HEBREO CUANAJA ISHU QUIRICA CUADISHATANACUAREQUE
HEBREOS
Riyaque quirica ri israelita cuana Jesús queja ecatyati cuanaja ishu cuadishatanacuareque. Adebataqui amari aira huenecuareque, arepa eje umara Pablora huenecuareque bucha baya ama bucha.
Umae cuana Jesús queja nimee jujacacara juyaju tujaque tibu dyaque canerecatiyaju cuadishacuareque bucha rique. Tunaja baba cuanaja quejeneti cuanaju yudijidya judirunucacara juyaju cuadishacuare bucha rique. Riyaque huenequirari huenecuare, Cristopa ni aija beta tupu aqueretaqui ama israelita baba cuanara ejenecuare cuana tsehue, acuare cuana tsehue jadya. Dyaque tujatu “Cristo tu ecuanaja pae dyaque muidaque”, jadya acuare. Icuene pae dyaque muidara uu iye, ami Yusu tyau jadya acuare buchatu Cristo curusuju majucuare ami quijehuetitsu, ecuanaja jucha cuana tsujetya ishu. “Necanimehuallatiume. Ecuana eiyetauju majuhua queja nimeedya jutidya nejuajecue”, jadyatu jucuare.
Umae versículo cuana jida cabahuityati ishu cuanaque ri: 2.3; 4.12, 14-16; 6.10; 7.25; 9.22; 10.23; 11.1-40; 12.1-2, 5-6; 13.8.
1
Yusu Ebacuaque eque caadebamereticuareque
Beru mara cuana cuetietibehuajutu Yusura tuja quisarati adebamerehua ecuanaja baba cuana tuequeque quisarati cuejaqui cuana eque. Eje uma cueja bape bape eque adebamere tujatu ecana aetibehua. Amena iyacua bacue tura ecuana eje buchique adebamerehua tuja Ebacuaque neri eque. Tuja Ebacuaque tsehuedyatu Yusura iyahua dutya ai aniyaque. Tudyatu Yusura mepehua dutya ai aniyaque naru ishu. Tuquetu jida casada Yusu bae cuitadya. Tura ecuana pana ejitaju adebamere aya Yusu eje buchique. Tura jadya amereya tibutu turadya inimeradya jutidya dutya tura iyahuaque inaya, naruya jadya aya, Yusura iyahua baedya aniaje ishu. Tuquetu majuhua ecuanaja jucha cuana apupashatsu pana bajeje aishu tsujetyaqui. Jadya juatsutu tuque Yusu Dutya Naruquija yacuaju anidiruhua Yusuja jida eque amaca. Emuitaque yahua naruquija jida eque amaca eiyabutyatau bucha, tumebaedyatu tuque muitahua.
Yusuja Ebacuaquetu dyaque emuitaque, barepa juque Yusu tsahuaqui cuanaque bucha ama
Yusuja Ebacuaquetu barepa juque Yusu tsahuaqui cuanaque dyaque inime metseque judadihua. YUSUJA EBACUAQUE ebacanidya tu dyaque emuique, “Yusu tsahuaquique” jadya buchique ama.
“Mique mique ecue Ebacua.
Ique micue Tata”, jadyatu Yusura Jesús ahua.
Ni ejeque tuque tsahuaquique tujatu jadya ahua ama. Tumebaedyatu Yusu jucuare beru Jesús jadya ayaque:
“Ique tuja Etataque.
Tuque tuque ecue Ebacua”.
Ni eje tupu tujatu ahua ama quisarati ni ejeque tuque tsahuaquija ishu riya bucha. Riyaque yahuaju tuja Ebacuaque peadyaque cuadishahuietu Yusu jucuare:
“Dutya barepaju ique tsahuaqui cuanara pamui ecue Ebacua”, jadyatu juhua.
“Eratu ecue quisarati barepa juque bequi cuanaque cuejiji bucha huenie amereya, ique barepaju merequi cuanaque bacue casada etiqui ai yuamaturaquique bucha”,
jadyatu Yusu jucuare barepa juque tuque tsahuaqui cuanaque jadya ayaque.
Tuja ebacuaquetu Yusura jadya acuare:
“Yusu, dyaque casadaque jujacanime ama mique.
Narubuque tuquemi tuyu neri micue cuanaque.
Jida tuyuque tuquemi iyuhueda baya.
Amena jidama tsehuemi cahuaitiya.
Jadya tibudya, ique Yusu juya tibu, erami mepehua peya cuana bucha dyaque emui juishu.
Jutaquijudyami mique dutya dyaque jidaque judadiya”,
jadyatu Yusura ahua tuja Ebacuaque. 10 Tumebaedyatu Yusura acuare beru tuja Ebacuaque:
“Yuequedya tuquemi iyahua yahua, Dutya Cuatsashaquique.
Micue emetucu tsehue tuquemi iyahua barepa.
11 Yahua barepa jadyatu teredadibuque.
Amena miquemi tere ishuque ama.
Dutya eiyaquetu esiri judadiya.
Ecuanaja ejutuqui siri buchatu judadibuque.
12 Ejutuqui siri iyacuaque cadadititsu eijehueu bucha, tumebaedya tuquemi iyabuque yahua iyacuaque beruque cuarequi, barepa iyacuaque beruque cuarequi.
Mique bacue ni riya piji buchique esiri jubuque ama.
Mique eje bucha, jadidyami jusiribuque”,
jadyatu Yusura Ebacuaque ahua.
13 “Anibutecue ecue jida eque amaca muita ishu, era mique ujeu baqui cuanaque dutya ijahue atilla tupu”,
jadyatu Yusura ahua tuja Ebacuaque cuita camadya, ai ejeque barepaju tuque tsahuaquique ama.
14 Barepaju etsahuaqui cuanaque tuna espíritu cuana. Tunadya tuna Yusu merequi cuanaque. Tunadya tuna barepa juque cuadishaya tura tuaqueja judirushabuque cuanaque tsahua ishu. Jesús, Pedro tsehue quisaraticuareque