San Pablo Efesolachi
ereca jun pila
Caque fiqui: Efeso duque inportante wa pueblo jominue. Junni Pablo junbi Diosichi fiquica micarinan, weyanlari Jesucrístobe cayaica joto, culto quichun layaimin jominlanue. Junni Pablo yalaca nanni fécari micarino munaratonan, yalachica manjino podeitunue. Pablo Diosichi fiqui micarinanun tenchi Roma pueblobi dorato, efésolachica manjino podeitunue. Junto in pilaca Diosichi Tencachi mantate quito, yalachica erenue efésolaca micarichun.
Pablo in pilabi Jesucristo niyan jonunca duque micarinue. Junsi duque conparasionbe micarinue: Jesucristo yachi tsachilachi misu cuwenta joeque, yalari yachi puca cuwenta joeque micarinue. Yucanbe quera quicaaminla cuwenta jolajoyoequenan micarinue. Junsi Jesucrístobe yachi tsachilabe layaito Diosichi ya cuwenta jolajoyoequenan micarinue. Diosichi to tsachila joto, Diosichi familiala cuwenta jolajoyoequenan micarinue. Pablo in pilaca wata 60 tsansite chutenue.
1
La Pablo nulabe duque saludainayoe. Diosi laca wenteca joe yape Crístochi mantá tan nenasa. Nulanan Jesucrístobe pecayaicala joto, Diosichi tsachila jolajoe. Chiquilachi Apa Diosibe Miya Jesucrístobe nulaca laquirato, pansi chusa carisa tenjae yape wepanatuto chularasa.
Miya Diosica se tinola jonunca
Apa Diosiri chiquilachi Miya Jesucrístochinan Apa joe. Yaca duque se tintsan joe. Chiquila Crístochi tsachila joto, Diosichi to tsachila jolajoyoe. Junbi chiquilachi tenchi duque seca joe. Diosiri toca caquituminnan, chiquilaca, yaca quereino junlaca, wenteca jominue. Chiquilaca wenteca jominue yape yachi sen tsachila joto yachi cate ti culpanantiya iton nenalarasa. Chiquilaca na caitusanan, Apa Diosi chiquilaca duque laquirato wentenue yape Jesucrístoca quereiminla joto, Diosichi nalala cuwenta jolajosa. Diosi yachi tenca munate tenca cato, chiquilaca Yachi nalala jolajochunae tinue. Chiquila Diosichi munatinun Naochi tsachila jonan, Diosi chiquilaca duque laquirato, chiquilaca senla joe timinhe. Junto chiquilaca wentenue yape Diosi duque laquiramin jonan yaca sen joe latisa. Ya Nao yachi Apachi mantate puyato, asan larito, chiquilaca se larito cuwae. Chiquilachi jutsaca piyarito se larito cuwae. Chiquilaca duque laquirato perdonaicae.
8-9 Matu male nechi Diosi ticatiya quino tenca canaminue. Cristo ticatiya quino jominue. Junni casale tsachilari junca miitominlanue. Amanari chiquilaca laquirato jera micaricae. 10 Jun micarica jun fiqui itsanque joe: Cristo mantano ma fenunbi, piyanlelaca mantachunae. Jerale layaito jamochi chuminlanan, tote chuminlanan, Crístobesiri mantailaichunae.
11-12 Diosiri yachi tenca munate niyantiya quiniquimin joe. Aman chiquila israelítala casale Crístoca quereimin jolajoyoe. Junni Diosi chiquilaca matu male nechi wenteca joto mantanue yape chiquila Crístochi joto yaca duque sen joe tito nenalarasa. Yari duque seque mantamin joe. 13 Junni nulanan israelita itonlanan jun sen fiquica meralaquinue. Jun tsarasi fiqui nulaca se lolaichunaeque paca joe. Junni nulanan Crístobe cayailainue. Aman junni Diosi mantimini paca jominue Crístoca quereiminlachibi yachi Tencaca wisa carino joyoeque. Junto nulachi tencabinan yachi Tencaca ereca joe yape nula jeralela Diosichi jolajoyoeque miralarasa. 14 Chiquila amanari Diosichi Tencaca nasiri tato miintsan joe Diosi chiquilachi jera ticatiya cuwachunaeque. Ticatiya senca cuwachunae yape chiquila yaca Duque sen joe latisa. Junni Diosichi Tencari cala antisipaquica cuwenta joe. Jun calaca nasiri tato miintsan joe jerale calaca cano joyoeque.
Pablo Jesucrístoca quereiminlachi tenchi rocainunca
15 Nulaca meráto, Diosibe acradeseimanyoe. Nulari Miya Jesube cayaicala joto, jerale yachi tsachilaca laquiralaraeque meráyoe. Junni junca meracale nechi 16 la numasitiya Diosibe rocainato, nulacanan mantenhito nulachi tenchinan Diosibe peacradeseimin joyoe. 17 Diosi nulaca duque mi carisa rocaimin joyoe. Yari chiquilachi Miya Jesucrístochi tsara sen Apa joe. Junni nulachi tencabi yaca duque mirasa carideque rocaimin joyoe yape yaca seque entendeilaisa. 18-19 In fiquica miisa rocainayoe. Diosi nulaca yabe cayaisa tinue yape yachi jolajosa. Aman Diosi yachi tsachilachi duque senca cuwachunae. Junni nulanan jun senca seque tenca cato meralarae. Junni Diosi miituntsancari sonban joto, yaca quereiminlaca jun sonbabe se suwachunae. Aman lari Diosibe duque rocaimin joyoe yape nula ya fiquica jera miilaisa.
20 Junni Diosi chiquilachi tenchi sonban joto, jun sonbabenan Cristo puyacaca mansonhisa carito, jamochi mantanloto yachi tsa tede nanchi chuteto tae. 21 Jerale mantá tanlacatiya ya fécari mantá tan joe. Ti felacatiya fe mantá tan joe. Amana mantá tanlaca, o uyan mate mantá tano junlacanan ya fe mantá tan joe. 22-23 Diosi Crístoca jeralelaca mantá tan suwanue. Junsi yachi tsachilachi Miya suwanue. Crístori jera sen quimin joe. Tsan jotonan, yachi tsachila itonari, yanan cafalta jochunae. Jana tsachi puca cuwenta jochunae. Tsachilachi misu jera pucaca mantamin joe. Chiquilachi misubi tenca janunca tede o nede wecacariminla joyoe. Junni Cristo jun tsanquenan yachi tsachilaca mantamin joe misu cuwenta.