Cotioro'sa' Quisocristo imapisopita a'na piyapiri ninshitërinso'
1
Yosë nanamën anitotërinpoaso'
1 Iráca quëran huarë' Yosëso' nanamën anitotërinpoa'. Shimashonënpoapita, pënëntona'piro'sa quëran na'aro anitotërin. Naporahuaton nisha nisha quëran anitotërin. Co a'naromaráchin ya'ipi anitotërinhuë'. 2 Iporaso nipirinhuë', hui'nin quëran nontërinpoa'. Iráca Yosëri sha'huitohuachina, Quisocristori isoro'pa', inápaquë ya'huërinsopita, ya'ipi ninin. A'na tahuëri Yosë nohuanton, ya'ipi hua'anëntarin. 3 Inaso' pa'pin pochachin noya nóya ninin. Ina pochachin ni'ton, inasáchin Yosë no'tëquën anohuitërinpoa'. Chiníquën nanantërin ni'ton, ipora huanta' ina nohuanton, ma'sha ya'huërarin. Co yonquirinpoahuë' naporini, ya'ipiya ta'huanchitërihuahuë'. Iráca oshanënpoa' inquitinpoaso marë' chiminin. Chiminpirinhuë', nanpiantarahuaton, inápaquë panantarin. Inaquë panantarahuaton, Yosë inchinanën quëran huënsërin. Chiníquën nanantaton, hua'anëntarin.
Quisocristoso' noya noya ninin
4 Yosë hui'nin ni'ton, anquëniro'sa quëran chini chiníquën nanantërin inaso'. Yosëri acorin ni'ton, inaso' noya noya. 5 Iráca Yosëri sha'huitërin. Quiricanënquë naporin:
“Quëmaso' hui'nahuënquën. Ipora chachin noya nicatënquën, acoaranquën piyapi'sa' hua'anëntamaso marë',” itërin. Ina quëran taantarin:
“Ca hui'nahuë inaso'. Caso' ina pa'pinco,” tënin. Co inso anquëni tëranta' ina pochin nontërinhuë'.
6 Hui'nin chachin nipirinhuë' isoro'paquë a'paimahuachina, chini chiníquën nanan quëtaton, tapon:
“Ya'ipi anquëniro'sarinta' ina chinochina',” tënin.
7 Anquëniro'sa' yonquiaton, quiricanën quëran Yosë tapon:
“Anquëniro'saso' comisionëhuëpita. Cari camairahuë. Camaihuatëra, ihuan pochin a'naroáchin pa'pi.
A'naquën ca nohuanto, pën pochin nipi,” tënin.
8 Hui'ninso nipirinhuë', noya noya acorin. Ina nontaton, itapon:
“Quëmanta' Yosënquën ni'quëhuarë', ya'ipi hua'anëntaran. Co onporonta' pipiaranhuë'.
Piyapiro'sa' no'tëquënáchin pënënaran ni'ton, noya nicaponën.
9 Noyasáchin yonquiaran. Co pi'pisha tëranta' oshahuanamaso' yonquiaranhuë'.
Napoaton noya ni'nanquën. Noya noya acoranquën ni'ton,
ya'ipi nipayaransopita quëran noya noya cancantaran,” itërin Yosëri. Quiricanënquë ninshitopi.
10 Ina quëran itantarin:
“Quëma Sinioro iráca isoro'pa' acoran. Pi'iro'të', tayora, yoqui, inapitanta' acoran.
11 A'na tahuëri ya'ipi inapitaso' ta'huantarin.
A'morëso mocarinso pochin nisapi.
Quëmaso nipirinhuë' ya'huëmiataran.
12 A'morëso si'pirahuatë', të'yatërëso pochin ya'ipi ata'huantaran.
Nasha a'morëso pochin, ya'ipi nasha acoantaran.
Quëmaso nipirinhuë' co onporonta' ta'huantaranhuë'.
Co nishataranhuë'. Inachachin ya'huërápon,” itërin.
13 Ina quëran hui'nin itantarin:
“Chiníquën nanantaton, inchinanëhuë quëran huënsëquë'
ya'ipi inimiconënpita carinquën minsëchinquën,” itërin Yosëri.
Co inso anquëni tëranta' ina pochin nontërinhuë'. 14 Inapitaso' inpriatonënpita pochin ni'ton, Yosëri camairin. A'paimarin imarëhuasopita catahuainpoaso marë'. Yosë chachin nicha'ësarinpoa'. Nani ina nitotërama'.