6
Allük fän iten ekewe mi angei ewe pwonen Nasir
6.1-21
Iwe, ewe Samol mi Lapalap a kapas ngeni Moses, pwe epwe üreni ekewe aramasen Israel: Are eman mwän ika eman fefin a eäni och sokun pwon pwe epwe püsin apini fän iten ewe Samol mi Lapalap ren an epwe eman Nasir, epwe püsin apini seni wain me sakau mi pwichikar. Esap fokun ün finikar mi för seni wain ika seni sakau mi pwichikar, esap pwal ün chönün föün wain are ochoch föün minefö ika mi apwas. Iwe, ükükün ekewe rän meinisin a apini lon esap fokun ochei och mi pop seni irän wain, esap mwo nge eni ekewe kükün föün lon ika silin föün wain.
Iwe, ükükün ekewe rän meinisin a pwonen apinipin lon esap fichi möküran. Tori wesöchülan ekewe rän a püsin apini fän iten ewe Samol mi Lapalap, i epwe pin. Iwe, epwe apwükü möküran pwe epwe langatam.
Iwe, ükükün ekewe rän meinisin a püsin apini lon fän iten ewe Samol mi Lapalap esap fokun kan ngeni eman somä. Ese lifilifil ika saman ika inan ika pwin ika fefinan a mäla, esap fokun püsin alimengaua ren an kan ngeniir. Pun meten möküran asisilen an apinipin fän iten Kot. Ükükün ekewe rän meinisin a apini lon epwe pin fän iten ewe Samol mi Lapalap.
Nge are eman aramas a müttir mäla ünükün pwe möküran mi pin a limengau, epwe reipöpöla möküran lon afisuen rän, iei ränin an limöchsefäl. 10 Iwe, lon awaluen rän epwe uwato ruoman lisom ika ruoman apansüsün lisom ren ewe souasor leasamalapen ewe imw mangaku ia aramas ra churi Kot ie. 11 Iwe, ewe souasor epwe eäni asor eman leir fän iten asoren tipis, nge ewe eman fän iten asoren kek. Iwe, epwe föri asoren amusamusen tipis fän iten ätewe, pun a tipis ren an kan ngeni ewe somä. Iwe, epwe apinisefäli möküran lon ewe chök ränin 12 o püsin apini fän iten ewe Samol mi Lapalap ükükün ekewe rän a pwon pwe epwe apinipin lon. Iwe, epwe pwal uwato eman ätemwänin lam eu ierin fän iten asoren pupungau. Nge ewe fansoun mesemwan esap chüen alea, pun a limengau lon fansoun an apinipin.
13 Iwe, iei ewe allük fän iten ewe Nasir, lupwen a wes ränin an apinipin. Repwe emwenato leasamalapen ewe imwenfel seni mangaku, 14 nge i epwe uwato an asor ngeni ewe Samol mi Lapalap ülüman man esap wor terir: eman ätemwänin lam eu ierin pwe asoren kek, eman liefefinin lam eu ierin pwe asoren tipis, pwal eman ätemwänin sip pwe asoren kinamwe. 15 Epwe pwal uwato lon eu chük pilawa esap wor iis lon, pilawa mi mürina a nofit ngeni apüra, pwal sokun pilawa usun nokop mi toto ngeni apüra, fitifengen me ekewe asoren mongö me asoren ün. 16 Iwe, ewe souasor epwe uwato ekei mettoch fän mesen ewe Samol mi Lapalap o eäni asor än ewe Nasir asoren tipis me asoren kek. 17 Epwe pwal eäni asor ewe ätemwänin sip pwe asoren kinamwe ngeni ewe Samol mi Lapalap fitifengen me ewe pilawa esap wor iis lon seni lon ewe chük. Epwe pwal eäni asor ewe asoren mongö me asoren ün. 18 Iwe, ewe Nasir epwe reipöpöla möküran mi apinipin leasamalapen ewe imwenfel seni mangaku. Mürin epwe angei meten möküran o isetä won ekkein ewe asoren kinamwe. 19 Iwe, wesin an reipöpöla möküran, ewe souasor epwe angei pöün ewe ätemwänin sip mi kuk, epwe pwal angei me lon ewe chük eföü pilawa mi mürina me echö nokop esap wor iis lor o isenirelong lepöün ewe Nasir. 20 Mürin, ewe souasor epwe assaweer pwe eu asoren assaw fän mesen ewe Samol mi Lapalap. Ikei ekewe kinikin mi pin epwe än ewe soausor fitifengen me ewe leup mi assaw me ewe angan. Mürin ewe Nasir a tongeni ün wain.
21 Iei ewe allük fän iten eman Nasir mi angei ewe pwon. An asor ngeni ewe Samol mi Lapalap epwe alongolong won ükükün ewe pwonen Nasir. Nge lükün ekei asor a pwal tongeni asor ükükün an tufich. Iwe, epwe apwönüetä pwüngün ewe pwon a angei o föri ükükün allükün ewe pwonen Nasir.
Än ekewe souasor kapasen afeiöch
6.22-27
22 Iwe, ewe Samol mi Lapalap a kapas ngeni Moses, 23 “Kopwe üreni Aaron me nöün kewe mwän pwe repwe eäni ekei kapasen afeiöch ngeni ekewe aramasen Israel: 24 ‘Ewe Samol mi Lapalap epwe afeiöchükemi o tümwünükemi, 25 ewe Samol mi Lapalap epwe netiu womi fän an kirikiröch o ümöümöch ngenikemi, 26 ewe Samol mi Lapalap epwe wopwapwa ngenikemi o fang ngenikemi kinamwe.’ 27 Iei usun repwe föüni itei won ekewe aramasen Israel, nge ngang üpwe afeiöchüür.”