8
Saul a ariaföüü chon mwichefel
8.1-3
1 Iwe, Saul a fokun tipeeu ngeni ar niela Stefanus. Lon ena chök rän chon ewe mwichefel lon Jerusalem ra tolong lon watten riaföü. Ekewe souläng meinisin ra toropasfeil lon unusen ewe fanü Jutea me Samaria, chilon chök ekewe soukünö. 2 Ekoch mwän mi tupwöl lon ar lükülük ra peiaseni Stefanus o ra ngüngüres won lon ar kechü fän leüömong. 3 Nge Saul a popuetä le atala mwichefel. A feila ngeni imw me imw o etekinawu ekewe chon lükü, mwän me fefin, o atolongeer lon imwen fötek. ✡ Föf 22.4-5; 26.9-11
Filip a afalafala ewe Pworausen Manau lon Samaria
8.4-25
4 Iwe, ekewe chon lükü mi toropasfeil ra fetalfeil ekis meinisin o afalafala ewe kapasen Kot. 5 Nge Filip a feila lon eu telinimw lon Samaria o afalafala usun Kraist ngeni ekewe aramas ikenan. 6 Lupwen ekewe aramas ra rongorong ngeni än Filip afalafal o küna ekewe manaman a föri, ir meinisin ra fokun aüseling ngeni mine a apasa. 7 Ekewe ngününgau ra towu seni chomong aramas fän ar pupuchör mi leüömong, pwal chomong aramas mi mwök me aramas mi pechemä ra pöchökületä. 8 Iei mine a fis eu watten pwapwa lon ewe telinimw.
9 Iwe, a wor eman mwän itan Simon lon ewe telinimw. Ätei a amairü ekewe chon Samaria ren an föri angangen roong. A apasa pwe i eman aramas mi tekia 10 o aramas meinisin lon ewe telinimw, seni ekewe aramas mi iteföüla tori aramas mi kis, ra fokun aüseling ngeni. Ra apasa, “Ätei ewe manamanen Kot, a pwä pwe i ewe Manaman mi Lap!” 11 Aramas ra fokun aüselinga, pun fansoun langatam a amairüür ren an föri angangen roong. 12 Nge lupwen ra lükü än Filip afalafala ewe Pworaus Allim usun ewe Mwün Kot pwal usun Jesus Kraist, iwe, mwän me fefin ra papatais. 13 Pwal Simon a lükü, nge mürin an papatais a chök nonom ren Filip. Nge lupwen a küna ekewe asisil mi lapalap me ekewe manaman Filip a föri, a fokun mairü ren.
14 Iwe, lupwen ekewe soukünö lon Jerusalem ra rongorong pwe ekewe chon Samaria ra etiwa ewe kapasen Kot, ra tinala Petrus me Johannes rer. 15 Lupwen ar toriir, ra iotek fän iten ekewe chon lükü Jesus, pwe pwal ir repwe angei ewe Ngünmifel, 16 pun ewe Ngünmifel esamwo feitiu won eman me leir. Ra chök papatais ngeni iten ewe Samol Jesus. 17 Mürin Petrus me Johannes ra iseis pöür wor, iwe, ra angei ewe Ngünmifel.
