5
1 Dios gatyii'¹³in jee²¹² tsá² jileei'²¹ untsá² 'in tyiin²gɨ nifu joon gacwo'¹o to² 'e faa'²¹a cwáain¹ tya' tsá² tyaníi¹i, joon icwo'²o fa'¹ joon jngaa'¹³i joo'²¹ 'wii'¹³ tsaa² tya' tsá². 2 Joon tsʉ 'wii'¹³ 'in untsá² do seein²¹ fa'í³ la seein²¹ jileei'²¹ tsá² catyaai² lí²‑i jmaa¹a 'wó²o‑tsi coon'¹³ 'in jo ñi¹i joongɨ coon'¹³ 'in nigawíin². 3 Joon tsʉ 'wii'¹³ seein²¹ fa'í³ 'in untsá² do la seein²¹ 'in catyaai², 'noo¹o tsaa², joon 'ná¹ jngaa'¹³i joo'²¹ 'wii'¹³ tsaa² tya'a 'ña'a jiin'¹³ la jngaa'¹³i joo'²¹ 'wii'¹³ tsaa² tya' 'in catyaai².
4 Jiin'¹³ jaain²¹ jo lí² jméi² 'ña'a 'e líi²in untsá² 'in tyiin²gɨ nifu. Jiin'¹³ Dios lí² tøø'²¹ tsá² 'e jmaa¹a 'e to² joon. Jiin'¹³ Dios lí² cwoo¹ to² joon la gajmaa¹a coon'¹³ Aarón. 5 La joon galɨ́² coon'¹³ Cristo, jo gajméi¹ 'ña'a untsá² 'in tyiin²gɨ nifu do pe Dios Jmii²¹ gacwo'¹o 'ii 'e to² joon. Joon gajin'² Dios sɨɨ'²¹ɨ 'ii:
'Nʉ‑ʉ yʉʉn²¹ tyiia;
joon nano nigacwo'¹o 'nʉ juncwii²¹ tyi'i.
6 Joon lɨ xiia' ni jí² tya' Dios 'e jin'²in:
'Nʉ‑ʉ jaain²¹ untsá² coon²¹ tøø²mo,
lawa untsá² Melquisedec lɨ́ɨ¹u'u.
7 Joon mo gateein¹ Jesús ni cwoo'¹³ juncwii²¹ gafaa'²¹a júu³ tyʉ́² joon gamɨɨ¹ɨ tyani Dios Jmii²¹ coon'¹³ júu³ tá² lɨ¹ joongɨ gatoo'²¹ jmɨɨ²¹ unníi¹i. Joon Dios, 'in lí² jmáa¹a 'e jo júun²in, ganúu²o júu³ tyʉ́² tya'a tsʉ 'wii'¹³ tsáa¹‑tsi. 8 Joon xʉfiin'¹³ Jóon¹ Dios Jesús galitɨ́ɨ²mo 'e jmáa¹a nʉʉ'¹³ʉn to² tyʉ'² Dios coon'¹³ jilaa'²¹ wúu¹ 'e gangoo¹o. 9 Joon mo ga'yeei²¹ røø²¹ jilaa'²¹ 'e 'ná¹ jmáa¹a galɨ́ɨ¹i 'in jmá¹a tiin'¹³ tsá² coon²¹ tøø²mo jileei'²¹ 'in jmá¹a nʉʉ'¹³. 10 Tsʉ Dios Jmii²¹ gajméi¹ 'ii untsá² 'in tyiin²gɨ nifu jiin'¹³ la galɨ́ɨ¹i Melquisedec.
Wúu¹moxʉ 'øøi'²¹‑tsi tsá²
11 Sá²gɨ 'áai¹ 'e fuu²¹²uu 'e cwáain¹ tya' 'e júu³ lo pe wúu¹mo lɨ́¹ 'áai¹ tsʉ jo 'iin²¹²naa' 'e 'øøi'²¹‑'oo'. 12 Jiin'¹³ la wóo² ningóo¹ 'naa' tɨ́ɨ²naa' líi²naa' tɨfo'² tya' 'e júu³ lo pe xʉ 'naa' 'ná¹ 'naa' 'in sɨɨ'²¹naa' xiia'gɨ tún² 'e júu³ jo wúui¹ tya' Dios 'e nʉʉ²ʉʉn' nifu. Nigajmaa²aa' 'wo² sɨ'ɨ́ɨ¹‑'oo' coon'¹³ 'e jai'² lɨ́ɨ²naa'. Lawa yʉʉn²¹ cuu'²¹ tʉʉ'²¹ 'naa' coon'¹³ 'e jai'² lɨ́ɨ²naa' jo lí² cøø²øø' 'í¹ tyʉ́². 13 Joon jileei'²¹ 'in 'uun'²¹ fi'² lɨ́ɨ¹i lawa yʉʉn²¹ joon jo ñi¹ xiiala 'øøi'²¹‑tsi 'e júu³ tya' 'in ngɨ́¹ coon²¹ tsáa¹. 14 Pe 'uunñi² tyʉ́² tya' tsacøøi'¹³ 'in nili'³ tsʉ nigalitɨ́ɨ²i 'e jmáa¹a 'ii'²¹ røø²¹ coon'¹³ 'e tyʉ́², coon'¹³ 'e gó².