Apóstol E ojroner era locꞌoy tama e ojroner griego y war che: “Inteꞌ winic xeꞌ epetbꞌir ixin tuaꞌ uchecsu inteꞌ ojroner”. Pero tama uyojroner e Dios war acꞌampesna e ojroner era tuaꞌ uchecsu chiobꞌ e dose uyajcanuarobꞌ e Jesucristo xeꞌ xanobꞌ tupat tic taca tiaꞌ ixin y xeꞌ cay uwirobꞌ tunor lo que cay uche desde que chꞌujya este que chamesna y sujta bꞌixqꞌuesna tujam e chamenobꞌ. Y tamar era tunor tin e quetpobꞌ apóstol quetpobꞌ ajchecsuyajobꞌ tama tunor era ubꞌan.

Beelzebú E Beelzebú jax inteꞌ mabꞌambꞌan mein, pero jaxir aquetpa tuaꞌ acꞌotori tujor e inmojr mabꞌambꞌan meinobꞌ. E ojroner Beelzebú war che, “udiosir e yaxaj”.

Cebada E cebada jax otronteꞌ ut e semilla xeꞌ lar cocha ut e maicillo.

Cortina Ayan ani inteꞌ nuxi manta o cortina xeꞌ chꞌur tama e tabernáculo tuaꞌ aquetpa macar e lugar tiaꞌ ayan e altar xeꞌ ucꞌabꞌa: “E lugar xeꞌ más erach.” Tama e tiempo ixnix e gente tama e Israel ma erer oꞌchoy tama e lugar tupat e manta era, sino que jax taca uwinquir e inmojr sacerdotiobꞌ xeꞌ quetpa tuaꞌ oꞌchoy inyajr tama inteꞌ inteꞌ año.

Cristo E ojroner Cristo alocꞌoy tama e ojroner griego y war che: “Ajcorpesiaj”. E ojroner Mesías alocꞌoy tama e ojroner hebreo y war che: “Ajcorpesiaj” ubꞌan. Pues ayan meyra lo que chꞌar tzꞌijbꞌabꞌir tamar e Cristo umen e profetobꞌ tama e Antiguo Testamento, y tama utiempo Cawinquirar Jesucristo tunor e gente war ucojcobꞌ uyopar e Cristo era.

Denarios Pues tama e tiempo conda xana e Jesucristo tara tor e rum cꞌampesna e tumin xeꞌ ucꞌabꞌa denario xeꞌ atujri bꞌan cocha atojya inteꞌ man conda apatna tama inteꞌ día.

Fariseobꞌ E fariseobꞌ jax inteꞌ grupo religioso tama e lugar Israel tama utiempo Cawinquirar Jesucristo. Jaxirobꞌ uchiobꞌ leer uyojroner e Dios tama e Antiguo Testamento iraj iraj este que cꞌotoy unatobꞌ tunor lo que ayan tamar. Pero ucanseyajobꞌ inyaj meyra tut e gente.

Levita Tunor e winicobꞌ xeꞌ arobꞌnobꞌ levita tama utiempo Cawinquirar Jesucristo locꞌoyobꞌ tama intera taca tata viejobꞌir tuobꞌ xeꞌ jax e Leví xeꞌ turuan tama e onian tiempo. Y tunor e levitobꞌ era quetpobꞌ tuaꞌ uchiobꞌ tunor lo que ucꞌani tuaꞌ achempa tama e templo xeꞌ turu tama e chinam Jerusalem.

Olivo E teꞌ olivo bꞌan uwirnar cocha uterar aceitún lo que ayan tama calugar era. Pues tama utiempo Cawinquirar Jesucristo e gente ucꞌampes uyutir e olivo era tuaꞌ uche e aceite y tuaꞌ acꞌujxa.

