Jax era e chajr ojroner lo que tzꞌijbꞌabꞌir umen e Apóstol Pablo tama e grupo ajcꞌupesiajobꞌ xeꞌ turobꞌ tama e chinam Corinto
1
E Pablo utzꞌijbꞌa inteꞌ carta tama e grupo ajcꞌupesiajobꞌ xeꞌ turobꞌ tama e chinam Corinto
Nen e Pabloen xeꞌ jax inteꞌ apóstol tuaꞌ e Cristo Jesús umen que bꞌan ucꞌani Cadiosir. Nen taca e hermano Timoteo war catzꞌijbꞌa e carta era tibꞌa xeꞌ jax inteꞌ grupo ajcꞌupesiajox tama Cawinquirar Jesucristo xeꞌ turox tama e chinam Corinto, y war catzꞌijbꞌa e carta era ubꞌan tama tunor xeꞌ tuobꞌ e Dios xeꞌ turobꞌ tama e departamento Acaya. Que Cadiosir xeꞌ jax Catata ubꞌan y Cawinquirar Jesucristo uyajqꞌuicox utacarsiaj y ujiriar.
Lo que cay unumse ubꞌa e Pablo
Catattzꞌic ucꞌabꞌa Cadiosir xeꞌ jax Utata Cawinquirar Jesucristo, y xeꞌ jax Catata xeꞌ war uyajta coit conda war canumse cabꞌa, y xeꞌ jax Cadiosir xeꞌ war ucꞌunles cawalma iraj iraj. Y jax Cadiosir era ubꞌan xeꞌ axin ucꞌunles cawalma conda war acꞌuxun umen que war canumse cabꞌa. Y tamar era non ubꞌan erer caxin catacre tin e war acꞌuxun uyalmobꞌ umen que war unumse ubꞌobꞌ. Porque bꞌan cocha war catacarna umen e Dios y bꞌan ucꞌani e Dios tuaꞌ asutpa catacre non tin e war unumse ubꞌobꞌ ubꞌan. Porque bꞌan cocha canumse cabꞌa umen que tuon e Cristo y bꞌan ubꞌan tuaꞌ catacarna umen e Cristo tuaꞌ acꞌunlesna cawalma conda war canumse cabꞌa. Y tamar era jay aquetpa tuaꞌ canumse cabꞌa tuaꞌ cache upatnar e Dios, bueno ticoit, porque acꞌampa tunor era tuaꞌ ixtacarna tuaꞌ acꞌunlesna iwalma y tuaꞌ ichꞌami e corpesiaj. Y conda acꞌunlesna cawalma umen e Dios, jax taca tuaꞌ uyubꞌion catacriox tuaꞌ acꞌunlesna iwalma nox ubꞌan. Y tamar era erer asisa iwalma conda watar e hora tuaꞌ inumse ibꞌa bꞌan cocha war canumse cabꞌa non ubꞌan. Y tamar era war aqꞌuecꞌo cacojcsiaj tamarox coner, porque war canata que bꞌan cocha war inumse ibꞌa umen que war ixxana tama ubꞌir e Dios, y bꞌan cocha era ubꞌan tuaꞌ ixtacarna tuaꞌ atꞌabꞌesna iwalma umen e Dios.
Pues cawermanuox, quisinic inata cobꞌa cay canumse cabꞌa xeꞌ imbꞌacꞌajr uwirnar tama e departamento Asia. Pues tꞌabꞌay ticajor inteꞌ nuxi qꞌuijnar capater este que ma tzꞌacaron tuaꞌ caqꞌuecꞌo cawawan tut, y ayan hora conda war cabꞌijnu que non chamenonix ixto yaꞌ. Porque non tama cawalma war cabꞌijnu que turix tuaꞌ cachamesna y que mix cocha tuaꞌ calocꞌoy tamar lo que war canumse cabꞌa bꞌan cocha inteꞌ xeꞌ arobꞌna umen inteꞌ juez que ucꞌani tuaꞌ achamesna. Pero ayan ucꞌampibꞌir tunor era cocha tamar cꞌotoyon canata que ma erer cacojco tamar cabꞌa tuaꞌ calocꞌoy tamar lo que war canumse cabꞌa cocha era, porque conda caturbꞌa cabꞌa tama ucꞌabꞌ e Dios inyajrer, cay cawira que jaxir ayan ajchi ucꞌotorer nojta tuaꞌ utacrion, cocha jaxir ayan ucꞌotorer tuaꞌ usuti ubꞌixqꞌues tin e chamen. 10 Y bꞌan uche Cadiosir tamaron que ixin ucorpeson tama cachamer, y bꞌan war uche era ubꞌan. Y war caturbꞌa cabꞌa tuaꞌ cacojco tamar jaxir tuaꞌ ucorpeson iraj iraj. 11 Y nox ubꞌan war ixtacarsan umen que war icꞌajti taca e Dios tuaꞌ ucojcon. Y ayan meyra gente xeꞌ war ucꞌajtiobꞌ tacar ubꞌan tuaꞌ catacarna, y tamar era watar e día conda meyra gente axin utattzꞌiobꞌ ut e Dios tamar lo que war uche tamaron.