18 Iwe, lupwen Simon a küna pwe Ngünmifel a tori chokewe ekewe soukünö ra iseis pöür wor, a mochen ngeni Petrus me Johannes moni 19 o üra, “Oupwe pwal ngeniei ei manaman, pwe are ngang üpwe iseis pei won eman, epwe angei Ngünmifel.” 20 Nge Petrus a pölüeni, “Amwo en me noumw moni oupwe tolong lon hell, pun ka ekieki pwe ka tongeni möni än Kot lifang ren moni! 21 Esap wor wisom are kinikinum lon ei angang, pun lelukom esap pwüng mwen mesen Kot. 22 Kopwe ekieksefäl seni om ei ekiek mi ngau o iotek ngeni ach Samol, pwe i epwe amusala ei sokun ekiek mi nom lon lelukom. 23 Pun üa küna pwe en ka fokun uren lolowo, ka pwal fötek ngeni tipis.” 24 Mürin Simon a üreni Petrus me Johannes, “Ouse mochen oupwe iotek ngeni ewe Samol fän itei, pwe esap wor och lein ekei mettoch oua kapas usun epwe fis ngeniei.” 25 Iwe, wesin än Petrus me Johannes pwärätä Jesus o apworausa än ewe Samol kapas, ra liwinsefäliti Jerusalem. Lupwen ar sai ra afalafala ewe Pworausen Manau lon chomong sopw me lon Samaria.
Filip me ewe nöüwis seni Itiopia
8.26-40
26 Iwe, eman nöün ewe Samol chon läng a üreni Filip, “Kopwe amolokotä o feila peliör won ewe al mi feila seni Jerusalem tori Kasa, ei al esap wor eman aramas a fetal won.” 27 Iei mine Filip a feila, nge won ewe al a churi eman re Itiopia, i eman ätelipich mi reirei, eman nöüwis mi tekia nöün ewe kiwin Kantake seni Itiopia, a tümwünü pisekin mi aüchea me nöün moni meinisin. Ei mwän a feila Jerusalem pwe epwe fel ngeni Kot, 28 nge iei a liwiniti lenian, a mot won waan woken o aleani puken ewe soufos Aisea. 29 Iwe, Ngünmifel a üreni Filip, “Kopwe feiliti ewe woken o ouwärer ngeni le fetal.” 30 Mürin Filip a sä ngeni o a rong pwe ewe nöüwis a aleani seni puken ewe soufos Aisea. Iwe, a aisini, “Ka weweiti mine ka aleani?” 31 Ewe nöüwis a pölüeni, “Epwe ifa usun ai üpwe tongeni weweiti nge esap wor eman a awewe ngeniei?” Iwe, a tüngor ngeni Filip pwe epwe tötä o mot ren won ewe woken. 32 Ikei ekewe wokisin ewe nöüwis a aleani,
“I a usun eman sip aramas ra emwenala pwe epwe ninnila,
a usun eman nienifön sip a fanafanala lupwen ar fichi ünan.
Esap apasa eu kapas.
33 Lon an küna asäw, resap föri ngeni mine a pwüng.
Iö a tongeni kapas usun mwirimwirin kana?
Pun manauan won fanüfan a üküpöküla.” ✡ Ais 53.7-8 34 Iwe, ewe mwän a aisini Filip, “Kose mochen üreniei, iö ewe soufos a kapas usun? A kapas usun i ika usun eman?” 35 Mürin Filip a popuetä le kapas won ekei wokisin o apworausa ngeni ewe Pworausen Manau usun Jesus. 36 Lupwen ar sasai won ewe al, ra tori eu leni ia a wor koluk ie. Iwe, ewe nöüwis a üra, “Nengeni, a wor koluk ikei! Met a epeti ai üpwe papatais?” 37 [Filip a pölüeni, “Are ka lükü ren unusen lelukom ka tongeni papatais.” Ewe nöüwis a pölüeni, “Ngang üa lükü pwe Jesus Kraist Nöün Kot.”] 38 Iwe, ewe nöüwis a allük pwe ewe woken epwe köüla o ir me ruoman, Filip me ewe nöüwis, ra feitiu o tolong lon ewe koluk. Nge Filip a papataisi ätei. 39 Lupwen ar towu me lon ewe koluk, Ngünün ach Samol a angeala Filip. Iwe, ewe nöüwis esap chüen küna, nge a sopwela lon an sai fän pwapwa mi watte. 40 Iwe, Filip a pwä me lon Astot. A saifeil lon ekewe telinimw meinisin o afalafala ewe Pworausen Manau tori a tori Seserea.