12
Epwe wor eu chök lenien fel
12.1-28
“Ikkei ekewe allük me pwüüng oupwe tümwünüöchü le apwönüetä lon ränin manauemi meinisin me lon ewe fanü ewe Samol mi Lapalap än ämi kewe lewo we Kot a ngenikemi pwe fanüemi. Iwe, ekewe fanü oupwe angei seni chon ekewe mwü, oupwe fokun ataela me lon ekewe leni meinisin ia ekewe aramas ra fel ngeni ar kewe kot ie, won ekewe chukutekia me won ekewe chukutekison, pwal fän iteiten irä mi muresires. Oupwe amökkätiu ar kewe rongen asor, oupwe atatakisi ar kewe ür mi pin o kenala ar kewe uluulun ewe anüfefin Asera. Oupwe pwal pöküetiu ar kewe uluulun anümwäl liosun ar kewe kot o amoola iter seni lon ewe leni. Tut 7.5 Ousap fel ngeni ewe Samol mi Lapalap ämi we Kot usun ekei aramas ra fel ngeni ar kewe kot. Nge oupwe feila ngeni ewe chök leni ewe Samol mi Lapalap ämi we Kot epwe filätä seni lein fanüen ämi kewe ainang meinisin, pwe aramas repwe fel ngeni ie, epwe pwal föri pwe lenian. Ikenan oupwe feila ie, ikenan oupwe pwal uwala ämi asoren kek me ämi kewe sokopaten asor, ämi eu leengol me ämi kewe asor oua fang, ämi asoren pwon me asor seni püsin letipemi, pwal ekewe mweinöün nöümi pwiin kow me sip. Iwe, ikenan oupwe mongö me fän mesen ewe Samol mi Lapalap ämi we Kot, oupwe pwal pwapwa me chon leimwemi ren meinisin mine oupwe föri, pun ewe Samol mi Lapalap ämi we Kot a afeiöchükemi. Iwe, ousap föri usun mine oua föri me lom. Pun tori ikenai iteiten eman me eman a chök föri mine a pwüng me ren. Pun ousamwo tori ewe lenien asösö, ewe fanü ewe Samol mi Lapalap epwe ngenikemi pwe fanüemi. 10 Nge lupwen oupwe pwerela pekilan ewe chanpupu Jortan o nonom lon ewe fanü ewe Samol mi Lapalap ämi we Kot epwe ngenikemi pwe fanüemi, lupwen epwe pwal asösöükemi seni chon oputakemi mi nom ünükümi, pwe oupwe nonom lon fän kinamwe, 11 oupwe uwato meinisin mine üa allük ngenikemi ren ewe leni ewe Samol mi Lapalap ämi we Kot epwe filätä pwe aramas repwe fel ngeni ie. Oupwe uwato ämi asoren kek me ämi kewe sokopaten asor, ämi eu leengol me ämi kewe asor oua fang, ämi asoren pwon meinisin oua pwonei ngeni ewe Samol mi Lapalap. 12 Iwe, oupwe pwapwa fän mesen ewe Samol mi Lapalap ämi we Kot, ämi me nöümi mwän me nöümi fefin, nöümi chon angang mwän me chon angang fefin, pwal ekewe mwän seni ewe ainangen Lefi mi nom lon ämi kewe telinimw, pun esap wor fanüer me wiser remi. 13 Oupwe afälikemi pwe ousap eäni ämi asor lon iteiten leni oua sani. 14 Nge oupwe chök eäni lon ewe leni ewe Samol mi Lapalap epwe filätä seni lein fanüen ämi kewe ainang. Ikenan oupwe eäni ämi kewe asoren kek, ikenan oupwe pwal föri meinisin mine üa allük ngenikemi.
15 Nge oua tongeni niela man o ochoch fituker ekis meinisin me lon ämi kewe telinimw ükükün ämi mochen, pwal ükükün än ewe Samol mi Lapalap ämi we Kot a afeiöchukemi. Chokewe mi limengau me chokewe mi limöch repwe tongeni mongö, usun ra ochoch chia ika sokun chia itan kasele. 