Conda e Pablo uyare e ajcꞌupesiajobꞌ tucꞌa tamar que machi ixin warajseyan
12 Pues ayan lo que war ubꞌutꞌi cawalma meyra xeꞌ jax era: Que tama cawalma war canata que ixion cache cabꞌa erach tut tunor e gente tara tor e rum, y war caturbꞌa cabꞌa tuaꞌ machi aquetpa chagojr cajor tut e gente, pero más war catzay que cache imbꞌutz tunor lo que cay cache tiut. Pero jax Cadiosir xeꞌ ixin uyajcꞌon utacarsiaj tuaꞌ uyubꞌion cache tunor era, y majax umen que non ayan meyra canatanyaj. 13 Pero tamar lo que cay catzꞌijbꞌa tama cora ojroner xeꞌ cawebꞌta ixin tibꞌa, caturbꞌa cabꞌa tuaꞌ cawareox jax taca lo que erer aquetpa chequer tiut. Porque nen war incꞌani tuaꞌ ixcꞌotoy iyubꞌi tunor lo que war inchecsu tiut 14 motor que coner ayanto lo que war aquetpa mucur cora tiut tamar lo que cꞌani ani inwareox. Pero war incojco que conda asutpa watar Cawinquirar Jesús otronyajr que nox cꞌani ixtzay que war inata chien nen, y nen ubꞌan tuaꞌ intzay que war innata chiox nox. Bꞌan quisinic inwira anumuy tama e día conda asutpa watar Cawinquirar Jesús otronyajr.
15 Y tamar era cꞌani inwareox que nen cay imbꞌijnu tuaꞌ incꞌotoy inwarajsiox chajr tuaꞌ uyubꞌien ani intzayjresox, pero ma tiaꞌ cꞌotoyen inche. 16 Pues cay imbꞌijnu tuaꞌ incꞌotoy ani inwarajsiox conda ixien esto tama e departamento Macedonia y de allí cꞌani ani insutpa inwarajsiox otronyajr conda sutpa locꞌoyen tama e departamento yajaꞌ. Y cay imbꞌijnu ubꞌan que tamar era nox erer ani itacren tama tunor lo que insati tama nixambꞌar esto tama e departamento Judea jay incꞌotoy ani. 17 ¿O ma ca jax erach que war imbꞌijnu que cꞌani inxin conda inwareox cocha era? ¿O war ca ibꞌijnu que intaca ojronen conda inwareox que cꞌani incꞌotoy inwarajsiox bꞌan ani cocha inteꞌ winic tara tor e rum que coner oꞌjron y che que ayan lo que cꞌani uche pero ejcꞌar asutpa ubꞌijnu que machix tuaꞌ uche? 18 Pero Cadiosir jax Cawajchecsuyaj que majax chagojr cajor conda cawareox que cꞌani cawarajsiox. 19 Y majax chagojr ujor e Jesucristo xeꞌ jax Uyunen e Dios. Porque jaxir xeꞌ cay cachecsu tiut, nen y e Silvano y e Timoteo, ma tiaꞌ tuaꞌ axin oꞌjron coner que bꞌan y ejcꞌar que majax bꞌan, porque tunor e ojroner tuaꞌ e Jesucristo erach tunor. 20 Porque tamar e Cristo era cꞌani acꞌapa achempa tunor lo que quetpa tuaꞌ achena umen Catata Dios. Y tamar utacarsiaj Cawinquirar era non war catattzꞌi ucꞌabꞌa Cadiosir iraj iraj conda caxin caware que bꞌan cocha arobꞌna umen e Dios y bꞌan war achempa umener. 21 Y jax Cadiosir xeꞌ war uqꞌuecꞌojsion tunoron tuaꞌ caxana tama ubꞌir e Cristo, y jax jaxir ubꞌan xeꞌ usicbꞌon tuaꞌ caxin cache lo que war ucꞌani jaxir. 22 Pues bꞌan cocha inteꞌ juez xeꞌ axin uche sellar inteꞌ jun tuaꞌ aquetpa chequer que ayan ucꞌampibꞌir e jun era, y bꞌan uche Cadiosir tacaron conda ixin uturbꞌa Unawalir tama cawalma tuaꞌ cacꞌotoy canata que tuon jaxir, y tuaꞌ cacꞌotoy canata que tunor lo que arobꞌnon umener bꞌan ubꞌan tuaꞌ axin uyajcꞌon.
23 Entonces tamar lo que war cojron era que machi sutpa tarien tama e chinam Corinto otronyajr, Cadiosir jax Niwajchectesiaj porque jaxir war unata tunor lo que ayan tama nijor y tunor lo que ayan tama niwalma y jaxir unata que erach tunor lo que war inwareox era. Porque Cadiosir war unata que jay tarien ani tuaꞌ inwarajsiox quetpa ani tuaꞌ inchiox ixquetpa tzajtaca iut conda inwareox ani que mabꞌambꞌan lo que war iche. 24 Pero machi war imbꞌijnu tuaꞌ inturbꞌa tamarox más lo que ucꞌani tuaꞌ icꞌupse, porque nen taca e Timoteo majax iwinquiraron tamar lo que war ixcꞌupseyan tamar. Y cocha nox qꞌuecꞌoxix tama icꞌupesiaj tama Cawinquirar, entonces capatnar era tacarox jax taca tuaꞌ catzayjresox tama Cawinquirar.