Pascua E pascua jax inteꞌ nojqꞌuin tuaꞌ e gente tuaꞌ e Israel xeꞌ achena tama e tiempo conda achempa e Semana Santa tara. Cay tunor era conda locꞌoy e gente tuaꞌ e Israel tama e lugar Egipto tama e onian tiempo. Y jax tama e nojqꞌuin era conda cay ucꞌuxiobꞌ e pan xeꞌ matucꞌa e levadura tamar y conda uchamsiobꞌ inteꞌ yar oveja tuaꞌ utzijtzru uchꞌichꞌer tama utiꞌ e puerta tama uyototobꞌ. Y bꞌan uchiobꞌ e gente tama e Israel tama inteꞌ inteꞌ año esto coner.

Pentecostés Jax inteꞌ nojqꞌuin xeꞌ achempa umen e gente tuaꞌ e Israel conda uyajcꞌu gracias e Dios tama e cosecha tama inteꞌ inteꞌ año. Pero jax tama e día era ubꞌan conda Cawinquirar Jesucristo uyebꞌta tari Unawalir e Dios tuaꞌ aturuan tama uyalmobꞌ uyajcanuarobꞌ.

Profetobꞌ E profetobꞌ xeꞌ turuanobꞌ tama e onian tiempo jax e winicobꞌ xeꞌ uchꞌamiobꞌ inteꞌ ojroner tuaꞌ e Dios y de allí asutpa uyareobꞌ e gente otronyajr lo que arobꞌnobꞌ umen Catata Dios. Pues umen e profetobꞌ era quetpa tzꞌijbꞌabꞌir meyra ojroner tama e Antiguo Testamento.

Sacerdote Tin e quetpa inteꞌ sacerdote tuaꞌ e Israel tama utiempo Cawinquirar Jesucristo quetpa tuaꞌ uchamse inteꞌ arac tama e altar, y tuaꞌ uputa e ujtzꞌubꞌ, y tuaꞌ ucꞌajti taca e Dios.

Saduceobꞌ E saduceobꞌ jax inteꞌ grupo religioso tama e lugar Israel tama utiempo Cawinquirar Jesucristo. Jaxirobꞌ uchebꞌiobꞌ que jax taca uley e Moisés xeꞌ jax uyojroner e Dios, y uchebꞌiobꞌ que matucꞌa e angelobꞌ y que matucꞌa umajin inteꞌ, y que matucꞌa e mabꞌambꞌan mein. Y uchebꞌiobꞌ ubꞌan que e gente machi tuaꞌ asutpa abꞌixcꞌobꞌ tujam e chamenobꞌ watar e día.

Sinagoga Jax ingojr otot xeꞌ aquetpa awawan ubꞌajner xeꞌ aquetpa tiaꞌ tuaꞌ umorojse ubꞌobꞌ e gente tuaꞌ uyubꞌiobꞌ uyojroner e Dios. Y motor que ayan inteꞌ taca templo xeꞌ turu tama e chinam Jerusalem, pero ayan meyra sinagoga tama inteꞌ inteꞌ chinam bꞌan cocha ucꞌaniobꞌ e gente.

Templo Tama utiempo Cawinquirar Jesucristo ayan ingojr taca nuxi otot xeꞌ ucꞌabꞌa templo y xeꞌ quetpa tama e chinam Jerusalem. Y jax taca tama e templo era tiaꞌ tuaꞌ acꞌotoy inteꞌ sacerdote tuaꞌ uyajcꞌu inteꞌ arac tuaꞌ achamesna tama e altar.

Uchinam e Dios Jax e tiempo conda asutpa watar Cawinquirar Jesucristo otronyajr tuaꞌ acꞌotori tara tor e rum. Che tama e castilla que jax: El reino de Dios.

Uyunenen e winic Conda chꞌar tzꞌijbꞌabꞌir: “Uyunenen e winic”, jax Cawinquirar Jesucristo xeꞌ war oꞌjron. Pues conda jaxir war oꞌjron tamar ubꞌa, ucꞌampes e ojroner era bꞌan cocha jay jax ani ucꞌabꞌa. Pero war che que jaxir jax e Cristo xeꞌ jax Cawajcorpesiaj. Bꞌan che ubꞌan tama e Daniel 7:13-14.