16
Isalaela adi Kalahe Yaubada ya Feledi
Auꞌaulaha 16:1-5, 11-31, 35
1 Fuyanna Isalaela dodogadi Idipi sa lau afulen mate Elim nuꞌuna yai sa aulaha. Nawalahi fafaluwagana yai, na lahaina safuhudohudoꞌi fafaligiginana yai sa mahano Sin Nuʼuna Pitapitalina yai. Sin nuꞌuna mate Elim yo Sainai atiꞌatipudi yai.
2 Nuꞌu pitapitalina yai, mahudoꞌidi sa fatalapili lau Mose yo Elon lisidi.
3 Tiyen,
Idipi yai ibe Guyau ya lau funuhimai haba olina. Amainiya ꞌe miyamiya mate ama mwaiha yo kalahe. Na aho te, ami foyahimai, be ꞌe laoma amaiteꞌi, haba guliyam ya kamfunuhimai.
4 Habahim Guyau ya libalau Mose lisina iyen,
Ai galewa haba ami kalahe E fatamali lidiyeyawa. Lahai ouꞌouli dodoga bena sa lau ganamuli be lahai esega nonoina yai adi sa tano gogo. Haba laulau yai te E lauꞌitadi be E siba mate egu liba sa lau watan, e higeꞌe.
5 Lahai fafaligigi esegana yai, haba lahai luwaga kalahena sa tanoi, be sa abi nonohai.
11 Guyau, Mose ya falibadi, iyen,
12 Isalaela u falibadi, uwen, “Emi fatalapili mahudoꞌina haꞌa Guyau ya atahiyedi, be maimailafi haba anihi E felemiu. Na hwalahwalala haba kalahe laꞌina somo sa fanuha, sa abi. Haba sa sibai Yau Guyau, mate edi Yaubada.”
13 Maimailafina ataiꞌa baiwadi sa lofoma be nuꞌu sa lau fafamohafu. Yo fede sa tohaidi, be sa buꞌadi, adi mwaiha. Na ya ifi tatatali mate, kipwala bwasuludi edi aba pei palai ya fataꞌiꞌili.
14 Kipwala bwasuludi sa pitali na ginauli hesa hebehebena nenena doha hama hunadi tanohi hewana yai sa ota.
15 Isalaela sa ita mate hige ti sibai, be sa fafatiꞌo fuyoꞌidi, tiyen,
Ite somo?
Mose ya falibadi, iyen,
Guyau ami kalahe ya felemiu, bena ami an.
16 Guyau ya fatalahamiu iyen, “Bena emi luma ganahewana yai tau miya oulina yai ami, ami tano watan, doga esega - esega, ana laꞌina lita esega.”
17 Yaubada Isalaela ya falibadi be sa ginauli doha: haisa sa tano faꞌouli, na haisa fisa moho. 18 Na fuyana sa lufadi, mate sai ya tano falaꞌi, mate ana hige i laꞌi wananaha, na sai ana begana mate, hige i kiu wananaha.
19 Mose ya falibadi iye,
Tabu laꞌi au antole bobon enehena.
20 In moho haisa hige Mose alinana ti lau watan, be adi tefadi sa antoledi. Hwalahwalalana mate, sa hulohulo, yo sa bofa, be Mose ya manabalaꞌedi.
21 Hwalahwalala ouꞌouli esega - esega ana ya tano, gonogonowana yai; na maihala ya gigibwali, somo ota fahina tanohi yai, sa welo. 22 Lahai fafaligigi esegana yai mate, lahai luwaga anꞌannina sa abi nonohaidi, lita fati be doga esega ana. Luma esega - esega edi babada sa laoma be Mose enehena sa liba, 23 be alinadi ya bui, iyen,
Guyau ya fatalahamiu mate bobon ena anyawasi lahaina tabuna. Aho te, somo bena ami gabu, mate au gabu yo somo bena, ami buꞌa mate, au buꞌa. Na somo ota fahina mate, au tole hudoꞌiyen bobon, enehena.
24 Mose somo ya fafatalahadi sa ginauli watan. Somo ota fahidi, sa toledi bobon enehena, hige ti heyaya e ti hulohulo.
25 Mose iyen,
Kalahena aho te au aniꞌi paꞌana aho te Sabati lahaina, Guyau enehena. Aho ibege kalahe laꞌi ai tanohi. 26 Lahai fafaligigi esegana yai haba kalahe ami, ami tano, na lahai fafaligigi luwagana, mate anyawasi lahaina. Ibege kalahe laꞌi ainiya au lobahi.
27 In moho, lahai fafaligigi luwagana yai dodoga haisa sa lau, kalahe sa yoꞌo, na hige adi ti lobahi.
28 Habahim Guyau ya libalau Mose lisina iyen,
Dodoga te haba ma fisa alinagu ami moꞌa peiyedi? 29 Bena ami siba mate Yau, Guyau, emi anyawasi E felemiu. Debana yai, lahai fafaligigi esegana yai mate, lahai luwaga kalahena E felemiu. Lahai fafaligigi luwagana yai ni dodoga mahudoꞌidi edi aba miya yai haba sa miya, na ibege edi luma ti lau afuledi.
30 Be lahai fafaligigi luwagana yai, dodoga sa anyawasi.
31 Isalaela dodogadi kalahena hesana sa tole “mena.” Itaꞌitana doha tuma kafukafuna, na amnana doha bisiketa, ma amoꞌamona sa gabu.
35 Bolima 40 Isalaela dodogadi mena sa anꞌaniꞌi ee–, Kanana nuꞌuna sa lau mahano, be amainiya sa miya.
36 Nonoi sa fapaisowa mate, edi noho, laꞌina gonogonowana doha 20 lita.