5
Neimani ana Lepela sa Faloholoho
2 Kin 5:1-3,9-19
1 Neimani mate Siliya*Siliya nuꞌuna hesana hesa mate Alam. Buka hahaisa mate Alam sa uli. edi kin ena tau hiyala tau lau kulukuluwendi yo nuwanuwa adiꞌadidilina. Guyau ya saguhi be Siliya dodogadi adi waiyunu sa lei hafihafitidi. Siliya edi kin ya ita falaꞌi be ya faꞌatitiyen. In moho ya lepela.†Ꞌwapi asiyebona hesana “Lepela” buka tabuna yai te fatifatili mate ꞌwapi asiyebona heyayana. In hinaga gonowana doha asiyebo aho ite sa atahi “lepela.” 2 Beyabeyana tau hiyala Siliya nuꞌuna sa lau afulen sa lau Isalaela sa duhu mahanoꞌidi na tineꞌeu hesa sa tohai be sa lawen Neimani lahuna lebena be ya famala ena tau lau fayofayo. 3 Muli yai tineꞌeu Neimani lahuna ya faliba iyen,
Ibe moho egu baꞌisa ya lau peloweta ya ita Samaliya yai haba ya faloholoho.
9 Yo fede Neimani ena hosi yo saliyoti yai ya lau Ilaisa ena luma edaꞌedana hafohafona yai ya obiyo. 10 Ilaisa ena tau paisowa ya dui lawen Neimani lisina, be ya faliba, iyen,
U lau Diyodan Hoꞌowana be u kaisum ma faligigi luwaga, haba ꞌwapim ya mwafo na wa loholoho.‡Mose ena laugagayo ya libaen asiyebo te doga ya abi mate ya bida, hige i aꞌa. (Lewitikusi 13:3)
11 Neimani ma manabalana ya lau na iyen,
Guyau ena Yaubada hesana yai yo haba nimana ya lau hitiniyama bonugu hewana yai be ya faloholohogu. 12 Damaseko taon hoꞌowadi, Abani yo Fahapa mate sa loholoho wananaha habahim Isalaela hoꞌowadi. Ibe Damaseko hoꞌowadi yai E kaisugu haba E loholoho.
Yo fede ya timuli bui be ma manabalana ya lau.
13 Neimani ena tau lau fayofayo sa laoma lisina tiyen,
Baꞌisa! Ibe peloweta ya falibam ginauli laꞌilaꞌi hesa wa ginauli, haba wa ginauli. Be yena Peloweta iyen, “U lau u kaisum be u aꞌa,” bena moho ena liba wa lau watan.
14 Yo fede Neimani Yaubada ena peloweta alinana ya lau watan be ya lidi Diyodan Hoꞌowana yai ya topu lidi ma faligigi luwaga. Yo fede Neimani ꞌwapina ya sabusabu doha hewali ꞌwapina na ya loholoho.
15 Habahim Neimani maꞌena ena tatau sa fuyo Yaubada ena peloweta Ilaisa lisina. Neimani ya obiyo Ilaisa nuwanuwana yai na iyen,
Aho te E siba tanoꞌubu mahudoꞌina yai, Isalaela edi Yaubada ibona Yaubada! Yau em tau lau fayofayo! Logena egu ainauya te u abi.
16 Alinana Ilaisa ya bui iyen,
Wananaha Guyau ya mwahumwahuli! Yau ena tau paisowa be hesana yai E liba ibege ainauya hesa ya abi.
Neimani ya dudui bena ainauya ya abi na Ilaisa ya ꞌwaiyoꞌo wananaha.
17 Be Neimani iyen,
Ite mulina, antalasam gabugabudi yo antalasam hahaisa haba E lau ginauli Guyau ai lisina moho, ibege yaubada hesa ai lisina. Egu ainauya hige u abi be i otawa na aee–, Isalaela tanohina moho egu u felegu ya lawen,§Neimani ya nuwa bui be Isalaela edi Yaubada ya kawawananahaʼen. Ya fanuha bena Isalaela tanohina begana ya lawen ena luma be ai hewana antalasam aba gabuna katakatanna ya ginauli. Logena, ya lau Ilaisa ya anꞌetai, be tanohi begana ya abi. Hige i fanuha bena dodoga ti nuwatuhu tanohi ya angafuhi be ya lau peloweta ya fatiꞌoi. laꞌina mate miule*Donki tamoꞌana maꞌena hosi tinabawa sa nahi haba natudi ya tubu. Natudina hesana “miule.” Na sa fapaisowadi be ginauli sa bahebahe tuhu. luwaga gonowadi sa bahei. 18 In moho, ginauli hesa moho Guyau lisina yai, bena egu heyaya ya nuwatuhu afulen. Egu kin E faꞌatitiyen. Debana yai E saguhi be maꞌegu ꞌe luhu ena yaubada bwalabwala Limon ena dubu yai lauꞌuꞌula ana halulu. Bena ya tuli bono mate, ma luwaluwagamai ꞌe tuli bono paꞌana ya guna fesasa nimagu yai. Be laulau esega te debana yai, yau, em tau paisowa, egu heyaheyaya te, u nuwa afulen.†Limonmate Siliya dodogadi edi yaubada bwalabwala hesa.
19 Na Ilaisa, ya libalau Neimani lisina, iyen,
Ma nuwa talum u lau.
Yo fede ya lau.
Isalaela edi kin, Ahaba ya peꞌi na mulina yai hinaga edi kin hahaisa. Samaliya yai sa miyamiya ee–, Hoseya ya kin. Habahim Asiliya tau hiyala Isalaela sa hiyalaidi.
*5:1 Siliya nuꞌuna hesana hesa mate Alam. Buka hahaisa mate Alam sa uli.
†5:1 Ꞌwapi asiyebona hesana “Lepela” buka tabuna yai te fatifatili mate ꞌwapi asiyebona heyayana. In hinaga gonowana doha asiyebo aho ite sa atahi “lepela.”
‡5:10 Mose ena laugagayo ya libaen asiyebo te doga ya abi mate ya bida, hige i aꞌa.
§5:17 Neimani ya nuwa bui be Isalaela edi Yaubada ya kawawananahaʼen. Ya fanuha bena Isalaela tanohina begana ya lawen ena luma be ai hewana antalasam aba gabuna katakatanna ya ginauli. Logena, ya lau Ilaisa ya anꞌetai, be tanohi begana ya abi. Hige i fanuha bena dodoga ti nuwatuhu tanohi ya angafuhi be ya lau peloweta ya fatiꞌoi.
*5:17 Donki tamoꞌana maꞌena hosi tinabawa sa nahi haba natudi ya tubu. Natudina hesana “miule.” Na sa fapaisowadi be ginauli sa bahebahe tuhu.
†5:18 Limonmate Siliya dodogadi edi yaubada bwalabwala hesa.