10
Saul me nöün kewe mwän ra mäla
10.1-14
(1.Sam 31.1-13)
Iwe, ekewe chon Filistia ra maun ngeni ekewe chon Israel. Nge ekewe chon Israel ra süla me mwen ekewe chon Filistia o chomong ra mätiu won ewe chuk Kilpoa. Ekewe chon Filistia ra cherikaei Saul me nöün kewe mwän. Iwe, ra niela Jonatan, Apinatap me Malkisua, nöün Saul kewe mwän. Iwe, ewe maun a fokun pöchökülela ngeni Saul. Lupwen ekewe chon likapich ra rangeiti Saul, ra fokun akinasa. Mürin, Saul a üreni nöün chon uwei an pisekin maun, “Kopwe üttawu noum ketilas o posu ngeniei, pwe ekewe aramas resap sirkomsais resap feito o urumwotitiei.” Nge nöün chon uwei an pisekin maun esap mochen, pun a fokun niuokus. Iei mine Saul a angei nöün ketilas o püsin posu ngeni. Iwe, lupwen nöün Saul chon uwei an pisekin maun a küna pwe Saul a mäla, a pwal posu ngeni nöün ketilas o mäla. Iei usun Saul me nöün kewe ülüman mwän ra mälapök, pwal chon leimwan meinisin. Nge lupwen ekewe chon Israel mi nom lon ewe lemol ra küna pwe ekewe sounfiun Israel ra sü, nge Saul me nöün kewe mwän ra mäla, ra likitala ar kewe telinimw o süla. Mürin, ekewe chon Filistia ra feito o imweimw lor.
Nge sorotän ewe rän, lupwen ekewe chon Filistia ra feito pwe repwe angei pisekin ekewe somä, ra küna Saul me nöün kewe ülüman mwän ra mätiu won ewe chuk Kilpoa. Iwe, ra angei pisekin Saul, ra pökü üan o pwilitawu üfan üföüfen maun. Ra pwal tinala chon künö lemenen fanüen chon Filistia, pwe repwe asilefeili ewe pworaus mi mürina ngeni ar kewe uluulun anümwäl me ekewe aramas. 10 Iwe, ra iseis üfen Saul üföüfen maun lon imwenfelin ar kewe kot o emeitiwa möküran lon imwenfelin Takon. 11 Nge lupwen ekewe chon Japes-kiliat ra rongorong meinisin mine ekewe chon Filistia ra föri ngeni Saul, 12 ekewe mwän meinisin mi pwora o pöchökül ra ütä, ra feila angei inisin Saul me inisin nöün kewe mwän o uweereto Japes. Iwe, ra peiaseni chür fän efoch irä ook me lon Japes o öchüün lon ükükün fisu rän.
13 Iei usun Saul a mäla pokiten esap allükülük won ewe Samol mi Lapalap. A aleasolap ngeni an kewe allük, a pwal kütta an öüröür seni eman watawa, 1.Sam 13.8-14; 15.1-24; Lif 19.31; 20.6; 1.Sam 28.7-8 14 nge esap kütta an öüröür seni ewe Samol mi Lapalap. Iei mine ewe Samol mi Lapalap a niela Saul o awisa Tafit nöün Jesi we mwän, pwe epwe nemeni ewe mwü.

10:13: 1.Sam 13.8-14; 15.1-24; Lif 19.31; 20.6; 1.Sam 28.7-8