Famahata
Mulina yai, Saulo mate Deiwidi ya fawaiyunu, be ya anpate bena ya wunui. In moho natuna Diyonatan, Deiwidi ena ya liba be ya gela ya lau nuꞌu hahaisa yai, Saulo ya alasimoꞌen.
Deiwidi, Nobi Nuꞌuna yai
1 Samuwela 21:1-6
1 Deiwidi ya lau tau antalasam, Ahimeleki lisina. Ahimeleki ꞌwasabu ya kamfafatabubu edi failobahi yai na ya fatiꞌo lau Deiwidi lisina iyen,
Hige sai hesa maꞌem? Paꞌana somo be iyabom wa laoma?
2 Deiwidi, ya libalau Ahimeleki lisina, iyen,
Kin ya falibagu bena ginauli hesa E ginauli. In moho ya falibagu tabu sai laꞌi ena u liba. Yau egu tau hiyala haꞌa E falibadi be ai nuꞌu hesa haba ꞌe failobahi.*Liba te Deiwidi ya pei alaꞌalami. 3 Kalahe somo lebem yai? Fwalawa faligigi e somo lebem yai u felegu!
4 Tau antalasam Deiwidi alinana ya bui iyen,
Yau hige fwalawa gaibu lebegu yai. In moho, fwalawa fafatabuna haisa neꞌi. Gonowana ami, ami an yena hige wawahin ma afa haidamiu au eno, lahai fisa.
5 Deiwidi iyen,
Wananaha, wawahin hige ma afa haidamai ai eno. Yena ꞌe lau ꞌe hiyala, mate hewahewali sa fatabu fuyoꞌidi. Aho te ꞌe ita wata komakomani fuyoimai be haba paisowa te gonowamai ꞌe ginauli! (Lewitikusi 15:18)
6 Amainiya hige fwalawa hesa, be tau antalasam, fwalawa fafatabuna Guyau matana yai ya toletolei, ya abi be Deiwidi ya felen. Lahaina yai fwalawa ni, mate ya beyabeya be ya abifahi na fwaufwauna ya tole. (Maleko 2:25-26)