TESALONICAJU CUANAJA ISHU PABLORA QUIRICA CUADISHA BETA ISHU CUADISHACUAREQUE
2 TESALONICENSES
Riyaque ri beta ishuque quirica Pablora cuadishacuareque Tesalónicaju aniya cuanaja ishu. Riyaque quiricajuri Pablora huenecuare Ecuana Cuatsashaquique junanucama jariju riyaque yahuaju eje bucha judadibuqueque. Junabuque patu ecuita cuana bajituraquique, Yusuja cuanaque dutyadya jutidya ujeu baquique. Jesús queja ecatyati cuanaquepa dyaque nerecada judadibuque tere japadama Jesús junanucahuie. Jadya tujatu huenecuare.
Umae versículo cuana cabahuityati ishu jidaque ri: 2.16-17; 3.3, 13.
1
Pablora Jesús queja ecatyati cuanaque isaracuareque
Cuadishaya rique quirica Tesalonicaju Yusu pureama aishu caradati bahue cuanaja ishu. Ique Pablo. Silvano, Timoteo jadya retse eatsehue. Micuana micuana ecuanaja Etata Yusu jaque, tumebaedya Ecuana Cuatsashaqui Jesucristo jaque. Yusu ecuanaja Etatara tumebaedya Ecuana Cuatsashaqui Jesucristora jida tsehue nenarucue tatseja quiyuhuebati tsehue. Tatsera inime tsapema neanishacue.
Cristo junanucahuaju Yusura jucha arida cuanaque nerecaturabuqueque
Yusu tsehue quisaratiyaque tuque ecuana jadya aya:
—Yusurupai mique ecuana aya, Tesalonicaju micue cuanaque jida aniya tibu. Dutya huecaca tuna Jesús queja catyatiajeyadya jutidya. Tuna tuna yurameta iyuhueda cabatiajeya. Dyaque jidadya jutidya tuna cabatiajeya, —jadya tuque ecuanaja abahue Yusu.
Jadidya tuque ecuanaja Yusu ataqui micuanaja ishu, micuana yuneri cuitadya Yusu pureamaturayaque aniya tibu, micuana ecuana tsehuequi cuanaque. Cuejajacama tuque ecuana aya peya epuju cuanaque Yusuja quisarati baca ishu caradati bahue cuanaque: “Tesalonicaju cuanaque Jesús queja ecatyati cuanaque tuna Yusuja biji eque aniya. Yusu adeba baecua cuanara tuna jida ama aya, tuna Jesús queja catyatihua tibu. Jidama inime tsehue tuna. Arepa ecana jadya canerecatie juya ama bucha, tuna canime huallatiya ama. Tunaratu pana ejene aya yuneri cuitadya Yusura naruyaque”. Jadya micuana ecuanara sumiya. “Arepa ecuana nerecada juya ama bucha, ecuana Jesús queja catyatiajeya”, jadya tu micuanaja inime.
Jadya tibudyatu Yusu jadya jubuque: “Tesalonicaju cuanaque tuque jucha metse ama baya. Eaqueja ecana paju” jadya. Jadya ejitajuetu Yusu juya dyaque tuyuque. Arepa micuana iyacua nerecada juya ama bucha, Yusu dutya naruqui juatsu tura micuana tuaqueja amerebuque.
Yusujatu abahue tuyu cuitaquedya. Jadya tibudya tujatu nerecaturabuque micuana nerecaturaqui juya cuanaque. Ecuana bacue nerecada juya cuanaque Yusura ecuana nerecada amerejacabuque. Barepa juque tuque tsahuaqui casada cuanaratu tajibebuque. Ecuana Cuatsashaqui Jesús Yusuja yacua juque rehua junanucahuaju ecuana Yusura nerecaturajacabuque. Tuque etiqui jujuja hueca ducu junanucatsu tujatu nityabuque canerecati cuana. Yusu adeba baecua cuanaque nerecaturaratu jebuque. Tume Ecuana Cuatsashaqui Jesucristo queja catyaticarama juhua cuanaque tujatu ecana nerecaturanabuque. Nerecaturabuque tujatu ecana nerecaturajaca ishu ama. Jipebuque ama tunajatu Ecuana Cuatsashaquique ni eje tupu jipe ishu ama. “¡Eje casau cuita dyadimi, Yusu! ¡Emui taa mique!”, jadya tuja cuanaque juyaju, tuja cuanaque ama tuna tuque jipenime ama jubuque.
10 Ecuana Cuatsashaquique junanucahuaju dutya tuja cuanara tuque ecuana muibuque. Dutya tuaqueja ecatyati cuanara tuque ecuana jadya abuque: “¡Miquemi dyaque jidaque, Jesús! ¡Miquemi dyaque casadaque! Pureama mique ecuana aya” jadya. Micuana micuana tuhuadya jubuque tuatsehue, Yusuja quisarati ecuanara cuejayaque ejenetsu micuana catyatihua tibu.
11 Jadya tibudya ecuana Yusu tsehue quisarati jacaya ama micuanaja ishu. Bacaya tuque ecuana:
—Ecuanaja Etata Yusu, mira tuna mepehua Tesalonicaju cuanaque micue ishu. Tsahuacue ecana micue cuanaque eanita bucha anie tuna juishu. Tuna tuna micue yana equedya anicara juya. Tsahuacue ecana micue casa tsehue, tunaja peya cuana jida tsehue baishu. Tuna Jesús queja catyatihua tibu tunarami mereya. Casaturacue ecana tuna micue ishu mere jujaca ishu ama, —jadya tuque ecuanaja Yusu abahue.
12 Micuana ni ejitaju Yusu jaque cabameretiya, tumetu peya cuana jadya ejuu: “Jesucristo tu jida, tuja cuanaque jida tura amereya eque cuita aniya tibu”. Tumebaedya ni tu Yusu jubuque: “Jida bucha taa baya Tesalonicaju cuanaque ecue cuanaque” jadya. Eje bucha jida jue ni ecuana juma ecuana taca cuita. Ecuanaja Etata Yusura, Ecuana Cuatsashaqui Jesucristora jadya ecuana baya jida bucha, tatsera ecuana jida tsehue naruya tibu.