3
Pwüngün lefilen pwüpwülü
3.1-7
Pwal ina usun ämi fefin kana, oupwe fokun aleasochisi pwülüemi kana, pun ika ekoch me leir resap lükü än Kot kapas, repwe tongeni lükü Jesus ren ämi föför. Ousap wisen apasatä och kapas, Ef 5.22; Kol 3.18 pun repwe chök soulängila ren ar küna ämi föför mi limöch me ämi sile menin. Ousap eäni fouten lükün, pwe oupwe liöch ren sokun firesin möküremi are mwärimi mwärämwär kolt are sokopaten üf oua üföüf. 1.Tim 2.9 Nge ämi liöch epwe pwä ren mine a nom lon letipemi, iei eu liöch esap fokun tongeni siwil, a wor ren eman aramas mi tipemecheres o lukpwetete. Ei sokun liöch a fokun aüchea mwen mesen Kot. Pun iei usun ekewe fefin mi pin me lom ra anomu ar apilükülük won Kot. Ar liöch a fis ren ar aleasochisi pwülüer kana, usun Sara a aleasochisi Apraham o aita ngeni an samol. Ämi oua nöün Sara fefin are oua föri mine a mürina, nge ousap niuokusiti och. Ken 18.12
Ina usun pwal ämi mwän kana, oupwe nonom ngeni pwülüemi kana fän mirit, pun inisiir a apwangapwang mwen inisimi. Oupwe meninitiir, pun pwal ir repwe angei än Kot we lifangen manau usun chök ämi. Oupwe föri iei usun, pwe esap wor och mine epwe epeti ämi iotek. Ef 5.25; Kol 3.19
Riaföü fän iten föri mine a pwüng
3.8-22
Iwe, iei sopolan mine üa mochen ürenikemi: Oupwe eänifengeni eu chök tip me eu chök memef. Oupwe echenifengenikemi lefilemi usun chök pwipwi, oupwe eäni kirikiröch o tipetekisonfengen lefilemi. Ousap liwini ngau ngeni ngau are ottek ngeni ottek, nge oupwe afeiöchüür, pun Kot a körikemi ämi oupwe föri iei usun, pwe oupwe angei eu feiöch. 10 Pun iei usun a mak lon ekewe Toropwe mi Pin,
“Iö a mochen an epwe pwapwaiti manau
o küna feiöch lon manauan,
esap fokun chüen apasa kapas mi ngau,
nge epwe ükütiu le kapas chofona.
11 Epwe fokun kul seni mine a ngau o föri mine a mürina,
epwe fokun kütta kinamwe ren unusen lelukan.
12 Pun ewe Samol a amanaua ekewe chon pwüng,
a rongorong ngeni ar iotek,
nge a ü ngeni chokewe mi föri mine a ngau.” Kölf 34.12-16
13 Iö epwe tongeni afeiengauakemi are oua achocho le föri mine a mürina? 14 Nge are oupwe fen küna riaföü pokiten ämi föri mine a pwüng, oupwe feiöch. Ousap niuokusiti aramas, ousap öürek. 15 Oupwe meniniti Kraist lon lelukemi, oupwe asamolu i, pun i ämi Samol. Oupwe molotä fansoun meinisin pwe oupwe pölüeni chokewe mi aisinikemi, pwe oupwe awewe ngeniir usun ewe apilükülük oua eäni, Mat 5.10; Ais 8.12-13 16 nge oupwe kapas ngeniir fän pwetete me menin. Oupwe tümwünü pwe esap wor mengiringirin letipemi, pwe chokewe mi kapas ingau usun ämi föför mürina pokiten oua tapwela mürin Kraist, repwe säw ren ar kapasen esitakemi. 17 Are iei letipen Kot pwe oupwe küna riaföü, a fen öch ämi oupwe riaföü fän iten ämi föför mürina, nge sap fän iten ämi föföringau. 18 Pun Kraist a mäla fän iten tipis fän eu chök, nge a naf ngeni fansoun meinisin, ewe chon pwüng fän iten ekewe chon tipis, pwe epwe emwenikich ngeni Kot. A mäla lon inisin, nge a manausefäl lon ngünün. 19 Iwe, lon ngünün a feila o afalafala ekewe ngün mi nom lon fötek. 20 Ikei ir ngünün chokewe mi aleasolap ngeni Kot, lupwen a witiwit lon an mosonotam lon ekewe rän, lupwen Noa a föri ewe waimw. Ekoch chök aramas, fokun waluman chök, ra nonom lon ewe waimw o küna manau seni ewe koluk. Ken 6.1–7.24 21 Ei koluk eu liosun papatais mi amanauakemi iei. Esap limetala pwülün inis, nge eu pwon ngeni Kot oua eäni seni eu mwelien letipemi mi limöch. Iwe, a amanauakemi ren än Jesus Kraist manausefäl, 22 i ewe mi feitä läng, a nonom lepelifichin Kot o a nemeni ekewe chon läng meinisin, pwal ekewe ngün mi wor ar nemenem me manaman.

3:1: Ef 5.22; Kol 3.18

3:3: 1.Tim 2.9

3:6: Ken 18.12

3:7: Ef 5.25; Kol 3.19

3:12: Kölf 34.12-16

3:15: Mat 5.10; Ais 8.12-13

3:20: Ken 6.17.24