2
Än Kraist tekison me an tekia
2.1-11
Iwe, manauemi lon Kraist a apöchöküla letipemi, an chen a echipakemi, oua chiechifengen me Ngünmifel, oua pwal eäni kirikiröch me tongfengen lefilemi. Iei mine üa pese ngenikemi ämi oupwe föri met ai pwapwa epwe unus ren. Oupwe eäni eu chök ekiek, eu chök chen, oupwe pwal ngün eu me tipeeu. Ousap föri föförün apangau are föri och ekiekin sikesik, nge oupwe tipetekisonfengen lefilemi, ousap ekieki pwe oua mürina seni ekewe ekoch. Ousap chök ekieki en me an feiöch, nge oupwe pwal ekieki feiöchün chienemi. Oupwe eäni ewe chök ekiek Kraist Jesus a eäni: A lapalapeni lapalapen Kot, nge esap ekiekin amwöchünükü an wewe ngeni Kot usun ach amwöchünükü mettochüch. Nge seni lon letipan a fangala meinisin mine a eäni, pwe a lapalapeni lapalapen eman chon angang. A wiliti ususun aramas o pomweni pomwen aramas. A püsin atekisonatiu o eäni aleasochis tori mäla, tori an mäla won iräpenges. Iei mine Kot a atekiatai won eu leni mi fokun tekia, a pwal ngeni eu it mi iteföüla seni it meinisin. 10 Iwe, chokewe meinisin mi nom won läng me fanüfan pwal failol repwe fotopwäsuk o asamolu ewe it iten Jesus, 11 nge ir meinisin repwe pwärätä pwe Jesus Kraist i Samol, pwe Kot Sam epwe ling ren. Ais 45.23
Oupwe tin usun eu saram won fanüfan
2.12-18
12 Iei mine chienei kana mi achengicheng, usun ämi oua aleasochisiei fansoun meinisin lupwen üa nonom remi, iei usun a men aüchea ämi oupwe aleasochisiei lupwen üa toau senikemi. Oupwe achocho le anganga püsin ämi küna manau fän niuokus me chechech, 13 pun Kot ewe a angang lomi, epwe afisätä ämi mochen me ämi tufichin apwönüetä letipan.
14 Oupwe föri ämi angang meinisin, nge ousap lal are anini, 15 pwe esap wor och mi mwäl lon manauemi, nge oupwe limöch usun nöün Kot kana mi unusöch ra nonom won ei fanüfan mi ur ren aramas mi kirikiringau me tipis. Oupwe fokun tittin lefiler usun ekewe fü ra tittin fän läng, Tut 32.5 16 lupwen oua ngeniir ewe Kapasen Manau. Are epwe iei usun mine oua föri, epwe wor popun ai üpwe sikäsinikemi lon ewe Ränin än Kraist epwe liwinsefäl, pun epwe pwä pwe ai achocho me ai angang weires esap lomotongau. 17 Nge inamwo ika chai epwe ninnila usun eu asoren ün won ewe asor me ewe angang mi fis ren ämi lükülük, ngang üpwe chök pwapwa o ämi meinisin oupwe etiei lon ai pwapwa. 18 Ina usun ämi oupwe pwal pwapwa, nge ngang üpwe etikemi lon ämi pwapwa.
Timoty me Epafrotitus
2.19-30
19 Iwe, are iei letipen ach Samol, üa apilükülüköch pwe üpwe tongeni müttir tinala Timoty remi, pwe letipei epwe pöchökületä lupwen üpwe rongorong ewe pworaus usumi. 20 I chök ewe eman aia wewefengen lon äm ekiek, i a pwal wesewesen chüngükemi. 21 Pun ekewe ekoch ra chök ekieki püsin ar, nge resap ekieki usun ewe angangen Jesus Kraist. 22 Iwe, ämi oua püsin silei usun lomotöchün ätei, pwe i me ngang aia angangfengen fän iten ewe Pworausen Manau usun chök eman nau a angangfengen me saman. 23 Iei mine üa apilüköch ai üpwe tinala ätei remi lon ewe chök otun üa silei met epwe fis ngeniei lon ai nom lon fötek. 24 Nge ngang üa apilükülük lon ach Samol pwe püsin ngang üpwe tongeni müttir feila remi. 25 Ngang üa ekieki pwe epwe öch ai üpwe tinsefäliela remi pwiich Epafrotitus, ätei a etiei le angang pwal le maun, ätewe ämi oua akünöü pwe epwe alisiei. 26 Epafrotitus a fokun positikemi meinisin, a pwal fokun lolilen pokiten oua rongorong pwe a samau. 27 Enlet, a fokun samau o arap ngeni an epwe mäla. Nge Kot a tongei, nge sap i chök pwe pwal ngang, pun esap mochen ai üpwe tolong lon watten letipeta. 28 Iei mine üa fokun mochen amüttirala remi, pwe oupwe pwapwasefäl lupwen oupwe küna i, nge ai lolilen epwe wesila. 29 Iwe, oupwe etiwa i fän pwapwa usun eman pwimi lon ach Samol. Oupwe meniniti ei sokun aramas, 30 pun a fangala manauan o arapakan ngeni an epwe mäla fän iten än Kraist angang, pwe epwe siwilikemi le alisiei, lupwen ämi ousap tongeni.

2:11: Ais 45.23

2:15: Tut 32.5