16 Nge ousap fokun ünümi ewe cha, pwe oupwe ninätiu lepwül usun koluk. Ken 9.4; Lif 7.26-27; 17.10-14; 19.26; Tut 15.23 17 Iwe, ousap mongö ewe eu leengolun kiniemi föün wiich ika ünümi ewe eu leengolun ünümemi wain ika eäni ewe eu leengolun ämi apüra lon ämi kewe telinimw. Ousap pwal ochoch mweinöün nöumi pwiin kow ika sip. Ousap ochoch ämi asoren pwon oua pwon won, ika ämi asor seni püsin letipemi, ika ekewe sokopaten asor oua fang. 18 Nge oupwe mongö ekei asor fän mesen ewe Samol mi Lapalap ämi we Kot lon ewe leni a filätä, ämi me nöümi mwän me nöümi fefin, nöümi chon angang mwän me chon angang fefin, pwal ekewe mwän seni ewe ainangen Lefi mi nom lon ämi kewe telinimw. Iwe, oupwe pwapwa fän mesen ewe Samol mi Lapalap ämi we Kot ren meinisin mine oua föri. 19 Nge oupwe afälikemi pwe ousap manlükala ekewe mwän seni ewe ainangen Lefi lon ükükün ränin manauemi won fanüemi.
20 Iwe, lupwen ewe Samol mi Lapalap ämi we Kot epwe awatteloi fanüemi usun a fen pwon ngenikemi, nge oua mochen ochoch fituk, pokiten oua mwäräkich won fituk, oupwe tongeni ochoch fituk ükükün ämi mochen. 21 Are ewe leni, ewe Samol mi Lapalap ämi we Kot epwe filätä pwe aramas repwe fel ngeni ie, a kon toau senikemi, oua tongeni niela eman man seni nöümi pwiin kow ika sip ewe Samol mi Lapalap a ngenikemi. Iwe, oua tongeni ochoch ewe fituk me lon ämi kewe telinimw ükükün ämi mochen, usun üa fen allük ngenikemi. 22 Usun oua ochoch chia ika sokun chia itan kasele, iei usun oupwe pwal tongeni ochoch ei fituk. Iwe, chokewe mi limengau pwal chokewe mi limöch ra tongeni ochoch. 23 Nge ousap fokun ünümi ewe cha, pun manau a nom lon cha. Iei mine ousap tongeni eni ewe manau mi nom lon ewe fituk. 24 Ousap ünümi ewe cha, nge oupwe ninätiu lepwül usun koluk. Lif 17.10-14 25 Iwe, ousap ünümi, pwe ämi me mwirimwirimi kana oupwe feiöch, pokiten oua föri mine a pwüng me fän mesen ewe Samol mi Lapalap. 26 Nge ekewe mettoch mi pin oua wisen eäni asor, pwal ämi kewe asoren pwon oupwe uweerela lon ewe leni ewe Samol mi Lapalap a filätä. 27 Iwe, oupwe eäni ämi asoren kek, ewe fituk me ewe cha won ewe rongen asor än ewe Samol mi Lapalap ämi we Kot. Oupwe pwal eäni ekewe asor oua tongeni ochoch fituker, nge chan ekewe mönün asor epwe ninitiu won ewe rongen asor än ewe Samol mi Lapalap ämi we Kot. 28 Iwe, oupwe fokun aleasochisi ekei kapas meinisin üa allük ngenikemi, pwe oupwe feiöch ämi me mwirimwirimi kana tori feilfeilachök, pokiten oua föri mine a mürina o pwüng me fän mesen ewe Samol mi Lapalap ämi we Kot.”
Kapasen fön usun fel ngeni anümwäl
12.29–13.18
29 “Iwe, ewe Samol mi Lapalap epwe arosala chon ekewe mwü me mwemi, chokewe oupwe angei seniir fanüer pwe oupwe fanüeni o nonom lon. 30 Mürin ar rosola oupwe afälikemi pwe ousap tup ren ämi apirüür, ousap pwal ais usun ar kewe kot o apasa: Ifa lapalapen än chon ekei mwü fel ngeni ar kewe kot? Pun äm aipwe pwal föri ina usun. 31 Ousap fokun fel ngeni ewe Samol mi Lapalap ämi we Kot usun ir ra fel ngeni ar kewe kot. Pun lon ar fel ngeni ar kewe kot ra föri sokun föför mi anioput ewe Samol mi Lapalap a oput. Ra fen mwo nge keni nöür ät me nengin ngeni ar kewe kot. 32 Iwe, oupwe tümwünüöchü le föri meinisin mine üa allük ngenikemi. Ousap apacha och ngeni ika angei och seni. Tut 4.2; Pwär 22.18-19

12:3: Tut 7.5

12:16: Ken 9.4; Lif 7.26-27; 17.10-14; 19.26; Tut 15.23

12:24: Lif 17.10-14

12:32: Tut 4.2; Pwär 22.18-19