4
1 Üpwe fokun fönok me mwen mesen Kot me Kraist Jesus, ätewe epwe apwüngü ekewe mi manau me ekewe mi mäla, pwal i epwe war o nemenem usun eman king, 2 pwe kopwe afalafala ewe Kapasen Kot. Kopwe achocho ngeni om kopwe arongafeili ewe Kapas, ese lifilifil ika lon fansoun öch ika lon fansoun ese öch. Kopwe föri ewe angangen fön, apwüng me apöchöküla manauen souläng lupwen ka föri ewe angangen asukul fän mosonotam. 3 Pun epwe war ewe fansoun, lupwen aramas resap mochen aüseling ngeni afalafal mi let. Nge repwe chök fiti mochenin letiper o repwe achufengeni chomong sense fän iter, ir ätekewe repwe üreniir mine ra mochen rongorong. 4 Repwe kul seni ar aüseling ngeni ewe kapas mi let, nge repwe aüseling ngeni ekewe tutulap. 5 Nge en kopwe ekisaram lon om föför meinisin, kopwe likitü lon riaföü, kopwe föri angangen eman chon asoulängala aramas, kopwe unusen apwönüetä wisom usun eman nöün Kot chon angang.
6 Nge me rei, a tori ewe fansoun ai üpwe fangala manauei ngeni Kot pwe eu asor, a tori ewe otun ai üpwe mäla. 7 Üa eäni ewe maun mi öch, üa awesöchüela ewe kitir, üa amwöchü ai lükülük. 8 Seni iei a iseis ngeniei ewe mwärin pwüng, ewe win ach Samol ewe Soukapwüng mi pwüng epwe ngeniei lon ewe Rän. Nge esap ngeniei chök, nge pwal ngeni chokewe meinisin mi fokun witiwiti an wareto.
Än Paulus kapas won püsin inisin
4.9-18
9 Kopwe achocho ngeni om kopwe müttir feito rei. 10 Pun Temas a echeni ei fanüfanen ikenai, a likitiei o feila Tesalonika. Kresens a feila Kalatia o Titus a feila Talmatia. ✡ Kol 4.14; Filim 24; 2.Kor 8.23; Kal 2.3; Tit 1.4 11 Lukas chök a nom rei. Kopwe angei Markus pwe epwe etuketo, pun a tongeni alisiei lon ai angang. ✡ Kol 4.14; Filim 24; Föf 12.12,25; 13.13; 15.37-39; Kol 4.10 12 Üa tinala Tikikus ngeni Efisos. ✡ Föf 20.4; Ef 6.21-22; Kol 4.7-8 13 Lupwen kopwe feito, kopwe uweeto üfei na sekit üa likitala lon Troas ren Karpus, kopwe pwal uwato ekewe puk, akaeuin ekewe mi för seni silin man. ✡ Föf 20.6
14 Aleksanter, ätewe mi föri pisek seni mächä, a fokun ariaföüüei. Ach Samol epwe ngeni chappen an föför ngeniei. ✡ 1.Tim 1.20; Kölf 62.12; Rom 2.6 15 Kopwe afäluk ren ätewe, pun a fokun pöchökül le ü ngeni ach afalafal.
16 Lon aeuin fansoun üa küna kapwüng esap wor eman a alisiei. Ir meinisin ra likitieila. Amwo Kot esap liwini ngeniir liwinin ar föför! 17 Nge ach Samol a nom rei, a atufichiei pwe üpwe tongeni arongafeili unusen ewe Kapasen Kot, pwe ekewe chon lükün Israel meinisin repwe rongorong. Iwe, üa ngas seni ar apwüngüei ngeni mäla. 18 Ach samol epwe pwal angasaei seni ekewe sokun angangingau meinisin o amanauaei, pwe epwe uweeila ngeni mwün lon läng. I epwe ling tori feilfeilachök! Amen.
Ekewe kapongen lesopolan
4.19-22
19 Ngang üa kapong ngeni Prisila me Akwila, pwal ngeni chon ewe familien Onesiforus. ✡ Föf 18.2; 2.Tim 1.16-17 20 Erastus a nometiu lon Korint, nge Trofimus üa likitala lon Miletus, pun a samau. ✡ Föf 19.22; Rom 16.23; Föf 20.4; 21.29 21 Kopwe achocho ngeni om kopwe feito rei mwen lefen. Eupulus, Putens, Linus me Klautia ra kapong ngonuk, pwal pwiich kewe souläng meinisin ra kapong ngonuk.
22 Ach Samol epwe eti ngünum. Än Kot ümöümöch epwe nonom remi meinisin.